ދިވެހިރާއްޖޭގެ މައި ދޮރާށި ކަމަށްވާ، ވެލާނާ އިންޓަނޭޝަނަލް އެއާޕޯޓުގައި އަލަށް ތަރައްޤީ ކުރި ބިޔަ އަދި ފުރިހަމަ ޓާމިނަލް ނިންމައި، މި އަންނަ މިނިވަން ދުވަހު އެތަން ހުޅުވަން ތައްޔާރު ވަމުންދާ ކަމީ އެ މަޝްރޫއުގައި ބައިވެރިވި މީހުންނަށާއި ދިވެހި ކޮން ރައްޔިތަކަށް ވެސް ލިބޭނެ ވަރަށް އުފާވެރި ޚަބަރެކެވެ.

އެ އުފަލުގައި ހުއްޓާ ދެން އެކަމާ ގުޅިގެން އައި ޚަބަރުން ސިއްސައިގެން ދިޔައެވެ. ލިބުނު ހިތްހަމަ ޖެހުމާއި ކުރެވުނު އުފާވެރި އިހްސާސް ފިލައި ހިނގައްޖެއެވެ.

އެއީ ވެލާނާ އިންޓަނޭޝަނަލް އެއާޕޯޓުގެ ކޮންމެވެސް މުހިންމު ތަނެއް އަޑި ނޭނގޭ ޑީލެއްގެ ދަށުން ބޭރުގެ ބަޔަކަށް ދޫކޮށްލަން އުޅޭ ހަބަރެވެ.

ކަމުގެ އެކޮޅު މިކޮޅު ބަލައިލި އިރު، ވެގެން މި އުޅޭގޮތް ސާފުވިއިރު ކަމަކު ދާކަށް ނެތެވެ.

ވެލާނާ އިންޓަނޭޝަނަލް އެއާޕޯޓުގައި ޕްރައިވެޓް ޖެޓްތަކަށް ހިދުމަތް ދިނުމަށް ހެދި، ވީއައިޕީ ޓާމިނަލް ބޭރުގެ ބަޔަކަށް ދިނުމުގެ ކަންކަން ސަރުކާރުގެ ތެރެއިން ސިއްރުން އެބަ ކުރެއެވެ.

ދެނީ ދުބާއީގެ ޖެޓެކްސް ކިޔާ ކުންފުންޏަކަށެވެ.

ދެނީ 25 އަހަރުގެ މުއްދަތަކަށެވެ.

އެއާޕޯޓުގެ ވީއައިޕީ ޓާމިނަލް ހިންގުމާއި އެއާޕޯޓަށް ޖައްސާ ޖެޓުތަކަށް ތެޔޮ ވިއްކުމާއި ގްރައުންޑް ހޭންޑްލިންގެ ހުރިހާ ޚިދުމަތެއް މިއާ އެކު ދެން ދޭނީ ޖެޓެކްސް ކުންފުނިންނެވެ.

އަދި، އެއާޕޯޓުގައި އިތުރު އާ ވީއައިޕީ ޓާމިނަލަކާއި، ފްލައިޓުތައް ޕާކު ކުރުމަށް ބޭނުންވާ ރޭމްޕު އެޅުމަށް އެއަރޕޯޓުން 10،000 އަކަމީޓަރުގެ ބިމެއް އެ ކުންފުންޏަށް މި ޑީލުގެ ދަށުން ދޭންޖެހެއެވެ.

މީގެ އިތުރުން، ޖެޓެކްސްގެ ޖެނެރަލް އޭވިއޭޝަން ފްލައިޓުތައް ޕާކު ކުރުމަށް ބޭނުންވާ ރޭމްޕު އެޅުމަށް 10،000 އަކަމީޓަރުގެ ބިމެއް ވެސް ދޭން ޖެހެއެވެ.

ޑިމާންޑު ބޮޑުވާ ވަގުތު ތަކުގައި ބޭނުން ކުރެވޭ ގޮތަށް އިތުރު ފްލައިޓް ޕާކިން ޖާގަ ހަމައްސައިދޭން ވެސް ޖެހެއެވެ.

އަދި ނިމުނީ އެއް ނޫނެވެ. ޖެޓުތަކަށް އަޅާ ތެޔޮ އެމްއޭސީއެލް އިން ޖެޓެކްސް އަށް އެކްސްކްލޫސިވްކޮށް ސަޕްލައިކޮށްދިނުމުން، ޖެޓުތަކަށް ތެޔޮ ވިއްކާނީ ޖެޓެކްސް ކުންފުނިންނެވެ.

އަޖައިބެކެވެ. ވަރުގަދަ ޖެޓެކްސް އެއް ތާއެެވެ. މިދެންނެވީ މޯލްޑިވްސް އެއާރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިހާރު ވެސް އެއަރޕޯރޓުގައި ދެމުން އަންނަ ޚިދުމަތްތަކެވެ. މިއީ ވެލާނާ އިންޓަރަނޭޝަނަލް އެއަރޕޯޓް ހިންގައިގެން ސަރުކާރަށް ލިބޭ އާމްދަނީގެ ބޮޑުބައެއް ހިއްސާކުރާ ހިދުމަތްތަކެވެ. އެކަމަކު މި ނުބައި ޑީލުގެ ދަށުން އެމްއޭސީއެލްގެ ތެރޭގައި މި އުފެދެނީ އަދި މާ ވަރުަގަދަ އެމްއޭސީއެލް އެކެވެ.

މިވަރު ބޮޑު ކަމެއް، އަދި ދިވެހިރާއްޖެ އަށް އެތައް މިލިއަން ޑޮލަރު ފައިދާވަމުން އަންނަނަނިކޮށް، އަދި އައު ޓާމިނަލް ހުޅުވުމާއެކު ފައިދާ އެތައް ގުނައަކުން އިތުރުވެގެން ދާނެ ކަމަށް ބެލޭއިރު، މިކަންކަން ބޭރު ބައެއްގެ އަތްމަޗަށް ދޫކޮށްލަން ސަރުކާރުން މި އުޅެނީ، ކީއްވެތޯ ސުވާލު އުފެދުނެވެ.

މިހެންވެ، މިފަދަ ކަންކަމުގެ ތަޖުރިބާ ހުރި ބައެއް ބޭފުޅުންނާ ގުޅައި، މިކަމާމެދު ވާހަކަ ދައްކާލީމެވެ.

އެއަރޕޯޓްސް ކުންފުނީގެ ޑިރެކްޓްރުންގެ ބޯޑުގެ މެންބަރުކަން ކުރިން ދެ ފަހަރެއްގެ މަތިން ކުރައްވައިފައިވާ ބޭފުޅަކު ވިދާޅުވީ، ވީއައިޕީ ޓާމިނަލް ހިންގޭނެ ޤާބިލުކަން އެއަރޕޯޓްސް ކުންފުނީގައި ހުންނާނެ ކަމަށާއި، މުވައްޒަފުންވެސް ތައްޔާރުކުރެވިފައި ވާނެ ކަމަށެވެ. އަދި، ސަރުކާރުން މިކަން މިގޮތައް ކުރަން ޖެހޭ ގަބޫލު ކުރެވޭ އެއްވެސް ސަބަބެއް ނޯންނާނެކަމަށެވެ.

"ވީއައިޕީ ޓާމިނަލް ވެސް އަދި މުޅި އެއަރޕޯޓް ނިމުނީމަވެސް ހިންގޭނެ ފެންވަރު އެމް.އޭ.ސީއެލް ގައި ހުންނާނެ. މުޅި ޕްރޮޖެކްޓް ފެށުމާއެކު ބޮޑު އެރޕޯޓް ފުލްކޮށް އޮޕަރޭޓް ކުރެވޭ ވަރަށް ހިއުމަން ރިސޯސް ޑިވެލޮޕް ކުރަމުން، މީހުން ޓްރެއިން ކުރަމުން ރެޑީވަމުން އައީ. އެހެންވިމާ، އެތަނުން އެއްވެސް ތަނެއް ބޭރު ޕާޓީ އަކަށް ދޭން ޖެހޭ ސަބަބެއް ނެތް،" ކަމަށް އޭނާ ވިދާޅުވިއެވެ.

އިގްތިސާދީ ދާއިރާގެ ތަޖުރިބާކާރަކު ވިދާޅުވީ، އެއަރޕޯޓްސް ކުންފުނިން ބަރާބަރަށް ކުރަމުން ދިޔަ ކަމެއް ކުރުމަށް ޓަކައި، އަދި ހަދާ ނިންމައިފައި ހުރި ތަނެއް އެހެން ބަޔަކަށް ދޫކޮށްލަން އުޅޭ ސަބަބާ މެދު ސުވާލު އުފެދޭ ކަމަށެވެ.

"އެމް.އޭ.ސީއެލް އިން މިހާރުވެސް ބަރާބަރަށް ދެމުންގެންދާ ޚިދުމަތްތަކެއް އެހެން ބަޔަކާ ހަވާލު ކުރަން މި އުޅެނީ. އަނެއްކާ، މި ތަން މިހުރީ ހަދާ ނިންމާފައި. އެމީހުން އިންވެސްޓް ކޮށްގެން ހަދަންޖެހޭ ތަނެއް ނޫން. އިންތިހާ އަށް ފައިދާވާ ތަނެއް. ގައިމު ތަން ތަރައްޤީ ކުރާނެ ފައިސާ ނެތިގެން ނުވަތަ ނުހިންގިގެން ދޭކަށް ނުޖެހޭނެ މިހާރު." އޭނާ ވިދާޅުވިއެވެ.

"މިސާލަކަށް ޖީ.އެމް.އާރަށް ދިނީ މުޅި އެއަރޕޯޓް ޑިވެލޮޕް ކޮށްގެން ހިންގަން. އެ ވެދާނެ އަމިއްލަ އަށް އެކަން ކުރަން އޭރު ކެޕޭސިޓީ ނެތީމަ ކަމަށްވެސް. މިހާރު މި ދައްކަނީ ދިވެހިންގެ ނަންމަތީގައި ލޯނު ނަގައިގެން ހަދާ ނިންމާފައި ހުރި ތަނެއްގެ ވާހަކަ. އެހެންވީމާ، އެމީހުންނަށް ދޭން އުޅޭ ސަބަބާމެދު ވަރަށް ބޮޑަށް ސުވާލު އުފެދޭ" އޭނާ އިތުރަށް ވިދާޅުވިއެވެ.

މިހާހިސާބުން ހިޔާލަށް އައީ 2 ކަމެކެވެ:

ފުރަތަމަ ކަމަކީ، ބޭރުގެ ބަޔަކަށް މިފަދަ މުހިންމު ކަމެއް ދޫކޮށްލާން ވާނީ، އެކަމަށް ބޭނުންވާ އުމްރާނީ ވަސީލަތްތައް ޤާއިމު ކުރެވޭނެ ފެންވަރު ސަރުކާރުގައި ނެތް ހާލަތެއްގައި، އަމިއްލަ ފައިސާ އިންވެސްޓް ކޮށްގެން އެފަދަ ވަސީލަތްތައް ޤާއިމު ކުރާނެ ބަޔަކަށެވެ.

މިކަމުގައި، އެތަން އިމާރާތް ކުރާކަށް ނުޖެހެއެވެ. އެ ހުރީ ހަދައި ނިމިފައެވެ. ބޭރު ބައެއްގެ އިންވެސްޓްމަންޓެއް ބޭނުމެއް ނުވެއެވެ.

ދެވަނަ ކަމަކީ، ބޭރުގެ ބަޔަކަށް މިފަދަ ހިދުމަތެއް ދިނުމަށް ޓަކައި ދޫކޮށްލާން ވާނީ، އެކަން ކުރުމުގެ ޤާބިލުކަން ދިވެހި ކުންފުނިތަކުގެ ނުވަތަ ދިވެހިންގެ ކިބައިގައި ނެތް ނަމައެވެ. ނުވަތަ ދިވެހިންނަށް ނުކުރެވޭނެ ވަރުގެ މަސައްކަތަކަށް ވާ ނަމައެވެ.

މިކަމުގައި، އެމީހުން ވަކި މޮޅަށް ކުރާނެ ކަމެއް ނެތެވެ. ދިވެހިން ތިބީ ތައްޔާރު ވެފައެވެ. މިހާރުވެސް އެ ހިދުމަތްތައް ދެމުން ގެންދަނީ ހުނަރުވެރި ދިވެހިންނެވެ. އެކަން ކުރާކަށް ބޭރު ބަޔަކު ބޭނުމެއް ނުވެއެވެ.

ކޮންމެއަކަސް، މިހާ ހިސާބުން މި ޔަގީންވީ، އެއާޕޯޓުގެ ވީއައިޕީ ޓާމިނަލް ހިންގަން ބޭރު ބަޔަކަށް ދޭންޖެހޭ އެއްވެސް ސަބަބެއް ނެތް ކަމެވެ. އެކަމުގައި އޮތިއްޔާ އޮންނާނީ، އެންމެ ސަބަބެކެވެ. އެއީ، ސަރުކާރުގެ ވެރިންގެ ކޮރަޕްޝަނެވެ. އެ މީހުންގެ ޖީބުތަކަށް ވާންނާނެ ފައިސާގެ ބޮޑެތި އަދަދުތަކެވެ. އެ ނޫން އެއްވެސް ސަބަބެއް މިކަމުގައި އޮތް ކަމަކަށް ހަމަ ބުއްދީން ވިސްނާއިރު ފެންނާކަށް ނެތެވެ.

އެކަމަކު ދިވެހިންްގެ އެއަރޕޯޓު ޖެޓެކްސް އަށް ދީގެން ހަމަ ތިބެންވީތޯއެވެ؟