ބޭރުގެ މަތިންދާ ބޯޓެއްގެ ހެވީ މެއިންޓެއިނަންސް ކުރުމުގެ ފުރުޞަތު ފުރަތަމަ ފަހަރަށް ވިލާ އެއަރ އަށް!
މި ބޯޓު އައިސްފައިވަނީ މިއަދު
ރާއްޖެ އައިސްފައިވާ މަތިންދާ ބޯޓު
ރާއްޖެއިން ބޭރުގެ މަތިންދާބޯޓެއްގެ ހެވީ މެއިންޓެއިނަންސް ކުރުމަށް ފުރަތަމަ ފަހަރަށް ވިލާ އެއަރ އަށް ލިބިއްޖެއެވެ.
ވިލާ އެއަރ އިން މިކަމާގުޅޭ ގޮތުން ނެރުނު ބަޔާނެއްގައި ބުނެފައިވަނީ ވިލާ އެއަރޕޯޓް މާމިގިލީގައި ހިންގާ މެއިންޓެއިނަންސް ރިޕެއަރ އެންޑް އޯވަރހޯލް ފެސިލިޓީގައި މަތިންދާބޯޓުގެ ހެވީ މެއިންޓެއިނެންސް އެއް ކުރުމަށްޓަކައި ސްރީލަންކާގެ ޗާޓަރ އެއަރލައިނެއް ކަމަށްވާ ފިޓްސް އޭވިއޭޝަންގެ ATR72-202 ގެ މަތިންދާ ބޯޓެއް ސްރީލަންކާގެ ރަތުމަލާނާ އެއަރޕޯޓުން ފުރައިގެން ސީދާ ވިލާ އެއަރޕޯޓް މާމިގިއްޔަށް ގެނެސްފައިވާ ކަމަށެވެ.
މިއީ ރާއްޖެއިން ބޭރުގައި ރަޖިސްޓްރީ ކޮށްފައިވާ މަތިންދާބޯޓެއްގެ ހެވީ މެއިންޓެއިނަންސް ކުރުމުގެ ފުރުޞަތު ރާއްޖޭގެ ފަރާތަކަށް ލިބުނު ފުރަތަމަ ފަހަރެވެ. މި ޝަރަފު ލިބުނީ ސްރީލަންކާގެ ސިވިލް އޭވިއޭޝަން އޮތޯރިޓީން ސްރީލަންކާގަ ރަޖިސްޓްރީކޮށްގެން އުދުހޭ މަރުކާގެ މަތިންދާބޯޓުތަކުގައި ހެވީ މެއިންޓެއިނެންސް ކުރުމުގެ ހުއްދަ، އެ ފަރާތުން އައިސް އިންސްޕެކްޓް ކުރުމަށްފަހު އެ ކުންފުނީގެ މެއިންޓެއިނެންސް ރިޕެއަރ އެންޑް އޯވަރހޯލް ފެސިލިޓީ އަށް ދިނުމާއި ގުޅިގެން ކަމަށް ވިލާ އެއަރ އިން ބުނެއެވެ.
ބަޔާނުގައި އިތުރަށް ބުނެފައިވަނީ މިއީ ރާއްޖޭގެ ވައިގެ ދަތުރުފަތުރު ފުޅާކުރުމަށް ހުޅުވުނު އިތުރު ފުރުޞަތެއް ކަމަށާއި ރާއްޖޭގެ ވައިގެ ދަތުރުފަތުރު ފުޅާކޮށް ތަރައްޤީކޮށް، އެކަމަށް ބޭނުންވާ މީހުން ތަމްރީނުކޮށް އެފަދަ ފެސިލިޓީތައް ރާއްޖޭގައި ޤާއިމުކުރުމަކީ އެ ކުންފުނީގެ ތަޞައްވަރުގެ ތެރެއިން މީގެ އެއް އަހަރު ކުރިން ކުރަމުން އައި މަސައްކަތެއް ކަމަށެވެ. އަދި އެ ކުންފުނީގެ ޢަމާޒަކީ ވިލާ އެއަރގެ މެއިންޓެއިނަންސް ރިޕެއަރ އެންޑް އޯވަރހޯލް ފެސިލިޓީ އަކީ އެ ޞަރަޙައްދުގަ އުދުހޭ އެފަދަ މަތިންދާ ބޯޓުތަކަށް ޚިދުމަތްދޭ ތަންތަނަށް ހަދައި، ދިވެހި އިންޖިނިއަރުންނަށް ފުރުޞަތު ފަހިކޮށްދިނުން ކަމަށް ވިލާ އެއަރ އިން ބުނެއެވެ.
ސްރީލަންކާ އިން ފުރައިގެން ވިލާ އެއަރޕޯޓް މާމިގިއްޔަށް އެ ބޯޓު އައުމަށް ބޭނުންވާ ހުއްދަ ދީ، އެކަމަށް ބޭނުންވާ އެންމެހާ ކަންތައްތައް ފަހިކޮށްދިން ކަމަށްޓަކައި ސިވިލް އޭވިއޭޝަން އޮތޯރިޓީ، ކަސްޓަމްސް އަދި އިމިގްރޭޝަނަށް ވިލާ އިން ވަނީ ޝުކުރު އަދާކޮށްފައެވެ.
