ޓްރަމްޕާ ބައްދަލު ކުރައްވަން ނަތަންޔާހޫ އެމެރިކާ އަށް ވަޑައިގަންނަވަނީ

ޣައްޒާ ހަނގުރާމަ ހުއްޓާލައި، ހަނގުރާމަ ހުއްޓާލުމުގެ އެއްބަސްވުން ތަންފީޒު ކުރުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވަމުން އަންނަ ދަނޑިވަޅެއްގައި، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެރިކާ އަށް ވަޑައިގަންނަވާ ގޮތަށް ހަމަޖެހިފައިވާ ކަމަށް މީޑިއާ ރިޕޯޓުތައް ބުނެފި އެވެ.

އެމެރިކާގެ އިސް އޮފިޝަލަކާ ހަވާލާދީ މީޑިއާ ތަކުގައި ބުނެފައި ވަނީ ޖުލައި މަހުގެ ހަތް ވަނަ ދުވަހު ނަތަންޔާހޫ އެމެރިކާ އަށް ވަޑައިގަންނަވާނެ ކަަމަށެވެ. އަދި އެމެރިކާގެ ރިޔާސީ ގަނޑުވަރު ވައިޓްހައުސްގައި ޓްރަމްޕާ ބައްދަލު ކުރައްވާނެ ކަމަށް ވެސް ވަނީ ބުނެފަ އެވެ.

ޣައްޒާ ހަނގުރާމަ ހުއްޓާލުމަށް ޓްރަމްޕް ގޮވާލައްވަމުން އަންނަ މި ދަނޑިވަޅުގައި ނަތަންޔާހޫ ކުރައްވާ މި ދަތުރުފުޅުގައި، އިސްރާއީލް އިން ޣައްޒާގައި ކުރިއަށް ގެންދަމުން އަންނަ ހަނގުރާމައާ ގުޅޭ ގޮތުން މަޝްވަރާ ކުރާނެ ކަމަށް ބެލެވެ އެވެ. އަދި ޓްރަމްޕްގެ ފަރާތުން، ހަނގުރާމަ ހުއްޓުވުމަށް ނަތަންޔާހޫ އަށް އިތުރަށް ބާރު އަޅުއްވާނެ ކަމަށް ވެސް މީޑިއާ ތަކުގައި ވަނީ ބުނެފަ އެވެ.

މިއީ ދެ ވަނަ ދައުރަކަށް އެމެރިކާގެ ރަައީސް ކަމުގެ މަޤާމަށް ޓްރަމްޕް ވަޑައިގެންނެވި ފަހުން، ނަތަންޔާހޫ އެމެރިކާ އަށް ވަޑައިގަންނަވާ ތިން ވަނަ ފަހަރެވެ. އެކަމާ ގުޅޭ ގޮތުން ވައިޓްހައުސްގެ ޕްރެސް ސެކްރެޓަރީ ކެރޮލިން ލެވިޓް ވިދާޅުވެފައި ވަނީ، ޓްރަމްޕްގެ އެންމެ އިސް އަމާޒަކީ ޣައްޒާ ހަނގުރާމަ ނިމުމަކަށް ގެނައުން ކަމަށެވެ.

މީގެ އިތުރުން ނަތަންޔާހޫ އެމެެރިކާ އަށް ވަޑައިގެންނެވުމުގެ ކުރިން، އިސްރާއީލްގެ ސްޓްރެޓެޖިޖް އެފެއާޒް މިނިސްޓަރު ރޮން ޑަމާ އެމެރިކާ އަށް ވަޑައިގެން، ނަތަންޔާހޫގެ ދަތުރުފުޅާ ގުޅޭ ކަންކަމާ މަޝްވަރާކޮށް، މަގު ފަހި ކުރާނެ ކަމަށް ވެސް ރިޕޯޓުތަކުގައި ވަނީ ބުނެފަ އެވެ.