ޚާމަނާއީ އަތުޖެހުނު ނަމަ އަވަހާރަކޮށްލީސް ކަމަށް އިސްރާއީލުން ބުނެފި

އިސްރާއީލާއި އީރާނުގެ މެދުގައި ހިނގި 12 ދުވަހުގެ ހަނގުރާމައިގައި، އީރާނުގެ އެންމެ މަތީ ވެރިޔާ އަލީ ޚާމަނާއީ އަތުޖެހޭ ހިސާބުގައި ހުންނެވި ނަމަ އަވަހާރަ ކޮށްލީސް ކަމަށް އިސްރާއީލުގެ ދިފާއީ ވަޒީރު އިސްރާއެލް ކަޓްޒް ބުރާސްފަތި ދުވަހު ވިދާޅުވެއްޖެއެވެ.

"އަޅުގަނޑަށް ލަފާ ކުރެވޭ ގޮތުގައި، ޚާމާނާއީ އަޅުގަނޑުމެންނަށް ފެންނަ ހިސާބުގައި ހުންނެވި ނަމަ، އަޅުގަނޑުމެން އޭނާ ނައްތާލާނެ" ކަމަށް ކަޓްޒް އިސްރާއީލުގެ ކަން ޕަބްލިކް ޓެލެވިޜަނަށް ދެއްވި އިންޓަވިއުއެއްގައި ވިދާޅުވިއެވެ.

"އެކަމަކު ޚާމަނާއީ އަށް މިކަން އެނގިވަޑައިގަތް. އެހެންވެ އޭނާ ހުންނެވީ ވަރަށް ފުން ބިންގަރާހެއްގައި" ކަޓްޒް ވިދާޅުވިއެވެ.

އިސްރާއީލުގެ ޑިފެންސް މިނިސްޓަރު އިތުރަށް ވިދާޅުވީ، ހަނގުރާމައިގެ ފުރަތަމަ ދުވަހު އަވަހަރާކޮށްލެވުނު އަސްކަރިއްޔާގެ އެންމެ އިސް ކޮމާންޑަރުންގެ ބަދަލުގައި އައްޔަނު ކުރެވުނު ކޮމާންޑަރުންނާއި ޚާމަނާއީ އެއްވެސް ވަރަކަށް މުއާސަލާތެއް ނުކުރައްވައެވެ.

"އެންމެ ފަހުން އެކަން ޙަޤީޤަތުގައި ކުރެވޭނެ ކަމަކަށް ނުވި،" އޭނާ ވިދާޅުވިއެވެ.

ހަނގުރާމަ ފެށުނު ޖޫން 13 ގައި އިސްރާއީލުން އީރާނުގެ އިސް ކޮމާންޑަރުންނާއި ގިނަ ނިއުކްލިއަރ ސައިންޓިސްޓުންތަކަކަށް ޓާގެޓް ކޮށް ހަމަލާ ދީފައިވެއެވެ.

ހަނގުރާމަ ހުއްޓާލުމަށް އެއްބަސްވުމަކަށް އައުމާ ހަމައަށް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އެމެރިކާގެ ރައީސް ޑޮނަލްޑް ޓްރަމްޕް ވަނީ ވައިގެ މަގުން ހިނގި މި ހަނގުރާމައިގެ ތެރޭގައި އެކި ވަގުތު ތަކުގައި، ޚާމަނާއީގެ ފުރާނައަށް ނުރައްކާ ވެދާނެ ކަމަށާއި ވެރިކަން ބަދަލުވެދާނެ ކަމަށް ވިދާޅުވެފައެވެ.