ދައުލަތުގެ މާލީ ހިސާބުތައް ދޮގާއި ނުލާ ރައްޔިތުންނަށް މި ވަގުތު އެބަ އެނގެން ޖެހޭ - މީކާއިލް

ދައުލަތުގެ މާލީ ހިސާބުތައް ދޮގާއި ނުލާ ރައްޔިތުންނަށް މި ވަގުތު އެބަ އެނގެން ޖެހޭ ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ވިދާޅުވެއްޖެއެވެ.

އޭނާ އެފަދައިން ވިދާޅުވީ ހަނގުރާމައިގެ ސަބަބުން ދިވެހިރާއްޖެއަށް ކުރިމަތި ވެދާނެ ދަތިތަކަށް ތައްޔާރުވުމުގެ ގޮތުން ކުރިޔާލާ ފިޔަވަޅުތައް އަޅާންވެއްޖެކަން ސަރުކާރުގެ ސަމާލުކަމަށް ގެނައުމަށް މަޖިލީހަށް އޭނާ ހުށަހެޅުއްވި ކުއްލި މައްސަލަ އަށް ބަހުސްކުރައްވަމުންނެވެ. މާލީ ހިސާބުތައް ހާމަ ނުކުރުމަކީ މި ވަގުތު ހެދޭނެ ގޯހެއް ކަމަށް އޭނާ ސިފަކުރެއްވިއެވެ.

Advertisement

" މިއީ ވަކި ޕާޓީ އަކަށް އޮތް ހާލަތެއް ނޫން. އަޅުގަނޑު ވަރަށް އުފާކުރަން މިއީ މުހިންމު ކަމެއް ކަމަށް ޤަބޫލުކޮށް މި މައްސަލަ ބަލައިގަތީތީ ވެސް. އެންމެ މުހިންމީ ތެދު ހެދުން. ރައްޔިތުންނަށް ތެދު ހެދުން." މީކާއިލް ވަނީ ވިދާޅުވެފައެވެ.

އެ މައްސަލަ ބަލައިގަނެފައި ވަނީ 45 މެމްބަރުންގެ ވޯޓާއި އެކުގައެވެ. އެ މައްސަލަ ބަލައިގަންނަން ނުފެންނަ ކަމަށް ވޯޓުދެއްވީ އެންމެ މެމްބަރެކެވެ.

މި ވަގުތު މަޖިލީހުގެ މަސްޢޫލިއްޔަތާއި ޒިންމާ ވަރަށް ބޮޑު ކަމަށް މީކާއިލް ވަނީ ވިދާޅުވެފައެވެ. ޑޮލަރުގެ ރިޒާވް ހުރި މިންވަރު މިވަގުތު މަޖިލީހަށް އެނގެން ޖެހޭ ކަމަށާއި ހަފްތާއަކުން ހަފްތާއަކުން ނަމަވެސް އެކަން މަޖިލީހުން މޮނިޓަރކުރަން ޖެހޭ ކަމަށް މީކާއިލް ވިދާޅުވިއެވެ.

ހަނގުރާމައިގެ ސަބަބުން ދިވެހިރާއްޖެއަށް ކުރިމަތި ވެދާނެ ދަތިތަކަށް ތައްޔާރުވުމުގެ ގޮތުން ކުރިޔާލާ ފިޔަވަޅުތައް އަޅަންވެއްޖެކަން ސަރުކާރުގެ ސަމާލުކަމަށް ގެނައުމަށް މަޖިލީހަށް ކުއްލި މައްސަލަ އެއް ހުށަހަޅާފައި ވަނީ އަންގާރަ ދުވަހުއެވެ.

އެ ޤަރާރުގައި ބުނެފައި ވަނީ އިސްރާއީލާއި އެމެރިކާއިން އީރާނަށް ދިން ހަމަލާތަކުގެ ރައްދުގައި އިރާނުން ހަމަލާތައް ދޭން ފަށާފައިވާ ކަމަށާއި މެދުއިރުމަތީގައި މިހާރު ހަނގުރާމައެއް ހިނގަމުންދާ ހިނދު އަދި އެ ހަނގުރާމަ އެ ސަރަހައްދުގެ އިތުރު ގައުމުތަކަށް ފެތުރިފައިވާ ކަަމަށެވެ. އަދި އެތަކެއް ދުވަސްތަކަކަށް ހަނގުރާމަ ދިގުދެމިގެން ދިއުމުގެ ފުރުސަތު އެބަ އޮތްކަން ފާހަގަކޮށްފައިވެއެވެ.

އެހެންކަމުން ދުރާލާ ރާއްޖެއިން ތައްޔާރުވެ ރައްޔިތުންނަށް ތެދު ހާމަކުރަން ޖެހޭ ކަމަށް މީކާއިލް ވިދާޅުވިއެވެ.