ޕީއެންސީގެ ޕީޖީގެ އިރުޝާދާއި ލަފާގެ މަތިން ފާސްކުރެވޭ ކޮމިޝަނަކަށް ނޫސްވެރިން ތަބާވާކަށް ނުޖެހޭ - މީކާއިލް

މީޑިއާތައް ކޮންޓްރޯލް ކުރާ ބިލުން އުފެދޭ މީޑިއާ ކޮމިޝަނަކީ އުފެދުމުގައިވެސް ބާތިލުވާނެ އެއްޗެއް ކަމަށާއި، ނޫސްވެރިން އެ ކޮމިޝަނަށް ތަބާވާން ނުޖެހޭނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ރާއްޖެޓީވީގެ ޓީވީޓޯކްގައި ވާހަކަ ދައްކަވަމުން މީކާއިލް ވިދާޅުވި ގޮތުގައި މި ކޮމިޝަން އުފެދުމުގައި ބާތިލުވާ މައިގަނޑު ދެ ސަބަބެއް އެބައޮތެވެ. އޭގެ ތެރޭގައި ކޮމިޝަން އުފެއްދުމުގެ ނިޔަތަކީ ނޫސްވެރިންގެ އަނގައިގައި ތަޅުއެޅުވުން ކަމަށާއި، ކޮމިޝަނާ ބެހޭ ބިލު ހުށަހެޅި މެންބަރު މިހާރު މަޖިލީހުގައި ނެތުން ހިމެނެއެވެ.

"ރައްޔިތުންގެ މަޖިލީހަށް މިހާރު ނެތްކަން ރައްޔިތުންނަށް ވަރަށް ސާފު. މަޖިލީހަށް މި ހުށަހަޅުއްވަނީ ވެސް ރައީސުލްޖުމްހޫރިއްޔާ ހުށަހެޅުއްވީމާ، ހަމަ އެމަނިކުފާނުގެ ފުލް ކޮންޓްރޯލް އޮންނަ ޕާލަމެންޓްރީ ގްރޫޕަކުން،" މީކާއިލް ވިދާޅުވިއެވެ.

މީކާއިލް ފާހަގަކުރެއްވި ގޮތުގައި މި ކޮމިޝަނަށް ނޫސްވެރިންގެ ޚިޔާލު ހޯދުމަށް ހުޅުވާލި ފުރުސަތަކީވެސް މުޅި ކަން ލެޖިޓިމައިޒް ކުރުމަށް ކުރެވޭ މަސައްކަތެކެވެ. މިކަން އިތުރަށް ސާބިތުކޮށްދިނުމަށް އެމަނިކުފާނު ވިދާޅުވީ ރައްޔިތުންގެ މަޖިލީހުން ފާސްކުރި އެހެން ބިލަކަށް ރައްޔިތުންގެ ޚިޔާލު ހޯދުމަށް ދިން ވަގުތަކީ އެންމެ ބައި ގަޑިއިރު ކަމަށެވެ.

"މީޑިއާއިން ހަތަރު ދުވަހު މި ދައްކަނީ ރައްޔިތުންގެ މަޖިލީހުގެ މެންބަރުންނާއި، އެ މެންބަރުންނާ ގުޅުންހުރި އެކިއެކި މަޞްލަޙަތުތަކުގެ ވާހަކަ. އެހެންވީމާ، އެ މެންބަރުންގެ އަތްމަތީގައި އޮވެގެން ނުވާނެ މި ބޭފުޅުން ރެގިއުލޭޓްކުރުމުގެ ބާރު،" މީކާއިލް ވިދާޅުވިއެވެ.

އެމަނިކުފާނު އިތުރަށް ފާހަގަކުރެއްވި ގޮތުގައި ދިވެހިރާއްޖޭގެ މިނިވަން ނޫސްވެރިކަމަކީ މިހާރުގެ މަޖިލިސް ރައީސްގެ ދައުރުގައި ތަޢާރަފުވި އެއްޗެއް ނޫނެވެ. މިއީ އެތައް ބައެއްގެ ބުރަ މަސައްކަތާއި ގުރުބާނީގެ ސަބަބުން ދިވެހި ރައްޔިތުންނަށް ލިބިފައިވާ ޙައްޤެކެވެ.