ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އަމިއްލަ ވިޔަފާރިތައް ފުނޑާލުމަށް މަސައްކަތް ކުރަނީ ވައްކަން ކުރަން ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވެއްޖެ އެވެ.

ރާއްޖެޓީވީގައި ވާހަކަދައްކަވަމުން މެންބަރު މީކާއީލް ވިދާޅުވީ މި ސަރުކާރުން އަމިއްލަ ވިޔަފާރީގެ ތެރެއަށް ވަދެ ފުޅާ ކުރަމުންދާ ކަމަށާއި، އަމިއްލަ ވިޔަފާރިތައް ފުނޑާލުމަށް ކުރެވެންހުރި ހުރިހާ މަސައްކަތެއް ކުރަމުންދާ ކަމަށެވެ.

އަމިއްލަ ވިޔަފާރި ފުނޑާލުމަށް މިސަރުކާރުން މަސައްކަތް ކުރަނީ ވައްކަން ކުރަންކަން ފާހަގަކުރައްވައި މެންބަރު މީކާއީލް ވިދާޅުވީ ޒަމާނުއްސުރެ ރާއްޖެއަށް ބޭސް އެތެރެ ކުރަމުންދިޔައީ އެސްޓީއޯއިން ކަމަށާއި، ބޭސް ގެނައުމަށް ވަކި ކުންފުޏެއް އުފެއްދީ ވައްކަން ކުރުމަށް ކަމަށެވެ. އަދި ސަރުކާރުން ތަފާތު ކުންފުނިތައް އުފައްދަމުން ދަނީ ވަރަށް ރޭވުންތެރިކަމާއެކު، ހީލަތްތެރިކަމާއެކު ވައްކަން ކުރަން ކަމަށް މެންބަރު މީކާއީލް ވިދާޅުވި އެވެ.

މެންބަރު މީކާއީލް ވިދާޅުވީ ކޮވިޑް-19ގައި ދުނިޔޭގެ ހުރިހާ ގައުމެއް ބަންދުވެފައިވާއިރު، ރާއްޖޭގެ ރައްޔިތުންނަށް ދަތިނުވާ މިންވަރަށް މިސަރުކާރުގައި ދަތިވެފައިވާ ކަމަށެވެ. އިގްތިސާދު ރަނގަޅު ކަމަށާއި، މިސަރުކާރުގެ ހާރިޖީ ސިޔާސަތު ވަރަށް ހަރުދަނާވެފައި، ގައުމުތަކާ ގާތްގުޅުމެއް އެބައޮތް ކަމަށް ސަރުކާރުގެ ބޭފުޅުން ވިދާޅުވާ ކަމަށެވެ. އެގައުމުތަކުން ރާއްޖެއަށް އެހީތެރިކަން ފޯރުކޮށްދޭ ކަމަށާއި، އެއްވެސް ދައްޗެއް ކުރިމަތިނުވާ ކަމުގެ ޔަގީންކަން ސަރުކާރުގެ ބޭފުޅުން ދެއްވާ ކަމަށް މެންބަރު މީކާއީލް ވިދާޅުވި އެވެ.

ނަމަވެސް ރައްޔިތުންނަށް ދަތިވެ ދިރިއުޅުން އުދަނގޫވެފައިވާ ކަމަށާއި، ގައުމުގެ ކަންކަން މެނޭޖްނުކުރެވުމުން ސުވާލު އުފެދޭ ކަމަށް މެންބަރު މީކާއީލް ވިދާޅުވި އެވެ.