ނޫނޭޒް ހޯދުމަށް ނަޕޯލީ އިން މަސައްކަތް ކުރަނީ

ލިވަޕޫލަށް ކުޅެމުން އަންނަ އުރުގުއޭގެ ޑާވިން ނޫނޭޒް ހޯދުމަށް، އިޓަލީގެ ނަޕޯލީ އިން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ބެންފީކާ ދޫކޮށްލުމަށް ފަހު ނޫނޭޒް ލިވަޕޫލް އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުން އައު ކުރުމުގެ ބަދަލުގައި، ނޫނޭޒް ބޭނުން ވަނީ ކުލަބު ދޫކޮށްލަން ކަމަށް ވަނީ ރިޕޯޓު ކޮށްފަ އެވެ.

މީޑިއާ ތަކުގައި ބުނެފައިވާ ގޮތުން ނޫނޭޒް ހޯދުމުގެ ޝައުޤުވެރިކަން ނަޕޯލީ އިން ވަނީ ފާޅު ކޮށްފަ އެވެ. އަދި އޭނާ ހޯދުމުގެ މަޝްވަރާތައް އެ ކުލަބުން ކުރަމުން އަންނަ ކަމަށް ވެސް ބުނެފައިވެ އެވެ. އެގޮތުން ނަޕޯލީ އިން ބޭނުންވާ ކުޅުންތެރިންގެ ލިސްޓުގެ ކުރީގައި އޭނާގެ ނަން އޮތް ކަމަށް ވެސް ބުނެފައިވެ އެވެ.

މީގެ އިތުރުން، ނޫނޭޒް ހޯދުމުގެ މަޝްވަރާތައް ނަޕޯލީ އިން އަންނަނީ ނޫނޭޒް އާއެކު ކުރަމުންނެވެ. އަދި އެކަމާ ގުޅުން ހުރި އިތުރު މަޝްވަރާތަކެއް މި ހަފުތާގެ ތެރޭގައި ކުރުމަށް ވެސް ޝެޑިއުލް ކޮށްފައިވާ ކަމަށް ބުނެފައިވެ އެވެ.

ނަޕޯލީގެ އިތުރުން ބައެއް އެހެން ކުލަބުތަކުން ވެސް އޮތީ ނޫނޭޒް ގެންނަން ބޭނުންވެފަ އެވެ. އެގޮތުން ސައުދީ ޕްރޯ ލީގުގެ ބައެއް ކުލަބު ތަކުން ނޫނޭޒް ހޯދުމުގެ ޝައުޤުވެރިކަން ފާޅުކޮށް، އޭނާ އަށް ހުށަހެޅުމެއް ވެސް ދީފައިވާ ކަމަށް ބުނެފައިވެ އެވެ. އޭގެ އިތުރުން ޔޫރަޕުގެ ބައެއް ކުލަބުތަކުން ވެސް އޭނާ ހޯދަން ބޭނުންވާ ކަމަށް ބުނެފައިވެ އެވެ.

ނޫނޭޒް ވަނީ ލިވަޕޫލާ އެކު މިހާތަނަށް ތިން ސީޒަން ހޭދަކޮށްފަ އެވެ. މި މުއްދަތުގެ ތެރޭގައި އޭނާ ވަނީ ލިވަޕޫލަށް ކުޅެދިން 143 މެޗުގައި 40 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ދެ ތައްޓެއް ވެސް ކާމިޔާބު ކޮށްފަ އެވެ. އެއީ އިނގިރޭސި ޕްރިމިއާ ލީގު އަދި އެފްއޭ ކޮމިއުނިޓީ ޝީލްޑް އެވެ.

މީގެ އިތުރުން ނޫނޭޒް އަންނަނީ އުރުގުއޭގެ ޤައުމީ ޓީމަށް ވެސް ކުޅެމުންނެވެ. ޤައުމީ ޓީމަށް ކުޅެދިން 35 މެޗުގައި އޭނާ ވަނީ 13 ލަނޑު ޖަހައިފަ އެވެ.