އައިލެންޑް އޭވިއޭޝަން އަށް 2.28 މިލިއަން ރުފިޔާގެ ގެއްލުން ވެއްޖެ
14 ޖޫން 2025 | ހޮނިހިރު 11:51ކުންފުނީގެ ފައިދާ އާ އާމްދަނީ ދަށަށް ގޮސްފައިވާއިރު 2023 ވަނަ އަހަރާ އަޅާ ބަލާއިރު މުވައްޒަފުންގެ ޚަރަދުތަކަށް 2024 ވަނަ އަހަރު 34.7 މިލިއަން ރުފިޔާ އިތުރަށް ޚަރަދު ކޮށްފައިވޭ.
މޯލްޑިވިއަންގެ ފްލީޓަށް 5 ވަނަ އޭޓީއާރު ބޯޓަށް މަރުހަބާ ކިޔުން
އައިލެންޑް އޭވިއޭޝަން ސާވިސަސް ލިމިޓެޑު (އައިއޭއެސް) އަށް 2024 ވަނަ އަހަރު 2.28 މިލިއަން ރުފިޔާގެ ގެއްލުން ވެފައިވާ ކަމަށް އޮޑިޓަރ ޖެނެރަލް އޮފީހުން ބުނެފިއެވެ.
ރާއްޖޭގެ ގައުމީ އެއާލައިން އޮޕަރޭޓުކުރާ އައިއޭއެސް އަށް 2024 ވަނަ އަހަރު އާމްދަނީގެ ގޮތުގައި ލިބިފައިވަނީ 2.27 ބިލިއަން ރުފިޔާ އެވެ.
ކުންފުންޏަށް އެންމެ ބޮޑު އާމްދަނީ އެއް ލިބިފައިވަނީ އެތެރޭގެ އުދުހުންތަކުން ކަމަށް ވެސް އޮޑިޓް ރިޕޯޓުގައި ވެއެވެ. އެ ގޮތުން ފަސިންޖަރުންގެ އަތުން އާމްދަނީގެ ގޮތުގައި 1.3 ބިލިއަން ރުފިޔާ 2024 ވަނަ އަހަރު ލިބިފައިވެއެވެ. އެހެން ނަމަވެސް އެއީ ހުސްވި އަހަރާ އަޅާ ބަލާއިރު 4.6 މިލިއަން ރުފިޔާގެ ދަށްވުމެކެވެ.
އައިއޭއެސް އަށް 2024 ވަނަ އަހަރު ލިބުނު އާމްދަނީ ވެސް އޭގެ ކުރީ އަހަރާ އަޅާ ބަލާއިރު 44 މިލިއަން ދަށްވެފައިވާކަން އޮޑިޓް ރިޕޯޓުގެ ކުންފުނީގެ މާލީ ހާލަތު އަންގައިދޭ ބަޔާނުން ފާހަގަ ކުރެވެއެވެ.
ކުންފުނީގެ ފައިދާ އާ އާމްދަނީ ދަށަށް ގޮސްފައިވާއިރު 2023 ވަނަ އަހަރާ އަޅާ ބަލާއިރު މުވައްޒަފުންގެ ޚަރަދުތަކަށް 2024 ވަނަ އަހަރު 34.7 މިލިއަން ރުފިޔާ އިތުރަށް ޚަރަދު ކޮށްފައިވެއެވެ.
ރިޕޯޓުގައި ފާހަގަ ކޮށްފައިވާ ގޮތުގައި ސަރުކާރުގެ އެކި އިދާރާތަކުން އައިއޭއެސް އަށް ދަށްކަން ޖެހޭ 229.4 މިލިއަނަށް ވުރެ ގިނަ އަދަދެއްގެ ފައިސާ ވަނީ ނުލިބިއެވެ. މި ގޮތުން ހުސްވި އަހަރު ނިމުނުއިރު އާސަންދައިން 99.2 މިލިއަން ރުފިޔާ އާއި ރީޖަނަލް އެއަރޕޯޓްސް އިން 14.7 މިލިއަން ރުފިޔާ އާއި ފެނަކައިން 11 މިލިއަން ރުފިޔާ އާއި ޕަބްލިކް ސާވިސް މީޑިއާ އިން 3.5 މިލިއަން ރުފިޔާ ނުދައްކާ އޮތްކަން ފާހަގަ ކުރެވެއެވެ.
އޮޑިޓަރ ޖެނެރަލް ހުސެއިން ނިޔާޒީ ސޮއި ކުރައްވާ ނެރެފައިވާ ރިޕޯޓުގައި ބުނެފައިވާ ގޮތުގައި 2023 ވަނަ އަހަރުވެސް ކުންފުންޏަށް ވަނީ ބޮޑު ގެއްލުމެއް ވެފައެވެ. އެގޮތުން އެ އަހަރު އެ ކުންފުންޏަށް 71.4 މިލިއަން ރުފިޔާގެ ގެއްލުން ވަނީ ވެފައެވެ.
އައިލެންޑް އޭވިއޭޝަން ސަރވިސަސް ލިމިޓެޑް އަކީ 2000 ވަނަ އަހަރުގެ އޭޕްރީލް މަހުގެ 13 ވަނަ ދުވަހު ރައީސުލްޖުމްހޫރިއްޔާގެ ޤަރާރަކުން އުފައްދާފައިވާ ކުންފުންޏެކެވެ.
ކުންފުނިން މައިގަނޑު ގޮތެއްގައި އާމްދަނީ ހޯދަނީ ފަސިންޖަރުންނާއި މުދާ އުފުލުމުންނާއި، އެކްސެސް ލަގެޖް ފީ އާއި އެއަރޕޯޓް ޓަރމިނަލްގެ ޚިދުމަތްތަކާއި، އިންޖިނިއަރިންގ ޚިދުމަތްތައް ދީގެންނާއި، އެއަރ ޗާޓަރ އަދި ގުޅުންހުރި ޙަރަކާތްތަކުންނެވެ.
