އާރމޭނިއާގައި ކުރިއަށް ދަމުން އަންނަ، އާރމޭނިއަން ޔޫތު އޯޕަން 2025 ގައި ވާދަކުރަމުން އަންނަ ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) މުބާރާތުގެ ތިން އިވެންޓުން ވެސް ރަން މެޑަލް ހޯދައިފި އެވެ.

އާރމޭނިއާގެ ވެރި ރަށް ޔެރަވަންގައި މި މުބާރާތް ކުރިއަށް ދާއިރު، މުބާރާތުގައި ޖުމުލަ 92 ޤައުމަށް ވުރެ ގިނަ ޤައުމުގެ ކުޅުންތެރިން ވާދަކުރެ އެވެ. މި މުބާރާތަކީ އުމުރުން 13 އަހަރާއި 15 އަހަރާ ދެމެދުގެ ކުޅުންތެރިންނަށް ޚާއްސަކޮށްގެން ބާއްވާ މުބާރާތެކެވެ.

ބައިނަލްއަޤުވާމީ މުބާރާތްތަކުގައި މީގެ ކުރިން ވެސް ވާދަކޮށް ރަނގަޅު ކާމިޔާބީތަކެއް ހޯދާފައިވާ ލައިބާ، މި މުބާރާތުގެ ތިން އިވެންޓެއްގައި ވާދަކުރެ އެވެ. އެއީ 13 އަހަރުން ދަށުގެ ސިންގަލްސް އިވެންޓުގެ އިތުރުން، 13 އަހަރުން ދަށުގެ ޑަބަލްސް އިވެންޓު އަދި 13 އަހަރުން ދަށުގެ މިކްސް ޑަބަލްސް އިވެންޓުގަ އެވެ.

މުބާރާތުގެ ސިންގަލްސް، ޑަބަލްސް އަދި މިކްސް ޑަބަލްސް އިވެންޓުގެ ފައިނަލްގައި ލައިބާ ވަނީ ވާދަކޮށް، މޮޅުވެފަ އެވެ. މިއީ ޒުވާން އުމުރުފުރައިގެ ކުޅުންތެރިޔަކު ބައިނަލްއަޤުވާމީ މުބާރާތުން ހޯދި ފުރަތަމަ މެޑައްޔެވެ.

މުބާރާތުގެ ސިންގަލްސް އިވެންޓުގެ ފައިނަލްގައި ލައިބާ ވާދަކޮށްފައި ވަނީ ޖޯޖިއާގެ އެއް ވަނަ ކުޅުންތެރިޔާ ޝަހްބަޒްޔާން ސީދާ ދެ ސެޓުން ބަލިކޮށްފަ އެވެ. އެއީ 21-15 އަދި 21-11 އިންނެވެ.

މުބާރާތުގެ މިކްސް ޑަބަލްސްގައި ލައިބާ އަދި އެރިކް މޮޅުވެފައި ވަނީ ވެސް ސީދާ ދެ ސެޓުންނެވެ. އަދި ޑަބަލްސް އިވެންޓުގައި ލައިބާ އަދި އެމެލިއާ މޮޅުވެފައި ވަނީ ވެސް ސީދާ ދެ ސެޓުންނެވެ.

ލައިބާ އަންނަނީ ރާއްޖޭގައި އޮންނަ ބެޑްމިންޓަން މުބާރާތްތަކުގެ އިތުރުން، ބައިނަލްއަޤުވާމީ ބެޑްމިންޓަން މުބާރާތްތަކުގައި ވާދަކޮށް ރަނގަޅު ކާމިޔާބީތަކެއް ހޯދަމުންނެވެ. އެގޮތުން ބެޑްމިންޓަން ޔޫރަޕު ކަލަންޑަރުގައި ހިމެނޭ މުބާރާތްތަކުގައި ވާދަކޮށް ލައިބާ ވަނީ މިހާތަނަށް 23 މެޑަލް ހޯދައިފަ އެވެ. އެއީ ތިން ރަން މެޑަލް އަދި ފަސް ރިހި މެޑަލްގެ އިތުރުން، 15 ލޯ މެޑަލް އެވެ.

މޯލްޑިވްސް ސްޕޯޓްސް އެވޯޑްސްގެ މިދިޔަ އަހަރުގެ ޔަންގް އެތުލީޓު އޮފް ދަ އިޔަރގެ ތިން ވަނަ ލައިބާ ވަނީ ހޯދައިފަ އެވެ.