އިނގިރޭސި ޕްރިމިއާ ލީގު: ޔުނައިޓެޑުން ތާވަލުގެ ކުރީގައި ހަމަޖެހިލައިފި

އިނގިރޭސި ޕްރިމިއާ ލީގުގައި ލެސްޓާ ސިޓީގެ މައްޗަށް ކާމިޔާބު ހޯދައި މެންޗެސްޓާ ޔުނައިޓެޑުން ޕޮއިންޓް ތާވަލުގެ އެއްވަނައިގައި ހަމަޖެހިލައިފިއެވެ.

ހޮނިހިރު ދުވަހުގެ ރޭ އަމިއްލަ ދަނޑުގައި ކުޅުނު މެޗު ޔުނައިޓެޑުން ކާމިޔާބުކޮށްފައި ވަނީ 2-0 ގެ ނަތީޖާއަކުންނެވެ.

މެޗު ފެށިގެން ރަނގަޅަށް ކުޅެމުން އައީ ޔުނައިޓެޑުންނެވެ. އެ ޓީމުން ވަނީ ލަނޑު ޖަހާނެ ރަނގަޅު ފުރުސަތުތަކެއް ފުރަތަމަ ހާފުގައި ހޯދާފައެވެ. އެހެން ނަމަވެސް ކައުންޓާ އެޓޭކުގައި ލެސްޓާއިން ވަނީ ޔުނައިޓެޑުގެ ގޯލަށް ނުރައްކާ ކޮށްފައެވެ. ފުރަތަމަ ހާފު ނިމިގެން ދިޔައީ 0-0 ގެ ނަތީޖާ އަކުން ދެ ޓީމު އެއްވަރުވެގެންނެވެ.

ދެވަނަ ހާފުގެ އަށް ވަނަ މިނެޓުގައި ލެސްޓާގެ އޭރިއާ ތެރެއިން އެ ޓީމުގެ ސިމްޕްސަންގެ އަތުގައި ބޯޅަ ޖެހުމުން ރެފްރީވަނީ ޔުނައިޓެޑަށް ޕެނަލްޓީއެއް ދީފައެވެ. އެހެން ނަމަވެސް އެ ޓީމާއި އަލަށް ގުޅުނު ފޯވާޑް ރޮމެލޫ ލުކާކޫ ޖެހި ޕެނަލްޓީ ލެސްޓާގެ ކީޕަރު ކެސްޕާ ޝުމައިކަލް ވަނީ ދިފާއު ކޮށްފައެވެ.

މެޗުގެ 70 ވަނަ މިނެޓުގައި ޔުނައިޓެޑަށް ލީޑު ނަގައިދިނީ ބެންޗުން ކުޅެން އެރި ޒުވާން ފޯވާޑް މާކަސް ރަޝްފޯޑެވެ. އެ ޓީމުގެ ދެވަނަ ލަނޑު މެޗުގެ 82 ވަނަ މިނެޓުގައި ކާމިޔާބު ކޮށްދިނީ ހަމަ ބެންޗުން ކުޅެން އެރި މިޑްފީލްޑާ ފެލައީނީއެވެ.

ހޮނިހިރު ދުވަހު ޕްރިމިއާ ލީގުގައި ކުޅުނު ގިނަ މެޗުތަކެއް ވަނީ ކުޅެވިފައެވެ. އެގޮތުން ސްވަންސީ ސިޓީއިން ވަނީ 2-0 އަކުން ކްރިސްޓަލް ޕެލަސް ބަލި ކޮށްފައެވެ. ނިއުކާސަލް ޔުނައިޓެޑުން ވަނީ އަމިއްލަ ދަނޑުގައި 3-0 ގެ ނަތީޖާއަކުން ވެސްޓް ހާމް ބަލި ކޮށްފައެވެ. އަލަށް ޕްރޮމޯޓްވި ހަޑާސްފީލްޑްއާ ސައުތްހެމްޕްޓަން ވާދަކުރި މެޗު ނިމުނީ 0-0 އަކުން އެއްވަރު ވެގެންނެވެ. ހަމަ އެހެންމެ ވޮޓްފޯޑާއި ބްރައިޓަން ވާދަކުރި މެޗުވެސް ނިމުނީ 0-0 އަކުން އެއްވަރު ވެގެންނެވެ.

މި މޮޅާއި އެކު ޔުނައިޓެޑު އޮތީ ކުޅުނު ތިން މެޗުން ލިބުނު 9 ޕޮއިންޓާއެކު ތާވަލުގެ އެއްވަނައިގައެވެ. ޔުނައިޓެޑުގެ ފަހަތުން ދެވަނައިގައި ހަތް ޕޮއިންޓާއިއެކު އޮތީ ހަޑާސްފީލްޑް ޓައުންއެވެ.