ޙައްޖުގެ އަޅުކަމުގެ ދުވަސްތަކުގައި މައްކާގެ މުޤައްދަސް ސަރަޙައްދުތަކުގައި ފޮޓޯ ނެގުމާއި، ސިޔާސީ އަދި މަޒްހަބީ ދިދަ ނެގުން މަނާކުރުމަށް ސަޢޫދީ އަރަބިއްޔާގެ މިނިސްޓްރީ އޮފް އިންޓީރިއަރ އިން މަނާކޮށްފި އެވެ.

އެ މިނިސްޓްރީން ނެރުނު ބަޔާނެއްގައި ބުނެފައިވާ ގޮތުގައި މަސްޖިދުލް ޙަރާމް، މަސްޖިދުއް ނަބަވީ އަދި މިނާ، އަރަފާތް އަދި މުޒްދަލިފާގެ ސަރަޙައްދުތަކުގައި މޯބައިލް ފޯނުން ނުވަތަ ޕްރޮފެޝަނަލް ކެމެރާ ބޭނުންކޮށްގެން ފޮޓޯ ނުވަތަ ވީޑިއޯ ނެގުން ވަނީ މަނާކޮށްފަ އެވެ.

މީގެ އިތުރުން، ސިޔާސީ، މަޒްހަބީ ނުވަތަ ޤައުމީ ދިދަތަކާއި ބެނަރތައް ދެއްކުމާއި، ސިޔާސީ ޝިޢާރުތައް ފާޅުކުރުމާއި، ގްރޫޕްތަކުގެ ގޮތުގައި އެއްވެސް ބާވަތެއްގެ ޙަރަކާތެއް ހިންގުން ވެސް ވަނީ މަނާކޮށްފަ އެވެ.

އެ މިނިސްޓްރީން ނެރުނު ބަޔާނުގައި ބުނެފައި ވަނީ ޙައްޖުގެ އަޅުކަމުގެ ދުވަސްތަކުގައި މިފަދަ ޢަމަލުތަކުގެ ސަބަބުން ރޫޙާނީ މާޙައުލަށް ހުރަސްއެޅި، ދުނިޔޭގެ އެކި ކަންކޮޅުތަކުން އެއްވާ ޙާޖީންގެ މެދުގައި ބައިބައިވުން އުފެދުމުގެ ފުރުޞަތު ބޮޑުވެގެންދާ ކަމަށެވެ.

މި ޤަވާޢިދުތައް ތަންފީޒުކުރުމަށް ޙައްޖު މޫސުމުގައި ސެކިއުރިޓީ އޮފިޝަލުން ބޭތިއްބޭނެ ކަމަށާއި ޤަވާޢިދާ ޚިލާފުވާ ފަރާތްތައް މުޤައްދަސް ސަރަޙައްދުތަކުން ބޭރުކުރުމާއި، އެ ފަދަ އަމަލުތައް ހިންގާ ފަރާތްތަކާއި މެދު ޤާނޫނީ ފިޔަވަޅު އެޅުމާއި، އަދި ޑިޕޯޓްކުރުން ފަދަ އަދަބުތައް ވަނީ ކަނޑައެޅިފައެވެ.

މިނިސްޓްރީން އިތުރަށް ފާހަގަކުރި ގޮތުގައި ޙައްޖަކީ އަޅުކަމާއި، ތަވާޟުޢުވެރިކަމާއި، އެއްބައިވަންތަކަމުގެ ވަގުތެކެވެ. އެހެން ކަމުން މި މަޤްޞަދާ ޚިލާފު އެއްވެސް ޢަމަލަކަށް ފުރުޞަތެއް ނުދެވޭނެކަމަށް ބަޔާނުގައި ބުނެފައިވެއެވެ.

އެހެން ކަމުން މިވަގުތު ޙައްޖުގެ އަޅުކަމުގައި އުޅޭ ޙާޖީންނަށް މިނިސްޓްރީގެ މި ޤަވާޢިދުތަކަށް ޙުރުމަތްތެރިކޮށް ހިތައި މި އަހަރުގެ ޙައްޖު ގެ އަޅުކަން އަމާންކަމާއި އެކު ކުރިއަށް ގެންދިއުމަށާއި އަދި ރޫޙާނީ ގޮތުންނާއި އެހެނިހެން ގޮތްގޮތުން ވެސް ޙައްޖުގެ އަޅުކަން ފުރިހަމަ ގޮތެއްގައި ކުރިއަށް ގެންދިއުމަށް އެހީތެރިވުމަށް ސަޢޫދީ އަރަބިއްޔާގެ މިނިސްޓްރީ އޮފް އިންޓީރިއަރ އިން ވަނީ އިލްތިމާސްކޮށްފައެވެ.