އެމްއޯސީގެ ރައީސަަކަށް ސައްތާރު އިންތިޚާބު ކޮށްފި

މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ ރައީސް ކަމުގެ މަޤާމަށް، މިހާރު ވެސް އެ މަގާމުގައި ހުންނެވި މުޙައްމަދު ޢަބްދުއް ސައްތާރު (ޗަމްޕީ) އިންތިޚާބު ކޮށްފި އެވެ.

ހޯމަ ދުވަހު ކުރިއަށް ދިޔަ އެމްއޯސީގެ އިންތިޚާބުގައި ރައީސް ކަމުގެ މަޤާމަށް ކުރިމަތިލެއްވީ ވެސް ސައްތާރު އެކަންޏެވެ. އެހެންވެ، ސްވިމިންގ އެސޯސިއޭޝަން އޮފް މޯލްޑިވްސް ގެ ރައީސްކަން ވެސް ކުރައްވަމުން ގެންދަވާ ސައްތާރަށް އޮތީ ދެ ވަނަ ދައުރެއް ކަށަވަރުވެފަ އެވެ.

ސްވިމިންގ އެސޯސިއޭޝަންގެ ރައީސްކަމުގައި މިހާރު ހަތަރު ވަނަ ދައުރެއް ފުރުއްވަމުން ގެންދަވާ ސައްތާރު، އެމްއޯސީގެ ރައީސް ކަމަށް އެންމެ ފުރަތަމަ އިންތިޚާބުވެފައި ވަނީ 2021 ވަނަ އަހަރު އެވެ. އެ ފަހަރުގެ އިންތިޚާބުގައި ސައްތާރުއާ ވާދަކުރާނެ ކެންޑިޑޭޓަކު ހުރި ނަމަވެސް، މިފަހަރުގެ އިންތިޚާބުގައި ސައްތާރުއާ ވާދަކުރާނެ އެހެން ކެންޑިޑޭޓަކު ނެތެވެ.

ހޯމަ ދުވަހު އިންތިޚާބު ކުރި އެމްއޯސީގެ އައު ހިންގާ ކޮމެޓީގެ ދައުުރަކީ 2025 ވަނަ އަހަރުން ފެށިގެން 2029 ވަނަ އަހަރަށެވެ.

އައު ދައުރުގެ ނައިބު ރައީސުންނަށް އިންތިޚާބު ކޮށްފައި ވަނީ، މިހާރު ވެސް އެމްއޯސީގެ ނައިބު ރައީސުންގެ ގޮތުގައި ތިއްބެވި ހޭންޑްބޯޅަ އެސޯސިއޭޝަން އިން ހުށަހަޅާފައިވާ އަޙުމަދު އިސްމާއީލްގެ އިތުރުން، ޗެސް އެސޯސިއޭޝަން އިން ހުށަހަޅާފައިވާ އަޙުމަދު މުންތަގިމް އެވެ.

އިންތިޚާބުގައި ދެން ނައިބު ރައީސް ކަމަށް ވާދަކުރެއްވީ މުސްޠަފާ މުޙައްމަދު އެވެ. ނައިބު ރައީސް ކަމުގެ މަޤާމަށް އޭނާގެ ނަން ހުށަހަޅާފައި ވަނީ އެތުލެޓިކްސް އެސޯސިއޭޝަން އިންނެވެ. މުސްޠަފާ އަކީ އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސް އެވެ.

އެމްއޯސީގެ ހިންގާ ކޮމެޓީގައި ތިބެނީ ޖުމުލަ 14 މެމްބަރުންނެވެ. އެއީ ރައީސާގައި، ދެ ނައިބު ރައީސުންގެ އިތުރުން، އޮލިމްޕިކް ސްޕޯޓްސް އިން ހަ މެމްބަރުން، ނޮން އޮލިމްޕިކް ސްޕޯޓްސް އިން ދެ މެމްބަރުން، އަންހެން ދެ މެމްބަރުން އަދި އެތުލީޓްސް ކޮމިޝަން ތަމްސީލު ކުރުމަށް މެމްބަރެކެވެ.

ކުރިއަށް އޮތް ދައުރަށް އޮލިމްޕިކް ސްޕޯޓްސްގެ ހަ ގޮނޑި އަށް އިންތިޚާބުވެފައި ވަނީ، ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)، ޓޭބަލް ޓެނިސް އެސޯސިއޭޝަން، މޯލްޑިވްސް ބާސްކެޓު ބޯޅަ އެސޯސިއޭޝަން، ކްރިކެޓް ބޯޑު އޮފް މޯލްޑިވްސް، ޓެނިސް އެސޯސިއޭޝަން އޮފް މޯލްޑިވްސް، އަދި މޯލްޑިވްސް ސާފިންގ އެސޯސިއޭޝަން އެވެ.

މީގެ އިތުރުން ނޮން އޮލިމްޕިކް ސްޕޯޓްސްގެ ގޮނޑިތައް ކާމިޔާބު ކުރީ މޯލްޑިވްސް ޕޫލް ބިލިއާޑް އެސޯސިއޭޝަންގެ އިތުރުން ބޮޑީ ބިލްޑިންގ އެސޯސިއޭޝަން އޮފް މޯލްޑިވްސް އެވެ. އަދި އަންހެން ދެ މެމްބަރުންގެ ގޮނޑި ކާމިޔާބު ކުރީ ނެޓުބޯޅަ އެސޯސިއޭޝަން އޮފް މޯލްޑިވްސް އަދި ޝޫޓިންގ އެސޯސިއޭޝަން އޮފް މޯލްޑިވްސް އެވެ.