ޑި ބްރޭނާ ހޯދުމަށް ނަޕޯލީ އިން މަސައްކަތް ކުރަނީ

މި ސީޒަނަށް ފަހު މެންޗެސްޓަރ ސިޓީ ދޫކޮށްލަން ނިންމާފައިވާ، ބެލްޖިއަމްގެ ކެވިން ޑި ބްރޭނާ ހޯދުމުގެ މަސައްކަތް، އިޓަލީގެ ޗެމްޕިއަން ނަޕޯލީ އިން ފަށައިފި އެވެ.

އުމުރުން 33 އަހަރުގެ ޑި ބްރޭނާ ސިޓީ އާއެކު ސޮއި ކޮށްފައިވާ އެއްބަސްވުމުގެ މުއްދަތު ހަމަވާން އޮތީ މި ސީޒަންގެ ނިޔަލަށެވެ. އެއްބަސްވުން އައު ކުރުމުގެ ބަދަލުގައި އޭނާ ނިންމީ، އެއްބަސްވުން ހަމަވުމުން ސިޓީ ދޫކޮށްލުމަށެވެ. އިނގިރޭސި ޕްރިމިއާ ލީގުގައި ސިޓީ އިން އާދިއްތަ ދުވަހުގެ ރޭ ފުލަމްއާ ދެކޮޅަށް ކުޅުނު މެޗަކީ އެ ޓީމުގައި އޭނާގެ ފަހު މެޗެވެ.

މީޑިއާ ތަކުގައި ބުނެފައިވާ ގޮތުން ޑި ބްރޭނާ ހޯދުމުގެ މަސައްކަތް ނަޕޯލީ އިން އަންނަނީ ކުރަމުންނެވެ. އެގޮތުން އޭނާ ހޯދުމާ ގާތަށް ވެސް އެ ކުލަބުން ޖެހިލާފައިވާ ކަމަށް ބައެއް މީޑިއާ ތަކުގައި ބުނެފައިވެ އެވެ.

ޑި ބްރޭނާ ހޯދުމުގެ ޝައުޤުވެރިކަން ނަޕޯލީ އިން ގެން ގުޅެމުން އަންނަ ކަމަށް އެ ކުލަބުގެ ރައީސް އައުރެލިއޯ ޑީ ލައުރެންޓިސް ވެސް ވަނީ ވިދާޅުވެފަ އެވެ. އޭނާ ވިދާޅުވެފައި ވަނީ ނަޕޯލީ އިން ޑި ބްރޭނާ ބޭނުންވާ ކަމަށާއި، ޑި ބްރޭނާގެ ސޮއި ހޯދުމަށް ވެސް ބޭނުންވާ ކަމަށެވެ. އަދި އެކަން ހަގީގަތަށް ހެދުމަށް ބޭނުން ވަނީ ޑި ބްރޭނާގެ ރުހުން ކަމަށް ވެސް އޭނާ ވިދާޅުވި އެވެ.

ވުލްވްސްބާގް ދޫކޮށްލުމަށް ފަހު ޑި ބްރޭނާ ސިޓީ އަށް ބަދަލުވީ 2015 ވަނަ އަހަރު އެވެ. އެ ކުލަބާ އެކު ހޭދަ ކުރި 10 އަހަރުގެ ތެރޭގައި ޑި ބްރޭނާ ވަނީ އެ ކުލަބަށް ކުޅެދިން 422 މެޗުގައި 108 ލަނޑު ޖަހައިފަ އެވެ.

މީގެ އިތުރުން ސިޓީ އާއެކު އޭނާ ވަނީ 19 ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު ހަ ފަހަރު ކާމިޔާބު ކުރުން، އިނގިރޭސި އެފްއޭ ކަޕް ދެ ފަހަރު، ކަރަބޯ ކަޕް ފަސް ފަހަރު، އެފްއޭ ކޮމިއުނިޓީ ޝީލްޑް ތިން ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕަ ކަޕް އެއް ފަހަރު އަދި ފީފާ ކުލަބު ވޯލްޑް ކަޕް އެއް ފަހަރު ކާމިޔާބު ކުރުން ހިމެނެ އެވެ.

ޑި ބްރޭނާ އަކީ ސިޓީގައި ތިބި ކުޅުންތެރިންގެ ތެރެއިން އެ ޓީމުގައި އެންމެ މުހިންމު ދައުރެއް އަދާ ކުރި އެއްް ކުޅުންތެރިޔާ އެވެ. ޚާއްސަކޮށް ސިޓީގެ މެދު ތެރޭގައި އޭނާ ވަނީ މުހިންމު ދައުރެއް އަދާ ކޮށްފަ އެވެ.