ދިވެހި ރާއްޖޭގެ ކުޅިވަރުގެ ޤާނޫނަށް އެއް ވަނަ އިސްލާހު ގެނައުމުގެ ބިލު ތަސްދީޤު ކޮށްފައިވާއިރު، އެ ޤާނޫނުގެ އެންމެ ބޮޑު މަޤުސަދަކީ ކުޅިވަރު ލާމަރުކަޒު ކުރުން ކަމަށް، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

އެ ޤާނޫނާ ގުޅޭ ގޮތުން ވާހަކަ ދައްކަވަމުން ވަޒީރު ވިދާޅުވީ، މުޅި ދިވެހި ރާއްޖެ ތަމްސީލު ކުރާ ގޮތަށް، ޤައުމީ ޓީމުތަކަށް ކުޅުންތެރިން ނެގިގެން އަންނަ ގޮތް ހެދުމަކީ ވަރަށް މުހިންމު ކަމެއް ކަމަށެވެ.

އެކަމަށް އިޝާރާތް ކުރައްވައި ވަޒީރު ވިދާޅުވީ، އެކަން ތަންފީޒު ކުރެެވިގެންދާއިރު، އެކަމުގެ އެންމެ ބޮޑު ފައިދާ ކުރާނީ ރާއްޖޭގެ ޤައުމީ ޓީމުތަކަށް ކަމަށެވެ. ޚާއްސަކޮށް ބައިނަލްއަޤުވާމީ މުބާރާތްތަކުގައި ވާދަ ކުރުމަށް ރާއްޖެ އިން ބޭރަށް ޓީމުތައް ދާއިރު، މޮޅެތި ކުޅުންތެރިން ނެގުމުގެ ފުރުސަތު ވަަރަށް ބޮޑުވެގެން ދާނެ ކަމަށް ވަޒީރު ވިދާޅުވެފައިވެ އެވެ.

އެގޮތަށް ޓީމު އެކުލަވާލާއިރު، ޓީމަށް ކުޅުންތެރިން ހޮވުމަށް އޮންނަ ޕޫލް ވަރަށް ބޮޑުވެގެން ދާނެ އެވެ. ރާއްޖޭގެ އެކި ކަންކޮޅުތަކުގައި އުފެދޭ ރީޖަނަލް އެސޯސިއޭޝަންތަކުން، އެ ރީޖަންތަކުގައި މުބާރާތްތައް ބާއްވަން ޖެހޭއިރު، އެ މުބާރާތުގެ ސަބަބުން ކުދިން ހުނަރު އިތުރު ވެެގެން ދާނެ ކަމަށް ވަޒީރު ވަނީ ވިދާޅުވެފަ އެވެ.

ވަޒީރު ވިދާޅުވި ގޮތުގައި އެގޮތަށް މުބާރާތްތައް ބޭއްވުމުގެ ސަބަބުން، މުޅި ރާއްޖޭގެ އެކި ކަންކޮޅުތަކުގައި ތިބި މޮޅެތި ކުޅުންތެރިން ދެނެގަތުމުގެ ނުވަތަ ހޮވުމުގައި ވަރަށް ފަސޭހަ ގޮތެއް ވެގެން ދާނެ ކަމަށެވެ. ރާއްޖޭގެ އެކި ރަށް ތަކުގައި ވަރަށް މޮޅެތި ކުޅުންތެރިން ތިބިކަން ފާހަގަ ކުރައްވައި ވަޒީރު ވިދާޅުވީ، ރާއްޖެ ތަމްސީލު ކުރާ ޤައުމީ ޓީމަށް އައުމުގެ ފުރުސަތު އޮންނަ މަގެއް އެ ކުދިންނަށް މިހާރު ނޯންނަ ކަމަށެވެ.

އެހެން ނަމަވެސް، ކުޅިވަރުގެ ޤާނޫނަށް ގެނެވުނު އިސްލާޙާ އެކު، އެފެދިގެން އަންނަ ރީޖަނަލް އެސޯސިއޭޝަންތަކުން ބާއްވާ މުބާރާތްތަކުގެ ސަބަބުން، ޤައުމީ ޓީމަށް އައުމަށް އެ ކުދިންނަށް ރަނގަޅު މަގެެއް ހުޅުވިގެން ދާނެ ކަމަށް ވަޒީރު ވިދާޅުވި އެވެ. އެ ޤާނޫނުން ލިބިގެން ދާނެ އެންމެ ބޮޑު އެއް ފައިދާ އަކީ އެއީ ކަމުގައި ވެސް ވަޒީރު ދެކިލައްވަ އެވެ.

މީގެ އިތުރުން އެކި އެކި ރީޖަންތަކުގައި މުބާރާތްތައް ބޭއްވުމުގެ ސަބަބުން، މާލޭ ސަރަހައްދަށް މުބާރާތްތައް ކުޅެން އަންނަން ޖެހުމުގެ ފުރުސަތު ވަރަށް ބޮޑަށް ކުޑަވެގެން ދާނެ އެވެ. މާލެ އައުމުގެ ބަދަލުގައި މުބާރާތްތައް ކުރިއަށް ދާނީ ރީޖަންތަކުގައި ކަމަށް ވަޒީރު ވިދާޅުވި އެވެ.

ކުޅިވަރު ޤާނޫނަށް ގެނައި އިސްލާހުގެ ތެރޭގައި ހިމެނޭ މުހިންމު ކަންތައްތަކުގެ ތެރޭގައި ކުޅިވަރު ކުރިއެރުވުން ލާމަރުކަޒީކޮށް، އަތޮޅުތަކާއި ރަށްތަކުގެ ފެންވަރުގައި ކުޅިވަރު ކުރިއަރުވަން އިޚްތިޔާރުތަކަކާއި ފުރުޞަތުތަކެއް ލިބުން ހިމެނެ އެވެ.

މީގެ އިތުރުން ކޮންމެ ކުޅިވަރެއްގެ ވެސް ސަރަޙައްދީ އެސޯސިއޭޝަންތައް ރާއްޖޭގެ އެކި ސަރަޙައްދުތަކުގައި މި ޤާނޫނުގެ ދަށުން އުފެއްދަން ޖެހޭނެ އެވެ. އަދި ކޮންމެ ކުޅިވަރެއްގެ ވެސް ސަރަޙައްދީ މުބާރާތްތައް ބާއްވަން ޖެހޭނެ އެވެ.