ސެމީ ފައިނަލްގައި އިންޑިއާ އަތުން ރާއްޖެ ބަލިވެއްޖެ

މިހާރު ކުރިއަށްދާ 19 އަހަރުން ދަށުގެ ސާފް ޗެމްޕިއަންޝިޕްގެ ސެމީ ފައިނަލްގައި އިންޑިއާއާ ދެކޮޅަށް ކުޅުނު މެޗުން ދިވެހި ރާއްޖެ ބަލިވެއްޖެ އެވެ.

އިންޑިއާގައި ކުރިއަށް މުބާރާތުގެ ސެމީ ފައިނަލްގެ ޖާގަ ރާއްޖެ އިން ހޯދީ ގުރޫޕުގެ ދެ ވަނަ ޓީމުގެ ގޮތުގަ އެވެ. ގުރޫޕްގެ ފުރަތަމަ މެޗުގައި ރާއްޖެ އިން ވަނީ ފަހަތުން އަރައި ބަންގްލަދޭޝްއާ އެއްވަރުކޮށްފަ އެވެ. ދެ ވަނަ މެޗުގައި ވަނީ ބޫޓާން އަތުން ވެސް އެއްވަރުވެފަ އެވެ.

ހުކުރު ދުވަހުގެ ރޭ ކުޅުނު ސެމީ ފައިނަލް މެޗުގައި އިންޑިއާ އިން ރާއްޖޭގެ މައްޗަށް ކުރި ހޯދީ 3-0 އިންނެވެ. މެޗުގެ ފުރަތަމަ ހާފުގައި އިންޑިއާ އިން ވަނީ ދެ ލަނޑު ޖަހައިފަ އެވެ. އަދި ތިން ވަނަ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 14 ވަނަ މިނެޓުގައި އިންޑިއާ އަށް ލީޑު ނަގައިދިނީ ޑެނީ މެއިޓެއި އެވެ. އެ ލަނޑު އޭނާ ޖެހީ ޕްރަޝާން ޖާޖޯ ތަނަވަސްކޮށްދިން ފުރުސަތެއްގަ އެވެ.

އޭގެ ހަތް މިނެޓު ފަހުން އިންޑިއާ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އޮމާން ދޮދޫމް އެވެ.

މެޗުގައި ރާއްޖެ އިން ވެސް ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. އެގޮތުން ރާއްޖޭގެ އީތަން އިބްރާހީމް ޒަކީގެ އިތުރުން އަހުޒަމް ރަޝީދު ވެސް ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ.

މެޗުގެ ދެ ވަނަ ހާފުގައި އިންޑިއާ އިން ވަނީ އެ ޓީމުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އެ ލަނޑު އިންޑިއާ އަށް ޖަހައިދިނީ ޕްރަޝާން ޖާޖޯ އެވެ.

މިއަހަރުގެ މުބާރާތުގެ ގުރޫޕް ސްޓޭޖުގައި ރާއްޖެ އިން ރަނގަޅު ކުޅުމެއް ދެއްކި އެވެ. މުބާރާތުގެ ފައިނަލްގައި އިންޑިއާ ނިކުންނާނީ ބަންގްލަދޭޝްއާ ދެކޮޅަށެވެ. އެ ޓީމުން ވަނީ ސެމީ ފައިނަލްގައި ނޭޕާލްގެ މައްޗަށް ކުރި ހޯދައިފަ އެވެ.