ކާޑެއްދޫ އެއަރޕޯޓުގައި ހުވަނީގެ އުދަނގޫ ބޮޑުވުން: ހައްލު ކުރުމުގެ މަސައްކަތް ފަށާފައިވާ ކަމަށް މިނިސްޓްރީން ބުނޭ

ގދ.ކާޑެއްދޫ އެއަރޕޯޓުގައި ހުވަނީގެ އުދަނގޫ ބޮޑުވެ، އާއްމު ރައްޔިތުން ރުޅި ގަދަވެއްޖެ އެވެ.

ހުވަނީގެ އުދަނގޫ ބޮޑުވުމާއި ގުޅިގެން ގިނަ އަދަދެއްގެ އާއްމު ރައްޔިތުން ސޯޝަލް މީޑިއާގައި އެކަމުގެ ކަންބޮޑުވުންދަނީ ފާޅު ކުރަމުންނެވެ.

ކާޑެއްދޫ އެއަރޕޯޓުގައި ހުރި ގަސްތަކާއި، މީހުން އިށީނުމަށް ހާދައިވާ ޖޯލިތަކާއި، ތަންތަނުގައި ވެސް ވަނީ ހުވަނި އަޅާފައެވެ. އަދި ގަހެއްގެ ދަށުގައި ވެސް މަޑުކޮށްގެން މީހަކަށް ނުހުރެވޭނެ ކަމަށް ބައެއް މީހުން ބުނެފައިވެއެވެ.

ސޯޝަލް މީޑީއާގައި އާއްމުންގެ މީހަކު ހިއްސާކޮށްފައިވާ ޕޯސްޓެއްގައި މީހެއް ބުނެފައިވަނީ ކޮންމެ ދުވަހަކު ވެސް ކާޑެއްދޫ އެއަރޕޯޓުން ގިނަ އަދަދެއްގެ ފަތުރުވެރިންނާ ދިވެހިން ޚިދުމަތް ހޯދާ ކަމަށާއި، ނަމަވެސް ހުވަނީގެ އުދަނގޫ ބޮޑުވެ، ސިއްހަތަށް ނުރައްކާވެފައިވާ ކަަމަށެވެ. އެއަރޕޯޓުގެ ޓާމިނަލް، ފާހަނާ އަދި ކެފޭގެ ހުރި ގޮނޑިމޭޒުތައް ވެސް ހުވަނިން ބަރާވެފައިވާ ކަމަށެވެ.

ހުވަނީގެ މައްސަލައަށް ގިނަ ދުވަސްތަކެއްވެފައިވާ ކަމަށާއި، ހުވަނި އެއަރޕޯޓުގައި އާލާކޮށް ކުރިއަށް ގެންދާ މަޝްރޫއެއްތޯ ބައެއް މީހުން ސުވާލުކޮށްފައިވެއެވެ.

ކާޑެއްދޫ އެއަރޕޯޓު ވިލާ އެއަރއިން ހިންގި ނަމަވެސް މިމައްސަލައަށް ހައްލު ހޯދުމަށް އެކަށީގެންވާ ގޮތުގައި މަސައްކަތް ނުކުރާ ކަމަށާއި، ހުވަނި ނައްތާލުމަށް އޯމޯ ފެން ޖެހުން ނޫން ކަމެއް ނުރާ ކަމަށް އެމީހާ ބުނެފައިވެއެވެ. ހުވަނި ގަސްތަކުގެ ފަތްތައް ކައި، ގަސްތަކަށް ވެސް ބޮޑެތި ގެއްލުންތަކެއް ލިބިފައިވާ ކަމަށް ގިނަ ބަޔަކު ބުނެފައިވެއެވެ.

މި މައްސަލައާ ގުޅިގެން ވިލަރ އެއަރގެ ރަސްމީ ބަހެއް ވަނީ ލިބޭގޮތް ނުވެފައެވެ.

ހުވަނި ގައިގެ ހަމުގައި ޖެހުމުން ބައެއް މީހުން ވަރަށް ބޮޑަށް އެލަރޖިކް ވެއެވެ. ގައި ހިރުވައިކަހައި، ބޮޑެތި ފިއްގަނޑުނަގައި، މީހާ ދުޅަވެގެންދެއެވެ.

މައުލޫމާތު ލިބިފައިވާ ގޮތުގައި ކާޑެއްދޫ އެއަރޕޯޓުގެ ގަސްތަކުގައި ހުވަނި އަޅާފައިވަނީ މީގެ މަސް ދުވަސް ކުރިންނެވެ. އޯމޯ ފެން ޖެހުމުގެ އިތުރުން އެގްރިކަލްޗާ އެންޑް އެނިމަލްވެލްފެއަރ މިނިސްޓްރީން ދޫކުރާ ބޭސް ބޭނުންކޮށްގެން ހުވަނި ނައްތާލުމުގެ މަސައްކަތް އެއަރޕޯޓުގައި މަސައްކަތް މުވައްޒަފުން ކުރަމުންދާ ކަމަށް މައުލޫމާތު ލިބެއެވެ.

މި މައްސަލައާ ގުޅިގެން ރާއްޖެއެމްވީއަށް އެނިމަލްވެލްފެއަރ މިނިސްޓްރީން ބުނީ ހުވަނީގެ މައްސަލަ ސަމާލު ކަމަށް އައިސްފައިވާ ކަމަށާއި، މިނިސްޓްރީ ކާޑެއްދޫ އެއަރޕޯޓަށް ގުޅައި ބަލަންޖެހޭ ކަންކަން ބަލަމުންދާ ކަަމަށެވެ. އަދި ހުވަނީގެ މައްސަލަ ހައްލު ކުރުމުގެ މަސައްކަތް މިނިސްޓްރީން ފަށާފައިވާ ކަމަށެވެ.