ގައުމުގެ ކުރިއެރުން ހަލުވިވެ، ކުރިމަގު އުޖާލާ ވެގެންދާނީ ދިވެހި އާއިލާތައް ބަދަހިވެ، ފުދުންތެރިވެ، ދިރިއުޅުމުގެ ފަސޭހަތައް އިތުރުވީ ވަރަކަށް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އާއިލާތަކުގެ ބައިނަލްއަގުވާމީ ދުވަހުގެ މުނާސަބަތާ ގުޅުވައިގެން އެމަނިކުފާނުގެ ރަސްމީ 'އެކްސް' އެކައުންޓުގައި ހިއްސާ ކުރެއްވި ޕޯސްޓެއްގައެވެ.

ނަމަވެސް ރައީސް މުއިއްޒުގެ ސަރުކާރާއެކު، ހަރަދުތައް ބޮޑުވުމާ ގުޅިގެން ގިނަ އާއިލާތަކަށް ވަނީ ގޮންޖެހުންތަކާ ކުރިމަތިވެފައެވެ.

އާއިލާތަކުގެ ދުވަހާއި ގުޅިގެން ރައީސް މުއިއްޒު ވަނީ، ދިވެހި ކޮންމެ އާއިލާއަކަށް ފަހިކަމާއި ފާގަތިކަމަށް އެދިވަޑައިގަންނަވާފައެެވެ. އަދި، އިސްލާމްދީނުގައި އެންމެ ބޮޑު އަހަންމިއްޔަތުކަމެއް ދީފައިވަނީ އާއިލީ ގުޅުންތައް ހަރުދަނާ ކުރުމަށް ކަމަށް ވިދާޅުވެ، ގައުމުގެ ތަރައްގީއާއި އާއިލާތަކުގެ ގުޅުމުގެ މައްޗަށް އެމަނިކުފާނުގެ ޕޯސްޓްގައި އަލިއަޅުއްވާލައްވާފައިވެއެވެ.

ރައީސްގެ ޕޯސްޓްގައި ދިވެހި ކޮންމެ އާއިލާއަކަށް ފާގަތި ދުވަސްތަކެއް ހޯދައި ދިނުމުގައި މާތް ﷲ ނަޞްރާއި ކާމިޔާބީ މިންވަރުކުރެއްވުމަށްވެސް އެދިވަަޑައިގަންނަވާފައިވެއެވެ.

ރާއްޖެއަކީ ގައުމުގެ އިޖްތިމާއީ ތަރައްގީގައި އާއިލާތަކުގެ މުހިންމު ދައުރެއް އޮންނަކަން އަބަދުވެސް ގަބޫލުކުރާ ގައުމެއް ކަމަށް ރައީސް އޮފީހުން ބުނެއެވެ.

އެގޮތުން ރާއްޖޭގެ ގައުމީ ތަރައްގީގެ ޕްލޭންތަކުގައި ސިޔާސަތުތައް ހިމެނުމުގައި އާއިލާތަކަށް އަމާޒުކޮށް މުހިންމު ފިޔަވަޅުތަކެއް އަޅާފައިވެއެވެ. މީގެ ތެރޭގައި އާސަންދަ ސިއްހީ ޚިދުމަތުގެ ނިޒާމް ތައާރަފްކުރުމާއި، ޗައިލްޑް އެންޑް ސޯޝަލް ޕްރޮޓެކްޝަން ސާރވިސްގެ ޚިދުމަތް ފުޅާކުރުމާއި، އެކަނިވެރި މައިންނާއި ބަފައިންނަށް މާލީ އެހީތެރިކަން ފޯރުކޮށްދިނުމާއި، މުސާރަ ލިބޭ ވިހެއުމުގެ ޗުއްޓީ، މައިންނަށް 6 މަހަށް އަދި ބައްޕައިންނަށް 1 މަހަށް އިތުރުކުރުން ފަދަ ކަންކަމަކީ، މުޖުތަމައުގެ އެންމެ އަސާސީ ބިންގާ ކަމުގައިވާ އާއިލާތައް ހަރުދަނާކޮށް، އާއިލާތަކުގެ ތެރެއިން މުޖުތަމައަށް ނިކުންނަ ކުދިންނަކީ ދުޅަހެޔޮ، ތަޢުލީމީ ގޮތުން ކުރިއަރާފައިވާ، އުފެއްދުންތެރި ރައްޔިތެއްކަން ކަށަވަރުކުރުމާއެކު އާއިލާތައް ބާރުވެރިކުރުމަށް ގާއިމްކުރެވިފައިވާ މުހިންމު ސިޔާސަތުތަކެކެވެ.

މީގެ އިތުރުން، މިދައުރުގެ ތެރޭގައި އަންހެނުންނާއި ކުޑަކުދިންނަށް ޚާއްސަ ހޮސްޕިޓަލެއް ތަރައްގީކޮށް، ހިންގަން ފެށުމަށް ސަރުކާރުން ތައްޔާރުވާ ކަމަށް ރައީސް އޮފީހުން ބުނެއެވެ.

ރައީސް މިމޭރުމުން ވާހަކަފުޅު ދެއްކެވި ނަމަވެސް މިސަރުކާރުގައި އާއިލާއާ ގުޅުންހުރި މިފަދަ ޚިދުމަތްތައް ލިބުމުގައި ވަނީ ދަތިތައް ކުރިމަތިވެފައެވެ. އާސަންދަ ޚިދުމަތް ހޯދުމަށް ގިނަ ގޮންޖެހުންތައް ކުރިމަތިވާއިރު، މީގެ ކުރިން ލިބުނު ބޭސް ވެސް ރާއްޖެއިން ނުލިބޭކަމުގެ ޝަކުވާ ވަނީ ބޮޑުވެފައެވެ. މީގެ އިތުރުން ޒަރޫރީ ބޭނުންތަކަށް ބޭނުންކުރާ ހުރިހާ އެއްޗެއްގެ އަގު އުފުލެމުންދާއިރު، ގިނަ އާއިލާތަށް ދިރިއުޅެމުންދަނީ ދަތިކޮށް ކަމަށް ގިނަ ބަޔަކު ދަނީ ބުނަމުންނެވެ.