މިހާތަނަށް 700 ކިލޯއަށްވުރެ ގިނަ މަސްތުވާތަކެތީ އަތުލައިގަނެވިއްޖެ - އިހުސާން
ރާއްޖޭގެ އިޖްތިމާއީ ކަންކަމަށް ބަލާއިރު އެންމެ ބޮޑު އެއް މައްސަލައަކީ ޑްރަގުގެ މައްސަލަ
ހޯމްލޭންޑް އެންޑް ސެކިއުރިޓީ ވަޒީރު އަލީ އިހުސާން
މިހާތަނަށް 700 ކިލޯއަށްވުރެ ގިނަ މަސްތުވާތަކެތީ އަތުލައިގަނެވިއްޖެ ކަމަށް ހޯމްލޭންޑް އެންޑް ސެކިއުރިޓީ ވަޒީރު އަލީ އިހުސާން ވިދާޅުވެއްޖެއެވެ.
އަހާ ފޯރަމުގައި ކުރި ސުވާލަކަށް ޖަވާބު ދެއްވަމުން އިހުސާން ވިދާޅުވީ ރާއްޖޭގެ އިޖްތިމާއީ ކަންކަމަށް ބަލާއިރު އެންމެ ބޮޑު އެއް މައްސަލައަކީ ޑްރަގުގެ މައްސަލަ ކަމަށެވެ. އަދި މި ދައުރުގެ ތެރޭގައި މަސްތުވާތަކެތީގެ މައްސަލަ ހައްލުކުރެވޭނެ ކަމަށް ޔަގީންކަން ދެއްވަނީ ކީއްވެގެންތޯ ސުވާލު އުފައްދަވާ ވަޒީރު ވިދާޅުވީ ސަރުކާރަށް މިވީ 18 މަސް ދުވަސްތެރޭގައި އެދިމާލަށް އެބަދެވޭ ކަމަށެވެ. ވަޒީރު ވިދާޅުވީ އެ މަސައްކަތް ފަށައިގަތީވެސް އެކަމާއި ގުޅޭ ހުރިހާ އިދާރާތަކެއް ވުޒާރާއެކު މަސައްކަތް ކުރެވޭނެ ގޮތަށް ހުރިހާކަމެއް ތަރުތީބުކުރައްވައިގެން ކަމަށެވެ.
ވަޒީރު އިހުސާން ވިދާޅުވީ ކުރީގައި އޮތް ބިއުރޯކްރެސީއާއި، އެއް އިދާރާ އަނެއް އިދާރާއާއި އޮތް ފުށު އެރުންތައް ދުރުކޮށް ދައުލަތް އެއްކޮށް މަސައްކަތް ކުރެވޭނެ ގޮތަށް ހަދާފައިވާ ކަމަށެވެ. އަދި އޭގެ ނަތީޖާއެއްގެ ގޮތުން ފާއިތުވެދިޔަ 18 މަސް ދުވަސްތެރޭގައި 700 ކިލޯއަށްވުރެ ގިނަ މަސްތުވާތަކެތި ހިފަހައްޓާފައިވާ ކަމަށެވެ.
އެއީ ގާތްގަނޑަކަށް މަގުމަތީގެ އަގުން ދަންނަވާނަމަ 1.4 ބިލިއަން ދިވެހި ރުފިޔާގެ މަސްތުވާތަކެތި. އޭގެ އިތުރުން ރާ އޭގެ ޒާތުގައި ބަނގުރާ މާލޭގެ އެކި ސަރަހައްދުތަކަށާއި، މީހުން ދިރިއުޅެމުންދާ ރަށްރަށަށް އަރަމުންދާކަން ހުއްޓުވުމަށް އަޅުގަނޑުމެން ހިންގާ ހާއްސަ އޮޕަރޭޝަންތަކުގެ ތެރޭގައި 9000 އަށްވުރެ ގިނަ ރާފުޅި އަތުލައިގަނެފައިވާނެ. އެހެންވީމަ މިއީ ހަމައެކަނި 18 މަސް ދުވަސްތެރޭގައި އަޅުގަނޑުމެން އިންޓަރސެޕްޝަންގެ ތެރެއިން ކޮށްފައިވާ ކަންކަން.ހޯމްލޭންޑް އެންޑް ސެކިއުރިޓީ ވަޒީރު އަލީ އިހުސާން
ވަޒީރު ވިދާޅުވީ ރާއްޖޭގެ ބޯޑަރުން އެތެރެވާ ދޮރުތައް ބަންދުކުރުމަށްޓަކައި ހާއްސަގޮތެއްގައި ޕޯސްޓުގެ ޒަރިއްޔާއިން އަންނަ ޕެކޭޖްތައް ސްކޭންކުރުމުގެ ހާއްސަ މަސައްކަތްތައް ކުރެވެމުންދާ ކަމަށެވެ. މީގެ އިތުރުން އެއަރޕޯޓުން އަންނަ ޕެކޭޖްތައް ވެސް ބަލަމުންދާ ކަމަށާއި، އޭގެ ތެރެއިން އަތުލައިގަނެވޭ އަދަދުވެސް އިތުރުވެފައިވާ ކަމަށެވެ.
ވަޒީރު އިހުސާން ވިދާޅުވީ ސީ ކާގޯއިން އަންނަ ކޮންޓެއިނަރތައް ސްކޭން ކުރުމަށް ސްކޭނަރެއް ހޯދަމުންދާ ކަމަށާއި، އެއާއި ހިސާބުން ކަނޑުމަގުން އެތެރެވާ މައްސަލައަށް ހައްލެއް ލިބިގެންދާނެ ކަަމަށް ވަޒީރު ވިދާޅުވިއެވެ.
އެހެން ސަރުކާރުތަކާއި ހިލާފަށް މަސައްކަތް ކުރަނީ ސަޕްލައި މަދުކުރުމަށް ވިސްނައިގެން ކަމަށާއި، އެކަން ކުރާއިރު މަސްތުވާތަކެތި ފަހާ ދުވުމުގެ ބަދަލުގައި މަސްތުވާތަކެތީގެ ވިޔަފާރިކުރާ މީހުން އަތުލައިގަންނަމުންދާ ކަމަށް ވަޒީރު އިހުސާން ވިދާޅުވިއެވެ.
އެހެންވީމަ އަޅުގަނޑުމެން މުޅި ރާއްޖެއަށް ފުޅާކޮށްގެން ތަހުގީގުތަކެއް އެބަގެންދަން. މިވަގުތުވެސް މަނީލޯންޑަރިންގ ފްރަންޓުން އަޅުގަނޑުމެން މައްސަލަ މި ބަލަނީ. އެއީ މަސްތުވާތަކެތި ވިއްކާ މީހުން އަދި އޭގެ އެންމެ މުލުގައި ތިބޭ މީހުން މަސްތުވާތަކެއްޗާ އެކުގައި އެ ވިއްކަމުން ނުވެއްދޭ. އެއެއްޗެހި އެމީހުން ވިއްކަނީ ދެތިން ލޭޔަރއެއް އަޅައިގެން މީސްމީހުން ލައްވާ. ގިނަ ފަހަރަށް ޕޮލިސް އޮޕަރޭޝަންތަކުގައި އަތުލައިގަނެވެނީ އޭގެ މެދުތެރޭގައި ތިބޭ މީހުން ނުވަތަ އެންމެ ދަށުގައި ހުންނަ މީހާ.ހޯމްލޭންޑް އެންޑް ސެކިއުރިޓީ ވަޒީރު އަލީ އިހުސާން
ވަޒީރު ވިދާޅުވީ ފައިސާ ފޮލޯކޮށްގެން އަދި ރާއްޖެއަށް މަސްތުވާތަކެތި އެތެރެކުރާ ކަމަށް ގަބޫލުކުރެވޭ އަދި އަތޮޅުތެރޭގައި މަސްތުވާތަކެތީގެ ވިއުގަތައް ހިންގާ އެންމެ ބޮޑެތި މީހުން ހޯދަމުންދާ ކަމަށެވެ. އަދި އެމީހުންނާ ދޭތެރޭ ފިޔަވަޅު އަޅާ ހުއްޓުވާ އެމީހުންގެ ފައިސާ ސީޒްކޮށް ވިޔަފާރިތައް ހުއްޓުވާނެ ކަމަށް ވަޒީރު އިހުސާން ވިދާޅުވިއެވެ.
ވަޒީރު ވިދާޅުވީ މިކަމަށްޓަކައި ޕައިލެޓް އޮޕަރޭޝަނެއް ފަށައި، ގާނޫނީ ގޮތުން ވެސް އަޅަންޖެހޭ ފިޔަވަޅުތައް އަޅާފައިވާނެ ކަމަށެވެ. އެގޮތުން ފުވައްމުލައް ސިޓީގައި މަސްތުވާތަކެތީގެ ވިޔަފާރީގައި އެންމެ މަތީގައި ތިބި ދެމީހަކު ވާނީ ހައްޔަރުކޮށްފައި ކަމަށް ވަޒީރު އިހުސާން ވިދާޅުވިއެވެ. އަދި ގާނޫނީ ފިޔަވަޅު އެޅި އެ މައްސަލަ ބަލަމުންދާ ކަމަށް ވިދާޅުވިއެވެ.
