ބަޔާނުން ޖަރުމަނު ލީގުގެ ތަށި އުފުލާލައިފި

ޖަރުމަނު ލީގުގައި ބޮރޫޝިއާ މުންޗެންގްލަޑްބެކްއާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް އިން ޖަރުމަނު ލީގުގެ ތަށި އުފުލާލައިފި އެވެ.

ބަޔާންގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ބަޔާނުން އެއް ލަނޑު ޖެހިއިރު، ދެ ވަނަ ހާފުގައި ވަނީ އަނެއް ލަނޑު ޖަހައިފަ އެވެ.

އެ މެޗާ ކުރިމަތިލީއިރު ވެސް، ބަޔާނަށް ވަނީ މި ސީޒަންގެ ޖަރުމަނު ލީގު ކަށަވަރު ވެފަ އެވެ. އެއީ ކުރީ ހަފުތާގައި ބަޔާ ލެވަކޫސަން ކުޅުނު މެޗުން އެ ޓީމު މޮޅު ނުވުމުންނެވެ.

މެޗުގެ ފުރަތަމަ ހާފުގެ 31 ވަނަ މިނެޓުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އޭނާ އެ ލަނޑު ޖެހީ މައިކަލް އޮލައިސޭ ތަނަވަސްކޮށްދިން ފުރުސަތެއްގަ އެވެ.

މެޗުގައި ބަޔާންގެ ދެ ވަނަ ލަނޑު އޮލައިސޭ ޖެހީ، މެޗުގެ އެންމެ ފަހު ވަގުތުގެ ތެރޭގަ އެވެެ. އެ ލަނޑު ޖަހަން އޮލައިސޭ އަށް ފުރުސަތު ތަނަވަސްކޮށްދިނީ ލެރޯއީ ސާނޭ އެވެ.

މިއީ ބަޔާން މިއުނިކް އިން ޖަރުމަނު ލީގު ކާމިޔާބު ކުރީ 34 ވަނަ ފަހަރެވެ. ބަޔާންގެ މި ކާމިޔާބީ އެންމެ ޚާއްސަވާ ކުޅުންތެރިޔަކީ، މިދިޔަ ސީޒަންގައި އެ ޓީމަށް ބަދަލުވި ކޭން އެވެ.

ބަޔާނާ އެކު ކާމިޔާބު ކުރި ޖަރުމަނު ލީގަކީ، ކޭންގެ ސީނިއާ ކެރިއަރުގައި އޭނާ އަށް ކާމިޔާބު ކުރެވުނު ފުރަތަމަ ތައްޓެވެ. މީގެ ކުރިން ޓޮޓެންހަމް އަދި އިންގްލެންޑާ އެކު ފައިނަލްގައި ކުޅުނު ނަމަވެސް، ކޭން އަށް ވަނީ ނާކާމިޔާބުވެފަ އެވެ.

ޓޮޓެންހަމް ދޫކޮށް މިދިޔަ ސީޒަންގައި އޭނާ ބަޔާނަށް ބަދަލުވީއިރު، ބަޔާނަށް ވަނީ މިދިޔަ ސީޒަންގެ ޖަރުމަނު ލީގު ގެއްލިފަ އެވެ. އަދި ބަޔާނުން މިދިޔަ ސީޒަން ނިންމާލަން ޖެހުނީ ވެސް ތައްޓެއް ކާމިޔާބު ނުކުރެވި އެވެ.

މިއީ މި ސީޒަނާ ދިމާކޮށް ބަޔާންގެ ކޯޗުކަމާ ހަވާލުވި ވިންސެންޓް ކޮމްޕެނީގެ އިރުޝާދުގެ ދަށުން ބަޔާން ކާމިޔާބު ކުރި ފުރަތަމަ ތައްޓެވެ.