ޕާކިސްތާނާއި އިންޑިއާ ދެމެދު ބަދަލު ކުރަމުންދާ ހަމަލާތަކުގައި، ޕާކިސްތާނުން ވައްޓާލި އިންޑިއާގެ ޑްރޯންތަކުގެ އަދަދު 77 އަށް އަރައިފިއެވެ.

ޕާކިސްތާނުގެ ސަރުކާރުގެ ޓީވީ ޗެނަލް ޕީޓީވީ ނިއުސް އިން ބުނާ ގޮތުގައި، އިންޑިއާގެ އުދުވާނީ ހަމަލާތަކަށް ޕާކިސްތާނުގެ ސިފައިން ވަނީ އެކަށީގެންވާ ރައްދެއް ދީފައެވެ.

އަނެއްކޮޅުން އިންޑިއާ ބެލުމުގެ ދަށުގައިވާ ކަޝްމީރުގެ ޖައްމޫ އަދި އުދަމްޕުރު، އަދި ޕަންޖާބު ސްޓޭޓްގެ ޕަތަންކޯޓްގެ އަސްކަރީ މަރުކަޒުތަކަށް ޑްރޯން އަދި މިސައިލް ހަމަލާތަކެއް ޕާކިސްތާނުން ދީފައިވާ ކަމަށް އިންޑިއާ އިން ބުނާ ބުނުން ޕާކިސްތާނުން ވަނީ ދޮގުކޮށްފައެވެ.

ޕާކިސްތާނުގެ އިންފޮމޭޝަން މިނިސްޓަރު ވިދާޅުވި ގޮތުގައި، އިންޑިއާގެ ހަމަލާތަކަށް އެ ގައުމުން މިހާތަނަށް ދީފައިވަނީ ހަމައެކަނި ދިފާޢީ ރައްދެކެވެ. މިދިޔަ ބުރާސްފަތި ދުވަހު އިންޑިއާއިން ފޮނުވި ހަމަލާދޭ ޑްރޯންތަކުން އާންމުންގެ ދެ މީހުން މަރުވެފައިވާ ކަމަށް ޕާކިސްތާނުގެ ސިފައިން ބުނެއެވެ.

އިންޑިއާ އިން ބުދަ ދުވަހު ޕާކިސްތާނާއި ޕާކިސްތާނު ބެލުމުގެ ދަށުގައިވާ ކަޝްމީރުގައި ހުރި "ޓެރަރިސްޓް ކޭމްޕްތަކަށް" ދިން މިސައިލް ހަމަލާތަކާ ގުޅިގެން މިހާތަނަށް 48 މީހުން މަރުވެފައިވެއެވެ. އޭގެ ތެރެއިން 32 މީހުންނަކީ ޕާކިސްތާނުގެ ރައްޔިތުންނެވެ. އިންޑިއާގެ ހަމަލާތަކަށް ޕާކިސްތާނުން ވަނީ އާޓިލަރީ ހަމަލާތަކުން ރައްދު ދީފައެވެ. އިންޑިއާ އިން ހަމަލާ ދިނީ ޓެރަރިސްޓް މަރުކަޒު ތަކަށް ކަމަށް ބުނާއިރު، ހަމަލާތައް އަރާފައިވާތަން ފެނިފައިވަނީ މިސްކިތްތަކަށާއި، އާންމުންގެ ގެދޮރަށާއި، އާންމު ޚިދުމަތްދޭ ތަންތަނަށް ކަން މީޑިއާ ރިިޕޯޓުތަކުގައި ފާހަގަ ކޮށްފައިވެއެވެ.

މި ހަމަނުޖެހުންތައް ފެށިފައިވަނީ އޭޕްރިލް 22 ވަނަ ދުވަހު އިންޑިއާ ބެލުމުގެ ދަށުގައިވާ ކަޝްމީރުގެ ޕަހަލްގަމްގައި ހިނގި ހަމަލާއަކާ ގުޅިގެންނެވެ. އިންޑިއާއިން މި ހަމަލާގެ ޒިންމާ ޕާކިސްތާނުގެ މައްޗަށް އަޅުވާފައިވީ ނަމަވެސް، އެ ކަމުގައި އެއްވެސް ދައުރެއް އޮތް ކަމަށް ޕާކިސްތާނުން ވަނީ ދޮގުކޮށްފައެވެ.