ކާޑެއްދޫ އެއަރޕޯޓް ތަރައްގީ ކުރުމުގެ މަޝްވަރާތައް ކުރިއަށްދޭ: މިނިސްޓަރު އަމީން
ކާޑެއްދޫ އެއަރޕޯޓަކީ ކޯޓު މަރުހަލާގެ ތެރެއިން ވިލާ އެއަރއާ ހަވާލުކުރެވިފައިވާ އެއާޕޯޓެއް
ކާޑެއްދޫ އެއަރޕޯޓު
ކާޑެއްދޫ އެއަރޕޯޓް ތަރައްގީ ކުރުމުގެ މަޝްވަރާތައް ކުރިއަށްދާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
ބުދަ ދުވަހު ރައްޔިތުން މަޖިލީހުގައި ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ކުރެއްވި ސުވާލަށް މިނިސްޓަރު އަމީން ވިދާޅުވީ ކާޑެއްދޫ އެއަރޕޯޓަކީ ކޯޓު މަރުހަލާގެ ތެރެއިން ވިލާ އެއަރއާ ހަވާލުކުރެވިފައިވާ އެއާޕޯޓެއް ކަމަށެވެ. އަދި އެއަރޕޯޓް ތަރައްގީ ކުރުމާއި ބެހޭގޮތުން ހުރި ޕްލޭންތައް ރައީސް ޑރ.މުހައްމަދު މުއިއްޒު މީގެ ކުރިން ހިއްސާކުރެއްވި ކަމަށް މިނިސްޓަރު އަމީން ވިދާޅުވިއެވެ.
އެއަރޕޯޓުގެ ތަރައްގީއަށް އިޝާރާތް ކުރައްވައި މިނިސްޓަރު އަމީން ވިދާޅުވީ އެއަރޕޯޓް ތަރައްގީ ކުރުމަށް މަޝްވަރާ ކުރަމުންދާ ކަމަށެވެ. އެއްވެސް ފީއަކާ ނުލާ ސަރުކާރަށް އެއަރޕޯޓް ދޭނެ ކަމަށް ދެކެވޭ ވާހަކަތަކާއި ގުޅިގެން މިނިސްޓަރު އަމީން ވިދާޅުވީ އެއްވެސް ފީ އަކަލާ ނުލައި ސަރުކާރާ އެއާޕޯޓު ހަވާލުކުރާނެކަން ރަސްމީކޮށް އަންގާފައިނުވާ ކަމަށެވެ.
ނަމަވެސް ރައީސް ކާޑެއްދޫ އެއަރޕޯޓު ތަރައްގީ ކުރުމުގެ މަސައްކަތް މުއިއްޒުގެ ވިސްނުންފުޅާއެކު އަދި ތަރައްގީގެ ޕްލޭންއާއެކު ކުރިއަށްދާ ކަމަށް މިނިސްޓަރު އަމީން ވިދާޅުވިއެވެ.
އެނގިވަޑައިގަންނަވާނެ ކާޑެއްދޫ އެއަރޕޯޓަކީ ކޯޓު މަރުހަލާތަކެއްގެ ތެރެއިން ދެވަނަ ސުޕްރީމް ކޯޓުގެ ނިންމުމަކާއެކު އަމިއްލަ ފަރާތަކާ ހަވާލު ކުރެވިފައި. ދެން ކާޑެއްދޫ އެއަރޕޯޓު ތަރައްގީ ކުރުމާއި ބެހޭ ގޮތުން ސަރުކާރުގެ ވިސްނުންފުޅާ ގެންގުޅުއްވާ ތަސައްވުރާ މިހާރުގެ ޕްލޭންތައް ރައީސް އެވަނީ ވިދާޅުވެ ދެއްވާފައި. އަޅުގަނޑުމެން އެބަ ގެންދަމު އެ އެއަރޕޯޓާއި ހަވާލުވެފައިވާ ފަރާތާއެކު ޑައިލޮގްތަކެއް އެ އެއަރޕޯޓު ތަަރައްގީ ކުރުމުގައި. މީގެ މުހިންމު ކަމަކީ ވަކި ފަރާތެއް ހިމެނިގެން ނޫން. އެއަރޕޯޓު ބޭނުންވާ މިންގަނޑަށް ތަރައްގީ ކުރުން. އެހެންވީމަ އިރާދަރެއްވިއްޔާ އެކަންތައް ހައްލުވެގެންދާނެ. ދެވަނަ ބަޔަކަށް ސުވާލުގައި ވިދާޅުވީ މިހާރު ހިންގަވަމުން ގެންދަވާ ފަރާތުން އެއްވެސް އެއްޗެއް ނުނަންގަވާ ހަވާލު ކުރާނެ ވާހަކަ. އެ ރަސްމީ ސިފައެއްގައި އަޅުގަނޑުމެންނަށް ތިކަހަލަ އެއްވެސް އެނގުމެއް އަންގަވާފައިނުވޭ. މި ކެންޕޭންގެ ތެރޭގައި ނޫނީ ސޯޝަލް މީޑިއާގައި ހިނގަމުންދާ ކަންކަމަށް އަޅުގަނޑަށް ވަރަށް ދަތިވާނެ އެއްޗެއް ދެންނެވުމަށް.ޓްރާންސްޕޯޓް މިނިސްޓަރު މުހައްމަދު އަމީން
ކާޑެއްދޫ އެއަރޕޯޓް ތަރައްގީ ކުރުމުގެ މަޝްވަރާތައް ކުރިއަށްދާ ކަމަށް މިނިސްޓަރު އަމީން ވިދާޅުވިއިރު، 18 ފެބްރުއަރީ 2025 ގައި ރައްޔިތުންގެ މަޖިލީގެ އިގްތިސޯދީ ކޮމިޓީގައި ވިލާ ގްރޫޕްގެ ޗެއާމަން އަދި މާމިގިނލީ ދާއިރާގެ މެންބަރު ގާސިމް އިބްރާހިމް ވިދާޅުވެފައިވަނީ އެއާޕޯޓްގެ ރަންވޭ ދިގުކޮށް، އެތަން މަރާމާތުކޮށް، އެ އެއަރޕޯޓް އިންޓަނޭޝަލް ކުރުމުގެ މަސައްކަތް ކުރަމުންދާ ކަމަށެވެ. ނަމަވެސް މިއަދާ ހަމައަށް މަސައްކަތް ކުރިއަށްދާކަމުގެ އެއްވެސް އަމަލީ ސިފައެއް އެއާޕޯޓުން ފެނިފައިނުވެއެވެ.
ކާޑެއްދޫ އެއަރޕޯޓް ހިންގަން ވިލާ އެއާއަށް ހަވާލުކޮށްފައިވަނީ 2013 ވަނަ އަހަރުގެ ތެރޭގައެވެ. އަދި ރަސްމީކޮށް ކާޑެއްދޫ އެއަރޕޯޓް ހިންގަން ފެށީ 1 ޖެނުއަރީ 2014 ގައެވެ. ނަމަވެސް 2017 ވަނަ އަހަރު، ކުރީގެ ރައީސް އަބްދުﷲ ޔާމީންގެ ވެރިކަމުގައި، ވިލާ އެއާއަށް ކާޑެއްދޫ އެއާޕޯޓް 50 އަހަރަށް ކުއްޔަށް ދީފައި ވަނިކޮށް އެއްބަސްވުން ބާތިލްކުރީ ސިވިލް އޭވިއޭޝަން އޮތޯރިޓީގެ މިންގަނޑުތަކާ ހިލާފަށް އެއަރޕޯޓް ހިންގި ކަމަށް ބުނެއެވެ. ޔާމީންގެ ސަރުކާރުން އެއްބަސްވުން ބާތިލްކުރީ ގޯސްކޮށް ކަމަށް ސުޕްރީމް ކޯޓުން ކަނޑައަޅައި، 2021 ވަނަ އަހަރު އެއަރޕޯޓުގެ ހިންގުން އަނެއްކާ ވެސް ވިލާ އެއާރ ހަވާލުކޮށްފައިވެއެވެ.
ކުރީގެ ރައީސް މައުމޫން އަބްދުއްގައްޔޫމްގެ ވެރިކަމުގައި 1993 އަހަރު ޑިސެމްބަރު 10 ގައި ހުޅުވި ކާޑެއްދޫ އެއަރޕޯޓަކީ ރާއްޖޭގައި ފުރަތަމަ ހުޅުވި ސަރަހައްދީ 5 އެއާޕޯޓުގެ ތެރޭގައި ހިމެނޭ އެއަރޕޯޓެކެވެ. އަދި އެއަރޕޯޓުގެ ފެންވަރު ވަރަށް ދަށް ކަމަށް ބުނެ، ގިނަ ރައްޔިތުން ދަނީ ކަންބޮޑުވުންފާޅު ކުރަމުންނެވެ.
