ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި ބާސެލޯނާގެ މައްޗަށް ކުރި ހޯދައި، އިންޓަރ މިލާނުން މުބާރާތުގެ ފައިނަލްގެ ޖާގަ ހޯދައިފި އެވެ.

މި ދެ ޓީމު ބާސެލޯނާގެ ދަނޑުގައި މިދިޔަ ހަފުތާގައި ކުޅުނު ފުރަތަމަ ލެގުގެ މެޗު ނިމުނީ ދެ ޓީމު 3-3 އިން އެއްވަރު ވެގެންނެވެ. އެހެންވެ، މުބާރާތުގެ ފައިނަލްގެ ޖާގަ ލިބެން އޮތީ ދެ ވަނަ ލެގުން މޮޅުވާ ޓީމަކަށެވެ.

އަންގާރަ ދުވަހުގެ ރޭ ދަންވަރު އިންޓަރ މިލާންގެ އަމިއްލަ ދަނޑުގައި ކުޅުނު ދެ ވަނަ ލެގުގެ އެ ޓީމުން ކާމިޔާބު ކުރީ 4-3 އިންނެވެ.

މި މެޗުގައި ވެސް އިންޓަރ މިލާނުން ވަނީ ފުރަތަމަ ދެ ލަނޑު ޖަހައި ލީޑު ނަގައިފަ އެވެ. ނަމަވެސް ބާސެލޯނާ އިން ވަނީ ފަހަތުން އަރައި ދެ ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

އޭގެ ފަހުން އިތުރު ލަނޑެއް ޖަހައިގެން ބާސެލޯނާ ވަނީ ލީޑު ނަގައިފަ އެވެ. ނަމަވެސް މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އިންޓަރ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އަދި މެޗުގެ އިތުރު ހާފުގައި ލަނޑު ޖަހައިގެން ވަނީ މޮޅުވެފަ އެވެ.

މެޗު ފަށައިގެން 21 ވަނަ މިނެޓުގައި އިންޓަރ މިލާނަށް ލީޑު ނަގައިދިނީ ލައުޓާރޯ މާޓިނޭޒް އެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި އިންޓަރ މިލާނަށް ލިބުނު ޕެނަލްޓީ ކާމިޔާބުކޮށް، ލީޑު ފުޅާ ކޮށްދިނީ ހަކަން ޗަނޮގްލޫ އެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި އެރިކް ގާސިއާ ވަނީ ލަނޑު ޖަހައި ބާސެލޯނާ އަށް ފަރަގު ކުޑަ ކޮށްފަ އެވެ. އޭގެ ހަ މިނެޓު ފަހުން ބާސެލޯނާ އަށް ނަތީޖާ ހަމަހަމަ ކޮށްދިނީ ޑެނީ އޮލްމޯ އެވެ.

މެޗުގައި އިތުރު ލަނޑު ޖެހުމަށް ބާސެލޯނާ އިން ވަނީ ގިނަ ފުރުސަތުތަކެއް ތަނަވަސްކޮށްފަ އެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ރަފީނިއާ ވަނީ ލަނޑު ޖަހައި ބާސެލޯނާ އަށް ލީޑު ނަގައިދީފަ އެވެ.

ނަމަވެސް މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އިންޓަރ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ޑިފެންޑަރު ފްރެންސެސްކޯ އަސާބީ އެވެ.

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމުން، ދެން ކުޅުނު އިތުރު ވަގުތުގެ ދެ ހާފުގެ ތެރެއިން ފުރަތަމަ ހާފުގައި އިންޓަރ އަށް ކުރި ހޯދައިދިނީ ޑޭވިޑް ފަރަޓަސީ އެވެ.

މި ނަތީޖާ އާއެކު އިންޓަރ މިލާނުން ވަނީ އެގްރިގޭޓް ނަތީޖާ 7-6 އިން ކުރި ހޯދައި މުބާރާތުގެ ފައިނަލަށް ދަތުރު ކޮށްފަ އެވެ.