ދ. ވާނީގައި ޓްރެއިނިންގ ހަދަމުންދިޔަ ރެކްރޫޓް ފުލުހެއްގެ ހާލު ސީރިއަސްވެސް ފަރުވާދޭން ފަށައިފިއެވެ.

ފުލުހުން ބުނީ ދ. ވާނީގައި ޓްރެއިނިންގ ހަދަމުންދިޔަ ރެކްރޫޓެއްގެ ހާލު ދެރަވެގެން ފަތިހު ކުޑަހުވަދޫ ހޮސްޕިޓަލަށް ގެންދެވުނު ކަމަށެވެ. އަދި އާދީއްތަ ދުވަހުގެ މެންދުރު ވައިގެ މަގުން މާލެ ގެނެވިފައިވާ ކަމަށެވެ. ފުލުުން ބުނީ އޭނާއަށް މިހާރު ފަރުވާދެމުންދަނީ އައިޖީއެމްއެޗްގައި ކަމަށާއި، އޭނާގެ ހާލު ވަރަށް ކްރިޓިކަލް ކަމަށެވެ.

ރާއްޖެއެމްވީއަށް މައުލޫމާތު ދެމުން ފުލުހުން ބުނީ ހާލު ދެރަވެގެން ފަރުވާދެމުންދަނީ ފިރިހެން ފުލުހަކަށް ކަމަށެވެ.

މައުލޫމާތު ލިބިފައިވާ ގޮތުގައި ހާލުދެރަވެގެން ފަރުވާދެމުންދަނީ ދިވެހި ފުލުހުންގެ ޚިދުމަތާ އަލަށް ގުޅޭ ފުލުހުންނަށް ކުރިއަށް ގެންދާ އަސާސީ ތަމްރީނު ކޯހުގެ 40 ވަނަ ބެޗުގެ ދަރިވަރެކެވެ. ކޯސް ފަށާފައިވަނީ މިދިޔަ މަހުގެ 19 ވަނަ ދުވަހުއެވެ.

މި ކޯހުގައި 138 ފުލުހުން ބައިވެރިވެއެވެ. މީގެ ތެރޭގައި ހިމެނެނީ 41 އަންހެން ފުލުހުންނާއި 97 ފިރިހެން ފުލުހުންނެވެ.

ފުލުހުންގެ އަސާސީ ތަމްރީނު ކޯހަކީ ފުލުހުންގެ ވަޒީފާއަށް ބޭނުންވާ ތަމްރީނާއި ތަރުބިއްޔަތު އުނގަންނައިދީ ފުލުހުންގެ މަސައްކަތަށް ބޭނުންވާ އިލްމީ ގާބިލުކަމާއި ހުނަރާއި ތަޖުރިބާ ލިބިދިނުމަށް ކުރިއަށް ގެންދާ ކޯހެކެވެ. މި ކޯހުގައި ފިޒިކަލް ޓްރެއިނިންގ، އޮޕަރޭޝަނަލް ސޭފްޓީ އެންޑް ޓެކްޓިކްސް އަދި ގާނޫނާއި ގަވާއިދުތަކުގެ އިތުރުން ފުލުހުންގެ މަސައްކަތްތަކާ ގުޅުންހުރި ބައިތައް ކިޔަވައިދޭނެއެވެ.