ރައީސަށް ލަފާދޭ ޒުވާނުންގެ ބޯޑުން އިތުރު ތިން މެންބަރުން އިސްތިއުފާ ދީފި
އިސްތިއުފާ ދީފައިވަނީ އާމިނަތު ރަބާބު އިބްރާހިމް އަދި ނިމާލު ހަމީދު
ޕްރެޒިޑެންޝަލް ޔޫތު އެޑްވައިޒަރީ ބޯޑު މެންބަރުން
ޒުވާނުންނާ ގުޅޭ ކަންކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ލަފާ އެރުވުމަށް އުފެއްދި ޕްރެޒިޑެންޝަލް ޔޫތު އެޑްވައިޒަރީ ބޯޑުގެ މެމްބަރު ކަމުން އިތުރު ތިން މެންބަރުން އިސްތިއުފާ ދީފިއެވެ.
ހޮނިހިރު ދުވަހު އިސްތިއުފާ ދީފައިވަނީ އާމިނަތު ރަބާބު އިބްރާހިމް، ފާތިމަތު ރާއިއާ ޝަރީފް އަދި ނިމާލު ހަމީދެވެ. މި ދެ މެމްބަރުން ވެސް ވަނީ އިސްތިއުފާ ދިންކަން ހާމަކޮށްފައިވަނީ ސޯޝަލް މީޑިއާގައި އާއްމު ކުރި ޕޯސްޓެއްގައެވެ.
މީގެ އިތުރުން ބުރާސްފަތި ދުވަހު މަޝްހޫރު ޓީވީ ޕްރެޒެންޓަރު ހުވައިނާ މުހައްމަދު ނިހާދު (ހުވޭ) ވެސް ވަނީ މެމްބަރު ކަމުން އިސްތިއުފާ ދީފައެވެ.
އިސްތިއުފާ ދިން ތިން މެމްބަރުން ވެސް ވަނީ ހައްވާ ޔުމްނު ވެއްޓުނު ހާދިސާގައި ފުލުހުން އަމަލު ކޮށްފައިވާ ގޮތަށް ނުރުހުންފާޅު ކޮށްފައެވެ. އަދި އަބަދުވެސް ޒުވާނުންނާއެކު ތިބިކަން ފާހަގަކޮށް، އިންސާފަށް މަސައްކަތް ކުރާ ކަމަށް ބުނެފައެވެ.
މިމަހުގެ 18 ވަނަ ދުވަހުގެ ރޭ ފަތިހުގެ ވަގުތެއްގައި ހެންވޭރު ފެންޓެނޯއީ ގޭގެ ނުވަނަ ފަންގިފިލައިން ހ. މިޓާޒް ގޭގެ ފުރާޅުމައްޗަށް އެ އަންހެން ކުއްޖާ ވެއްޓުނު މައްސަލައިގެ ތަހުގީގާ މެދު ހިތްހަމަނުޖެހުން ފާޅުކުރުމަށް ގިނަ އަދަދެއްގެ ޒުވާނުން އަންނަނީ ސިލްސިލާ ގޮތެއްގައި މާލޭގައި މުޒާހަރާ ކުރަމުންނެވެ.
ހުކުރު ދުވަހުގެ ރޭ ކުރިއަށް ގެންދިޔަ މުޒާހަރާގައި ޕްރެޒިޑެންޝަލް ޔޫތު އެޑްވައިޒަރީ ބޯޑުގެ ނައިބު ރައީސްކަން ކުރައްވާ ނަޒާހާ ނަޒީމް ވަނީ މަގާމު ދިފާއުކޮށް ވާހަކަ ދައްކާފައެވެ. އޭނާ ބުނެފައިވަނީ މިހާރު ރާއްޖޭގައި އޮތް ކޮރަޕްޓު ނިޒާމު ރަނގަޅު ކުރެވޭނީ އެ ނިޒާމުގެ ތެރޭގައި ހުރެގެން މަސައްކަތް ކޮށްގެން ކަމަށެވެ. ނަމަވެސް މުޒާހަރާގެ ބައިވެރިން ނާޒާހާ ދެއްކި ވާހަކަތަކާ މެދު ހިތްހަމަ ނުޖޭހަކަން ފާޅުކޮށް އޭނާގެ އިސްތިއުފާ އަށް ގޮވާލަމުން ގެންގޮސްފައި ވެއެވެ.
މިހާތަނަށް ތިން މެމްބަރުން އިސްތިއުފާ ދިންއިރު، އެ ކޮމެޓީގައި ޖުމްލަ 15 މެންބަރުން ހިމެނެއެވެ.
އެއީ ރައީސް އައްޔަނު ކުރެއްވި ދެ މެމްބަރުންނާއި، ގައުމީ ލެވެލްގެ ދެ އެތުލީޓުންނާއި، ފަންނިއްޔާތާއި ފަންނުވެރިކަމުގެ ދާއިރާއިން ދެ މެންބަރުންނާއި, ޒުވާނުން ބާރުވެރިކުރުމުގެ ދާއިރާއިން ދެ މެންބަރުންނާއި، ޔޫތު މިނިސްޓްރީން ކަނޑައެޅި ހަތަރު ދާއިރާއަކުން ހަތަރު މެންބަރުންނާއި އަދި ޔުނިވަރސިޓީގެ ސްޓޫޑަންޓް ޔޫނިއަންގެ ރައީސުންގެ ތެރެއިން ތިން މެންބަރުންނެވެ.
މި ބޯޑުގެ ރައީސްގެ މަގާމުގައި ހުންނެވި ރައީސް އޮފީހުގެ އަންޑަރ ސެކްރެޓަރީ ފޯ ޑިޖިޓަލް ސްޓްރެޓިޖީގެ މަގާމުގައި ހުންނަވާ ދާއޫދު އަހްމަދު އެވެ. ނަމަވެސް މިމައްސަލަ އާއި ގުޅިގެން އެނާގެ އިސްތިއުފާއަށް އެކިފަރާތްތަކުން ގޮވަމުން ގެންދިޔުމާއެކު އޭނާ ވަނީ އިސްތިއުފާ ދެއްވާފައެވެ. އަދި މިހާރު އެނާ ރައިސް އޮފީހުގައި ހުންނެވި މަޤާމުން ވަކި ކުރުމުގެ ބަދަލުގައި މި މައްސަލައާ ގުޅިގެން އޭނާ ވަނީ ސަސްޕެންޑް ކޮށްފައެވެ.
މިކަމާއި ގުޅިގެން ޒުވާނުން ކުރަމުން ގެންދާ މުޒާހަރާތަކުގައި މައިގަނޑު ގޮތެއްގައި ގޮވާލަމުން ދަނީ އިމާރާތުން ވެއްޓުނު ކުއްޖާއަށް އިންސާފު ހޯދައިދިނުމަށާއި، މި ކަމުގައި އިހުމާލުވި ފަރާތްތައް ހައްޔަރުކޮށް އެ ފަރާތްތަކަށް ހައްގު އަދަބު ދިނުމަށެވެ.
މީގެ އިތުރުން ހުކުރު ދުވަހުގެ ރޭ ޒުވާނުން ކުރި މުޒާހަރާގައި ޕޮލިސް ކޮމިޝަނަރު އަލީ ސުޖާއު، ހޯމް މިނިސްޓަރު އަލީ އިހުސާން އަދި ޓްރާންސްޕޯޓް މިނިސްޓަރު މުހައްމަދު އަމީންގެ އިސްތިއުފާއަށް ވަނީ ގޮވާލާފަ އެވެ.
