އިނގިރޭސި ޕްރިމިއާ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން އާސެނަލް އެއްވަރުވެއްޖެ އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ބުދަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރުވެގެންނެވެ.

މެޗުގައި އާސެނަލް އިން ވަނީ ދެ ފަހަރެއްގެ މަތިން ލަނޑު ޖަހައި ކުރި ހޯދައިފަ އެވެ. ނަމަވެސް، ޕެލަސް އިން ވަނީ ދެ ފަހަރު ވެސް ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ތިން ވަނަ މިނެޓުގައި އާސެނަލަށް ކުރި ހޯދައިދިނީ ޖަކޫބް ކިވިއޯ އެވެ. އޭނާ އެ ލަނޑު ޖެހީ މާޓިން އޮޑެގާޑް ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 27 ވަނަ މިނެޓުގައި އެބަރެޗީ އެޒީ ވަނީ ލަނޑު ޖަހައި ޕެލަސް އަށް ނަތީޖާ ހަމަހަމަ ކޮށްދީފަ އެވެ.

ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ދެ ވަނަ ފަހަރަށް އާސެނަލަށް ކުރި ހޯދައިދިނީ ލިއާންޑްރޯ ޓްރޮސާޑް އެވެ. ނަމަވެސް މެޗުގެ ފަހު ދިހަ މިނެޓުގެ ތެރޭގައި ހުއާން ފިލިޕޭ މަޓޭޓާ ޖެހި ލަނޑުން ޕެލަސް ވަނީ ދެ ވަނަ ފަހަރަށް ނަތީޖާ ހަމަހަމަ ކޮށްފަ އެވެ.

މި ނަތީޖާ އާއެކު އާސެނަލް ދެ ވަަނައިގައި އޮތީ 34 މެޗުން 67 ޕޮއިންޓާ އެކު އެވެ. އާސެނަލަށް ވުރެ އެއް މެޗު މަދުން ކުޅެގެން އެއް ވަނައިގައި ލިވަޕޫލް އަށް ލިބެނީ 79 ޕޮއިންޓެވެ.