މަރަށް ހުށަހެޅުނު ޒުވާން އަންހެން ކުއްޖާގެ ދިފާއުގައި އައްޑޫ މީދޫ ދާއިރާގެ މެންބަރު އަބްދުއްރަހުމާން އަޑު އުފުލައިފި
24 އެޕްރީލު 2025 | ބުރާސްފަތި 09:56ނިކަމެތި މީހާ ވީމާ ނިކަމެތިވެފައި އިންސާފު ނުލިބި އޮވެގެން ނުވާނެ
މަޖިލީހުގެ މެންބަރު، އަބްދުލް ރަޙްމާން، އައްޑޫ މީދޫ ދާއިރާ
18 އޭޕްރިލް، ވީ ހުކުރު ދުވަހުގެ ރޭ ފަތިހުގެ ވަގުތެއްގައި ހިނގި ހާދިސާގައި އަނިޔާ ލިބުނު 21 އަހަރުގެ ޒުވާން އަންހެން ކުއްޖާއަށް އިންސާފް ލިބެންޖެހޭ ކަމަށް ބުނެ، އައްޑޫ މީދޫ ދާއިރާގެ މެންބަރު އަބްދުއްރަހުމާން (އައްދު) އަޑު އުފުލައިފި އެވެ.
އެމްޑީޕީން ބުދަ ދުވަހުގެ ރޭ ބޭއްވި 'ކުއްލި އެއްވުމުގައި' ވާހަކަ ދައްކަވަމުން އައްދު ވިދާޅުވީ ކޮންމެ މީހަކަށްވެސް އިންސާފް ލިބެންޖެހޭނެ ކަމަށާއި ނިކަމެތި މީހާ ވީމާ ނިކަމެތިވެފައި އިންސާފު ނުލިބި އޮވެގެން ނުވާނެ ކަމަށެވެ.
އެހެންކަމުން މިސަރުކާރުންވެސް ވަކި ކޮޅަކަށް ނުޖެހި 21 އަހަރުގެ ޒުވާން އަންހެން ކުއްޖާއަށް އިންސާފު ޤާއިމްކޮށްދިނުމަށް އައްދު ވަނީ ގޮވާލާފައެވެ.
ފުރާޅެއްގެ މައްޗަށް ވެއްޓިފައި އޮއްވައި ފެނުނު އުމުުރުން 21 އަހަރުގެ ޒުވާން އަންހެން ކުއްޖާ ވެއްޓުމުގައި އެހެން މީހެއްގެ އަތެއް ނެތް ކަމަށާއި ފުއްމާލީ އަމިއްލައަށް ކަމަށް ފުލުހުން ވަނީ ބުނެފަ އެވެ.
މިމައްސަލަ ފުލުހުންނަށް ރިޕޯޓުކުރީ ހުކުރު ދުވަހު ހެނދުނު 7:23 ކަންހާއިރުގައި ކަމަށް ފުލުހުން ބުންޏެވެ.
މި މައްސަލައާއި ގުޅިގެން އަންނަނީ ތަފާތު އެކިގޮތްގޮތަށް ވާހަކަތައް ދެކެވެމުން ނެވެ. އެގޮތުން އެ އަންހެން ކުއްޖާ ފުރާޅުމައްޗަށް ވެއްޓިފައި ވަނީ އަމިއްލައަށް ނޫން ކަމަށާއި އެކުއްޖާ ވައްޓާލާފައި ވަނީ ބަޔަކު ގަސްދުގައި ކަމަށް ތުހުމަތު ކޮށް ވާހަކަތައް ދެކެވިފައި ވެއެވެ. މިކަމާއި ގުޅިގެން ބުދަ ދުވަހުގެ ރޭ ފުލުހުންގެ އިދާރާ ކައިރީގައި ވަނީ އެއްވެ އިހްތިޖާޖްކޮށްފައެވެ.
