ހަގީގަތުގައި 54 އަހަރު މޯލްޑިވްސް ކަރެކްޝަންސް ސަރވިސް އަށް ވީ އިރު ބޯހިޔާވަހިކަމުގެ ފުރުސަތު ލިބިގެން ދިޔައީ ނިމިދިޔަ ސަރުކާރުގައި ކަމަށް ކަރެކްޝަންގެ ޑެޕިއުޓީ ކޮމިޝަނަރ އޮފް ޕްރިޒަންސް، އިބްރާހިމް މުހައްމަދު ދީދީ ވިދާޅުވެއްޖެއެވެ.

އޭނާ އެފަދައިން ވިދާޅުވި އަންގާރަ ދުވަހު ޕެޓިޝަން ކޮމިޓީގައި ވާހަކަދައްކަވަމުންނެވެ.

އެ ކޮމިޓީ އަކީ ކަރެކްޝަންސް އިން ހުށަހަޅާފައިވާ ޕެޓިޝަނަކާއި ގުޅިގެން ބޭއްވި ޕެޓިޝަން އެކެވެ. އެ ޕެޓިޝަނަކީ މަދަނީ މުވައްޒަފުންނަށް ހައުސިން އެލަވެންސް ނުލިބޭތީ ހުށަހެޅި ޕެޓިޝަނެކެވެ. މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވަނީ ހައުސިން މަޝްރޫޢު އަށް ޕޮއިންޓް ދޭ އިރު އަމަލުކުރި ގޮތާއި، އެލަވަންސް ދޭން ވުމުން އަމަލު ކުރާ ގޮތާއި ތަފާތުވާ ސަބަބާއި މެދު ސުވާލު އުފައްދާފައެވެ.

ޖަލު އޮފިސަރުންނާއި މުވައްޒަފުންގެ އެންމެ ބޮޑު އެއް ކަންބޮޑުވުމަކީ ބޯހިޔާވަހިކަމުގެ ދަތިކަން ކަމަށާއި، އެކަން ހައްލުކޮށް ދިނުމަށް ފަސޭހަ އިންތިޒާމެއް ހަމަޖައްސައި ދެއްވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވަނީ ވައުދުވެވަޑައިގަންނަވާފައެވެ. މޯލްޑިވްސް ކަރެކްޝަނަލް ސާވިސްގެ އަހަރީ ދުވަސް ފާހަގަ ކުރަން 6 ސެޕްޓެމްބަރ 2022ގައި ބޭއްވި ޖަލްސާގައި އޭރު ރައީސް ސާލިހު ވިދާޅުވީ ޖަލުތަކުގެ އެކޮމަޑޭޝަންގެ ތާށިކަމާއި މުވައްޒަފުންގެ ބޯހިޔާވަހިކަމުގެ ދަތިކަން ހައްލުކޮށްދެއްވާނެ ކަމަށެވެ.

އެ ވައުދާއި އެއްގޮތަށް 100 ހައުސިން ޔުނިޓް ކަރެކްޝަންސް އަށް ޚާއްސަކޮށްގެން ހުޅުވާލިއެވެ. އަންގާރަ ދުވަހުގެ ކޮމިޓީގައި ޑެޕިއުޓީ ކޮމިޝަނަރ އޮފް ޕްރިޒަންސް، އިބްރާހިމް މުހައްމަދު ދީދީ ވަނީ އެ މަޝްރޫެުގެ ދަށުން ބޯހިޔާވަހިކަން ލިބޭނެ މަގުފަހި ކުރުމަށް ފޯމުތަކެއް އެކުލަވާލާ ފުރުސަތު ހުޅުވާލި ކަމަށް ފާހަގަކުރައްވާ އެކަމުގެ ތަފްސީލްތައް ހިއްސާކުރައްވާފައެވެ.

އެ ކޮމިޓީގައި ކަރެކްޝަންސްގެ ފަރާތުން ވަނީ މަދަނީ މުވައްޒަފުންނަށް ލިވިން އެލަވެންސް ނުލިބޭތީ އެކަމާއި މެދު ކަންބޮޑުވުން ފާޅުކުރައްވާފައެވެ. ކަރެކްޝަންސް އިން އެދެނީ ހައުސިން އެލަވެންސް ހަރުދަނާކޮށް އެ މައްސަލަ އަށް ހައްލު ހޯދާދިނުމަށެވެ. އަންގާރަ ދުވަހު މަޖިލީހުގައި މެމްބަރުން ވަނީ އެކަމާއި ގުޅޭގޮތުން އެކުަލަވާލާފައިވާ އުސޫލުތަކާއި މެދު ސުވާލުކޮށް އެ މައްސަލަ ހައްލުކުރުމަށް ބޭނުންވާ ކަންކަން ސާފުކޮށްފައެވެ.

އަންގާރަ ދުވަހު ކޮމިޓީގައި ގައިދީން ބެލެހެއްޓުމާއި، ޖާގައިގެ ދަތިކަމާއި މެދު ވެސް ކަރެކްޝަންސް އިން ވާހަކަދައްކާފައިވެއެވެ.

ކަރެކްޝަންސް އިން ހުށަހެޅި ޕެޓިޝަންގައި 44 މުވައްޒަފުން ވަނީ ސޮއިކޮށްފައެވެ.