"ނުކުޅެދުންތެރިކަން ހުންނަ މީހުންނަށް އިހުމާލުވާ މައްސަލަ ބޭރުކޮށްލުމުން އެނގެނީ ސަރުކާރުގެ އެއްވެސް އިންސާނިއްޔަތުކަމެއް ނެތް ކަން"
ނުކުޅުދުންތެރިކަން ހުންނަ މީހުންނާއި، ކުޑަ ކުދިންނާއި މެދު ވަމުންދާ އިހުމާލަކީ ކުދިންނަށް ދެވޭ ވަރަށް ބޮޑު އަނިޔާ އެއް ކަމަށް ކުޑޫ ވިދާޅުވި
އެމްޑީޕީ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުން
ނުކުޅެދުންތެރިކަން ހުންނަ ފަރާތްތަކަށް ބޭނުންވާ ސިއްހީ އެހީތެރިކަމާއި އިޖުތިމާއީ ޒިންމާ އޮތް މުއައްސަސާތަކުން އިހުމާލުވަމުންދާތީ ރައްޔިތުންގެ މަޖިލީހަށް ބަލައި ނުގަނެ ބޭރުކޮށްލުމުން އެނގެނީ ސަރުކާރުގެ އެއްވެސް އިންސާނިއްޔަތުކަމެއް ނެތް ކަން ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް (ކުޑޫ) ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
މި ކުއްލި މައްސަލަ އަކީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް (ކުޑޫ) ހުށަހެޅުއްވި މައްސަލައެކެވެ. ނުކުޅުދުންތެރިކަން ހުންނަ މީހުންނާއި، ކުޑަ ކުދިންނާއި މެދު ވަމުންދާ އިހުމާލަކީ ކުދިންނަށް ދެވޭ ވަރަށް ބޮޑު އަނިޔާ އެއް ކަމަށް ވެސް އޭނާ ވަނީ ވިދާޅުވެފައެވެ. މިއީ ސަރުކާރުގެ މެމްބަރުންގެ ފަރާތުން ފެނުނު ވަރަށް ލަދުވެތި މަންޒަރެއް ކަމަށް ކުޑޫ ވަނީ ވިދާޅުވެފައެވެ. މި މައްސަލަ ބޭރުކޮށްލުމުން ކުޑޫ ވަނީ މިކަމާއި ގުޅުން ހުރި ޕެޓިޝަނެއް އަނެއްކާވެސް މަޖިލީހަށް ހުށަހަޅުއްވާފައެވެ.
އޭނާ ވަނީ މި މައްސަލަ ބޭރުކުރަން ވޯޓު ދިން މަޖިލީސް މެމްބަރުންގެ ތެރޭގައި ޚާއްސަ އެހީ އަށް ބޭނުންވާ ކުދިންގެ ބެލެނިވެރިން ވެސް ތިބި ކަމަށް ފާހަގަކުރައްވާފައެވެ. އެހެންކަމުން ޚާއްސަ އެހީ އަށް ބޭނުންވާ ކުދިންގެ ބެލެނިވެރިންގެ ޝަކުވާތައް އެހާ ގިނަ އިރު މިފަދަ މައްސަލަ އެއް ބެރުކޮށްލުމަކީ ވަރަށް ދެރަވަރުކަމެއް ކަމަށް އޭނާ ވިދާޅުވިއެވެ.
އެމްޑީޕީ ޕީޖީ ގްރޫޕްގެ ނޫސްވެރިންގެ ބައްދަލުވުމުގައި ކެންދޫ ދާއިރާގެ މެމްބަރު މައުރޫފް ޒާކިރު އާއި ވައިކަރަދޫ ދާއިރާގެ މެމްބަރު ހުސެއިން ޒިޔާދު އާއި ދެ ބޭފުޅުން ވެސް ވަނީ މި މައްސަލަ ބޭރުކޮށްލުމުން އެ ކަމަށް ފާޑު ވިދާޅުވެ ވާހަކަދައްކަވާފައެވެ. އެގޮތުން ނުކުޅުދުންތެރިކަން ހުރި މީހުންނަށް ދޭންވާ އެހީ އާއި ޚިދުމަތް ނުދެވި އެކަން ރައީސަށް އެނގިވަޑައިނުގަންނަވާ ކަަމަށް ސަރުކާރުން ބުނަމުންދާތީ އެ ބޭފުޅުން ކަންބޮޑުވުން ފާޅުކުރެއްވިއެވެ.
ޒިޔާދު ވަނީ 2000-3000 ރުފިޔާ ދިނުމަށް ފަހު ތެރަޕީ ސެޝަން އެއް ނެގުމަކީ އާދައިގެ މީހާ އަށް ކުޅަދާނަ ކަމެއް ނޫން ކަމަށް ވިދާޅުވެފައެވެ. އެހެންކަމުން އެކަމަށް އެހީ އަށް އެދި ހުށަހެޅުމުން ތެރަޕީ ދޭން ޖެހޭ މުއްދަތު ހޭދަވާ އިރު ވެސް އެހީ ނުލިބޭ ކަމަށް ޒިޔާދު ވިދާޅުވިއެވެ. އެކަމުގެ ނަތީޖާ އަކީ ދޭން ޖެހޭ މިންވަރަށް އެކަށީގެންވާ ގޮތަށް ތެރަޕީގެ ޚިދުމަތް ވެސް ނުލިބޭ ކަމަށް ޒިޔާދު ވަނީ ވިދާޅުވެފައެވެ.
ނުކުޅެދުންތެރިކަން ހުންނަ ފަރާތްތަކަށް ބޭނުންވާ ސިއްހީ އެހީތެރިކަމާއި އިޖުތިމާއީ ޒިންމާ އޮތް މުއައްސަސާތަކުން އިހުމާލުވަމުންދާތީ ހުށަހެޅި މައްސަލަ މަޖިލީހަށް ބަލައިގަންނަން ވޯޓުގައި ބައިވެރިވި 56 މެންބަރުންގެ ތެރެއިން 12 މެންބަރުން ވޯޓުދެއްވިއެވެ. އަދި އެ މައްސަލަ ބަލަައިނުގަންނަން 44 މެންބަރުން ވޯޓު ދެއްވިއެވެ.
ކުޑޫ ހުށަހެޅުއްވި މައްސަލައިގައި ބުނެފައި ވަނީ ޤާނޫނުއަސާސީގެ 17 ވަނަ މާއްދާގައި ކަނޑައަޅާފައިވާ ގޮތުން އަސާސީ ހައްގުތައް ލިބިދިނުމުގައި މީހެއްގެ ހުރި ޖިސްމާނީ ނުވަތަ ނަފްސާނީ ނުކުޅުދުންތެރިކަމަށް ބިނާކޮށް އެއްވެސް ބާވަތެއްގެ ތަފާތުކުރުމެއް ގެންގުޅުމަކީ ޤާނޫނުއަސާސީގެ 17 ވަނަ މާއްދާ އިން މަނާކުރާ ކަމެއް ކަމަށެވެ. އަދި މުޖުތަމައުގެ އާއްމު ހާލަތަށްވުރެ ނިކަމެތިކަމެއް ލިބިފަވާ މީހަކަށް ނުވަތަ ބަޔަކަށް ނުވަތަ އިޖްތިމާއީ ރައްކާތެރިކަން ލިބެން ޖެހޭ ބަޔަކަށް އެހީވުމަށް، ނުވަތަ ރައްކާތެރިކަން ދިނުމަށް ކުރާ ކަންކަމަކީ ތަފާތުކުރުންކަމުގައި ނުބެލެވޭނެކަން އެ މަައްސަލައިގައި ފާހަގަކޮށްފައިވެއެވެ.
