" (އައިޔޫއެމް) ސަނާބިލްގެ ބޭނުމަކީ ޔުނިވަރސިޓީ އަށް އާމްދަނީ ހޯދުން، ތަނުގެ ބޭނުން ޔުނިވަރސިޓީ އަށް ހިފޭނެ ކަމަށް ޤަބޫލުކުރެވޭ."
މި ޢިމާރާތް ނިންމުމަށް ކަނޑައަޅާފައިވަނީ 18 މަސްދުވަހުން
(އައިޔޫއެމް) ސަނާބިލްގެ އަމަލީ މަސައްކަތް ފެއްޓުމުގެ ރަސްމިއްޔާތު
(އައިޔޫއެމް) ސަނާބިލްގެ ބޭނުމަކީ ޔުނިވަރސިޓީ އަށް އާމްދަނީ ހޯދުންކަމަށް ވީ ނަމަވެސް ކޮންމެވެސް ވަރަކަށް ތަނުގެ ބޭނުން ޔުނިވަރސިޓީ އަށް ހިފޭނެ ކަމަށް ޤަބޫލުކުރެވޭ ކަމަށް އިސްލާމިކް ޔުނިވަރސިޓީ (އައިޔޫއެމް)ގެ ވައިސް ޗާންސެލަރ ޑރ. ޢަލީ ޒާހިރު ވިދާޅުވެއްޖެއެވެ.
އޭނާ އެފަދައިން ވިދާޅުވީ އިސްލާމިކް ޔުނިވަރސިޓީ (އައިޔޫއެމް) ސަނާބިލް އިމާރާތުގެ ބިންގާ އަޅާ، އެތަނުގެ އަމަލީ މަސއްކަތް ފެށުމަށް ހޮނިހިރު ދުވަހު ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ހޮނިހިރު ދުވަހު ހަވީރު އެ އިމާރާތުގެ ބިންގާ އަޅުއްވާ ދެއްވީ ރައީސް ޑރ.މުހައްމަދު މުއިއްޒު އާއި އައިޔޫއެމްގެ ވައިސް ޗާންސެލަރ ޑރ. ޢަލީ ޒާހިރު އެވެ.
ޑރ.އަލީ ޒާހިރު ވަނީ އެ އިމާރާތާއި އެކު ޔުނިވަރސިޓީ އަށް ދިމާވެފައިވާ ޖާގައިގެ ދަތިކަމަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށް ވިދާޅުވެފައެވެ. މިއީ އޭނާ މަޤާމާއި ހަވާލުވުމަށް ފަހު އެންމެ އިސްކަމެއް ދިން މަސައްކަތް ކަމަށް އޭނާ ވަނީ ވިދާޅުވެފައެވެ.
އެ ރަސްމިއްޔާތުގައި ވާހަކަދައްކަވަމުން ބެންކް އޮފް މޯލްޑިވްސްގެ ސީއީއޯ މުހައްމަދު ޝަރީފް ވިދާޅުވީ އެ އިމާރާތް އެޅުމަށް ސުކޫކްގައި ބީއެމްއެލް އިން އިންވެސްޓްކުރުމަކީ ރާއްޖޭގެ އިގްތިސާދީ އަދި އިޖްތިމާއި ތަރައްގީއަށް އެ ބޭންކުން ދޭ އެހީތެރިކަން ހާމަވާ ކަމެއް ކަމަށެވެ.
އިސްލާމިކް ޔުނިވަރސިޓީން ބުނެފައި ވަނީ އެ އިމާރާތަކީ ރާއްޖޭގެ ތައުލީމަށް މުހިންމު އިމާރާތަކަށް ވާނެ ކަމަށެވެ. އެއީ ދިވެހި ތައުލީމްގެ މުހިންމު ރަމްޒެއް ކަމަށް އައިޔޫއިމްއިން ބުނެއެވެ. އެއީ 2004 ވަނަ އަހަރު ކުއްލިޔަތުއް ދިރާސަތުއް އިސްލާމިއްޔާ ވުޖޫދުވި ފަހުން އެ އިލްމީ މުއައްސަސާއަށް ނިސަބްތްވެގެން އިމާރާތްކުރާ ފުރަތަމަ ބިނާ ކަމަށް އައިޔޫއިމް އިން ވަނީ ބުނެފައެވެ.
ހަމައެހެންމެ މިއީ އިސްލާމިކް ފައިނޭންސާއި އެއްގޮތަށް ސުކޫކަށް އިޝޫކޮށްގެން ފައިނޭންސް ރެއިޒްކޮށްގެން ރާއްޖޭގައި ބިނާ ކުރާ ފުރަތަމަ ފަހަރުކަމަށާއި، މިއީ އިލްމީ ބިނާއަކުން އިޝޫކުރި ސުކޫކަކަށް ބެންކަކުން ރާއްޖޭގައި އިންވެސްޓްކުރި ފުރަތަމަ ފަހަރު ކަމަށް އައިޔޫއެމްއިން ވަނީ ބުނެފައެވެ.
މަތީ ތައުލީމަށް ހާއްސަކޮށްގެން އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) އިން ހުޅުމާލޭގައި އަޅަން ނިންމާފައިވާ ހަތްބުރީގެ އިމާރާތްކުރުމަށް ހިންގާ ސަނާބިލް ޕްރޮޖެކްޓަށް ބީއެމްއެލް އިސްލާމިކް އިން ބޮޑު އިންވެސްޓްމަންޓެއް ކޮށްފައި ވަނީ 2024 ވަނަ އަހަރުގެ އޮގަސްޓް މަހުގައެވެ.
މި މަޝްރޫޢުގެ ދަށުން ޔުނިވަރސިޓީގެ ބިމެއްގައި 7 ބުރީގެ "މިކްސްޑް-ޔޫޒް ކޮމްޕްލެކްސް" އެއް ބިނާކުރުމަށް ވަނީ ހަމަޖެހިފައެވެ. މިގޮތުން މި އިމާރާތުގައި އޮފީސް ސްޕޭސްތަކާއި، ފުޑް ކޯޓާއި، މީޓިންގ ރޫމްތަކާއި، އޮޑިޓޯރިއަމް އަދި ކޮމާޝަން ޕާކިންގ ޖާގަތައް ހިމެނެއެވެ.
މި މަޝްރޫޢަކީ އިސްލާމިކް ފައިނޭންސްގެ ޞުކޫކް މޮޑެލްގެ ދަށުން ފައިސާ ހޯދައިގެން ޢިމާރާތެއް އެޅުމަށް ރާއްޖޭގައި ހިންގޭ އެންމެ ފުރަތަމަ މަޝްރޫޢެވެ. މި މަޝްރޫޢު ހިންގުމަށް ދިވެހިރާއްޖޭގެ ކެޕިޓަލް މާކެޓްގައި 1 މަސްދުވަހުގެ މުއްދަތަށް އައި.ޔޫ.އެމްގެ ޞުކޫކު (ޞުކޫކު އިސްތިސްނާޢު) ސަބްކްރިޕްޝަންއަށް ހުޅުވާލީ 11 އޮގަސްޓް 2024 ގައެވެ. އަދި މުއްދަތު ހަމަވިއިރު ސަބްސްކްރައިބްކޮށްފައި ވަނީ ބޭންކް އޮފް މޯލްޑިވްސްގެ ބީ.އެމް.އެލް އިސްލާމިކް އިންނެވެ.
މި ޢިމާރާތް ނިންމުމަށް ކަނޑައަޅާފައިވަނީ 18 މަސްދުވަހުންނެވެ.
