ޤައުމީ ޔުނިވަރސިޓީގެ "ފަހި ދުވަސް" ފަށައިފި

ދިވެހިރާއްޖޭގެ ޤައުމީ ޔުނިވަރސިޓީގެ "ފަހި ދުވަސް" ރަސްފަންނުގައި ހޮނިހިރު ދުވަހު ފަށައިފިއެވެ.

2018 ވަނަ އަހަރުގެ ޖަނަވަރީ މަހު އެ ޔުނިވަރސިޓީއިން ފަށާ ކޯސްތަކާއި ބެހޭ މަޢުލޫމާތު ޢާންމުންނާއި ވީހާވެސް ގާތުން ފޯރުކޮށްދިނުމަށް އެ ޔުނިވަރސިޓީއިން އިންތިޒާމް ކޮށްގެން ކުރިއަށް ގެންދާ "ފަހި ދުވަސް" ރަސްފަންނުގައި ފައްޓަވައި ދެއްވީ، ދިވެހިރާއްޖޭގެ ޤައުމީ ޔުނިވަރސިޓީގެ ސްޓޫޑަންޓް ޔޫނިއަން ގެ ރައީސް ޢަލީ ރަޝީދެވެ.

މިއަދު ހަވީރު 16:00 ގައި ފެށި ފަހި ދުވަހުގެ ހަރަކާތްތައް މި އޮކްޓޫބަރު މަހުގެ 7 ވަނަ ދުވަހުގެ ނިޔަލަށް ކުރިއަށްދާނެ ކަމަށް އެމްއެންޔޫއިން މައުލޫމާތުދެއެވެ. ފަހި ދުވަހުގެ ހަރަކާތްތައް ކުރިއަށްދާނީ އޮކްޓޫބަރު 6 ވަނަ ދުވަހު ހަވީރު 16:00 އިން 18:00އަށް އަދި ރޭގަނޑު 20:00 އިން 22:00އަށެވެ. އަދި 7 ވަނަ ދުވަހުގެ ހަވީރު 16:00 އިން 18:00 އަށް ރަސްފަންނުގައެވެ.

ފަހި ދުވަހަކީ، އެ ޔުނިވަރސިޓީއިން ހުޅުވާލާފައިވާ ކޯސްތަކާއި ބެހޭ މަޢުލޫމާތު، އެއް މާޙައުލެއްގެ ތެރެއިން ފަހި ކޮށްދޭ އިވެންޓެކެވެ. ދިވެހިރާއްޖޭގެ ޤައުމީ ޔުނިވަރސިޓީއިން ހިންގަމުންދާ ހުރިހާ ފެކަލްޓީތަކަކާއި މަރުކަޒުތަކެއް ބައިވެރިވެގެން ކުރިއަށް ގެންދާ މި ހަރަކާތަކީ، ތަޢުލީމު ހާޞިލުކުރަން ބޭނުންވެފައި ތިބި ފަރާތްތަކަށް އެކަމުގައި މަގު ދައްކައިދީ، މަގު ފަހިކޮށްދިނުމުގެ ނިޔަތުގައި ހިންގާ ހަރަކާތެކެވެ. ކޯސްތަކާއި ބެހޭ މަޢުލޫމާތު ދިނުމުގެ އިތުރުން ކޮންމެ ސްޓޯލަކުން ވެސް ތަފާތު ތަޢުލީމާއި ގުޅުން ހުރި ކުޅިވަރުތައް ކުރިއަށް ގެންދާނެއެވެ. އަދި ކޮންމެ ކުޅިވަރެއް ކުޅުމަށް ފަހު ހަދިޔާ ލިބިގެންދާނެއެވެ. ފަހި ދުވަހުގައި ބައިވެރިވުމަށް ޒިޔާރަތް ކުރާ ބޭފުޅުންނަށް ލަކީ ޑްރޯ އެއްގައި ބައިވެރި ވުމުގެ ފުރުސަތުވެސް ވަނީ ހުޅުވާލެވިފައެވެ. މި ލަކީ ޑްރޯގެ އިނާމެއްގެ ގޮތުގައި ހަމަޖެހިފައި ވާނީ މޯލްޑިވިއަން އިން ރާއްޖޭގައި ދަތުރު ކުރާ މަންޒިލަކަށް ދެކޮޅު ޓިކެޓެވެ. މި އިނާމު ސްޕޮންސަރ ކޮށްދެއްވާފައިވަނީ މޯލްޑިވިއަން އިންނެވެ.

މިއަހަރުގެ ފަހި ދުވަހުގައި ވެސް ސެޓްފިކެޓްތައް އެޓެސްޓް ކޮށްދިނުމާއި ކޯސްތަކަށް ވަންނަން އެދޭ ކުދިންގެ ފޯމް ފުރައިދީ އަދި ފޯމް ބަލައިގަތުމުގެ ޚިދުމަތް ވެސް ލިބިގެންދާނެ ކަމަށް އެމްއެންޔޫއިން ބުނެއެވެ.

ގައުމީ ޔުނިވާސިޓީން އަންނަ އަހަރުގެ ޖަނަވަރީ މަހަށް ސެޓްފިކެޓް ލެވެލް އިން ފެށިގެން މާސްޓާސް ކޯހާ ހަމައަށް 122 ކޯހެއް ފެށުމަށް ހަމަޖެހިފައިވާއިރު 5300 އަށް ވުރެ ގިނަ ޖާގަ ވަނީ ހުޅުވާލައިފައެވެ. އަދިކޯސްތަކަށް މިދިޔަ ސެޕްޓެމްބަރު މަހުގެ 24 ވަނަ ދުވަހުން ފެށިގެން ފޯމް ބަލައިގަންނަން ވަނީ ފަށާފައެވެ.

ގައުމީ ޔުނިވާސިޓީން ބުނީ، މިއަންނަ އަހަރުގެ ކޯސްތަކަށް ވަނުމަށް އެދި ފޯމް ހުށައަޅާއިރު އިސްކަންދޭނީ ކޯސްތަކަށް އެދި ފޯމު ހުށައަޅާ ތަރުތީބުން ކަމަށެވެ.