މިހާރު ކުރިއަށްދާ، ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) ފުޓުބޯޅަ މުބާރާތުގައި އެފްސީ ފަރުކަނާ ދެކޮޅަށް ކުޅުނު މެޗުން މޮޅުވެ، ކެމަލް އިން މުބާރާތުގެ ފައިނަލްގެ އުންމީދު ހޯދައިފި އެވެ.

ފީއަލީ ފުޓުބޯޅަ ދަނޑުގައި އާދީއްތަ ދުވަހުގެ ހަވީރު ކުޅުނު މެޗު ކެމަލް އިން ކާމިޔާބު ކުރީ 5-3 އިންނެވެ. މެޗުގައި ފަރުކަން އިން ލީޑު ނަގާފައި ވަނިކޮށް، ކެމަލް އިން ވަނީ ފަހަތުން އަރައި މޮޅުވެފަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ފަރުކަނަށް ލީޑު ނަގައިދިނީ ޝާއިފް ޢަބްދުލް ޙަމީދު އެވެ. އޭގެ ފަހުން މެޗުގެ 34 ވަނަ މިނެޓުގައި ކެމަލް އިން ނަތީޖާ ހަމަހަމަ ކުރީ، މުޙައްމަދު އަހުސާމް ޖެހި ލަނޑުންނެވެ.

މެޗުގެ ފުރަތަމަ ހާފު ނިމުމުގެ ކުރިން ފަރުކަން އިން ވަނީ ދެ ވަނަ ލަނޑެއް ޖަހައި، ދެ ވަނަ ފަހަރަށް ލީޑު ނަގައިފަ އެވެ. އެ ލަނޑު އެ ޓީމަށް ޖަހައިިދިނީ ސާއިދު ޢަބްދުލް ޙަމީދު އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ވިޝާލް ވަނީ ފަރުކަންގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ދެ މިނެޓު ފަހުން މޫސާ އަޙުމަދު ޖެހި ލަނޑާއެކު، ކެމަލް އިން ފަރަގު ކުޑަ ކުރި އެވެ.

އަދި އެ ޓީމަށް މެޗުގެ ނަތީޖާ ހަމަހަމަ ކޮށްދިނީ އަހުސާމް އެވެ. އޭގެ ފަހުން ފަވާޒް ޢަބްދުﷲ ޖެހި ލަނޑާ އެކު، ކެމަލް އިން ލީޑު ނެގި އެވެ. އަދި އެ ޓީމުގެ ފަސް ވަނަ ލަނޑު ޖަހައި އިތުރަށް ލީޑު ފުޅާ ކުރީ އަހުސާމް އެވެ. އެއާ އެކު އޭނާ ވަނީ މެޗުގައި ހެޓްރިކް ހަމަކޮށްފަ އެވެ.

މިއީ މުބާރާތުގައި މި ދެ ޓީމުގެ ވެސް ތިން ވަނަ މެޗެވެ. ދެ މެޗުން ފަރުކަން މޮޅުވެފައިވާއިރު، އެއް މެޗުން ބަލިވީ އެވެ. ކެމަލް ވަނީ ދެ މެޗުން އެއްވަރުވެ، އަނެއް މެޗުން މޮޅުވެފަ އެވެ.

ލީގު އުސޫލުން ކުޅޭ މުބާރާތުގެ ފައިނަލަށް ދާނީ، ލީގު ބުރުގެ އެއް ވަނަ ޓީމާއި، ދެ ވަނަ ޓީމެވެ. ކޮންމެ ޓީމަކަށް ވެސް މުބާރާތުގައި ބާކީ އެއް މެޗު އޮތްއިރު، ދެ ޓީމަށް ވެސް ފައިނަލްގެ ޖާގަ ހޯދުމުގެ ފުރުސަތު އެބަ އޮތެވެ.