ވެލާނާ އިންޓަނޭޝަނަލް އެއާޕޯޓު (ވީއައިއޭ) ފުރަން ދިޔަ މީހެއްގެ އަތުން ވަޒަންތަކެއް ފެނިއްޖެއެވެ.

ހޮނިހިރު ދުވަހު ފުލުހުން ބުނީ ހުކުރު ދުވަހުގެ ރޭ ވީއައިއޭއިން ފުރަން ދިޔަ ބިދޭސީއެއްގެ އަތުން ވަޒަންތަކެއް ފެނިފައިވާ މައްސަލައެއް ތަހުގީގު ކުރަމުންދާ ކަމަށެވެ.

ފުލުހުން ބުނީ އެއީ ޓޫރިސްޓް ވިސާގައި ރާއްޖެއަށް އައުމަށްފަހު ފުރަން ދިޔަ މީހެއް ކަމަށެވެ.

މީގެ އިތުރުން ފުލުހުން ބުނީ މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނައި މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 6 ދުވަހަށް ބަންދު ކުރުމަށް އަމުރުކޮށްފައިވާ ކަމަށެވެ.

ޓޫރިސްޓް ވިސާގައި ރާއްޖެއަށް އެތެރެވި މީހެއް ކަމަށް ފުލުހުން ބުނެފައިވާތީ، އެމީހާ ރާއްޖެއަށް އެތެރެވެފައިވަނީ ވަޒަންތަކާއެކު ތޯ ސުވާލުކުރި ނަމަވެސް މިމައްސަލައާ ގުޅިގެން އިތުރު ތަފްސީލެއް ފުލުހުން ހާމަކޮށްފައިނުވެއެވެ.

ފުލުހުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.