ކ. މާލެ
|
4 އޭޕްރިލް 2025 | ހުކުރު 15:49
އިނގިރޭސި ޕްރިމިއާ ލީގުގައި ޗެލްސީ އާއި ޓޮޓްނަމް ބައްދަލުކުރި މެޗުގެ ތެރެއިން
އިނގިރޭސި ޕްރިމިއާ ލީގުގައި ޗެލްސީ އާއި ޓޮޓްނަމް ބައްދަލުކުރި މެޗުގެ ތެރެއިން
ގޫގުލް
ޕްރިމިއަރ ލީގު
ޓޮޓްނަމް އަތުން ޗެލްސީ މޮޅުވެއްޖެ
ލަންޑަނުގެ ސްޓެމްފަޑް ބްރިޖުގައި ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، އަނިޔާގެ ސަބަބުން ކުޅުމާއި ދުރުގައި ހުރި ޗެލްސީގެ ފޯވާޑް ނިކޮލަސް ޖެކްސަންގެ އިތުރުން ކޯލް ޕާމާ ވަނީ މި މެޗުގެ ފުރަތަމަ އެގާރައިގައި ހިމެނިގެ ކުޅެފައި

އިނގިރޭސި ޕްރިމިއަރ ލީގުގައި ބުރާސްފަތި ދުވަހުގެ ރޭ ޓޮޓްނަމް ހޮޓްސްޕަރ އަތުން 1-0 ގެ ނަތީޖާއަކުން ޗެލްސީ މޮޅުވެއްޖެ އެވެ.

ލަންޑަނުގެ ސްޓެމްފަޑް ބްރިޖުގައި ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، އަނިޔާގެ ސަބަބުން ކުޅުމާއި ދުރުގައި ހުރި ޗެލްސީގެ ފޯވާޑް ނިކޮލަސް ޖެކްސަންގެ އިތުރުން ކޯލް ޕާމާ ވަނީ މި މެޗުގެ ފުރަތަމަ އެގާރައިގައި ހިމެނިގެ ކުޅެފައެވެ.

މި މެޗުގެ ފުރަތަމަ ހާފުގައި ޗެލްސީއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް އެ ޓީމަށް ވަނީ އެ ފުރުސަތުތަކުގެ ބޭނުން ހިފޭ ގޮތް ނުވެފަ އެވެ. އެގޮތުން މެޗުގެ ފުރަތަމަ ހާފުގެ ކުޅުން ނިމިގެން ދިއައީ އެއްވެސް ޓީމަކަށް ލަނޑެއް ނުޖެހި އޮވެގެންނެވެ.

ޗެލްސީން މި މެޗުގައި ޖެހި ހަމައެކަނި ލަނޑު ދެވަނަ ހާފުގެ ކުޅުން ފެށުނުތާ ފަސްވަނަ މިނިޓުގައި ކޯލް ޕާމާ ދިން ޕާހަކުން ކާމިޔާބުކޮށްފައިވަނީ އާޖެންޓީނާގެ މިޑްފީލްޑަރު އެންޒޯ ފެނާންޑޭޒް އެވެ.

އަދި މި ލަނޑު ޗެލްސީން ޖެހިތާ ގިނައިރުތަކެއް ނުވަނީސް މޮއިސެސް ކައިސޭޑޯ ވަނީ އިތުރު ލަނޑެއް ލަނޑެއް ޖަހާ މެޗުގެ ފަރަގު ބޮޑުކޮށްފަ އެވެ. ނަމަވެސް ވީއޭއާރު ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. ހަމަ އެގޮތަށް ޓޮޓްނަމް ގެ ޕާޕޭ މަޓަރސާ ވެސް ވަނީ ވަރަށް ދުރުން ފޮނުވާލި ހަމަލައެއް ޗެލްސީގެ ގޯލުގެ ތެރެއަށް ވައްދާލާފަ އެވެ. ނަމަވެސް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ.

މި މެޗުން ޗެލްސީ މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 30 މެޗުން ލިބިފައިވާ 52 ޕޮއިންޓާއެކު ތާވަލުގެ ހަތަރުވަނަ މަގާމް ލިބިފައެވެ. މި މެޗުން ބަލިވި ޓޮޓްނަމް ހޮޓްސްޕަރއަށް ލިބިފައިވާ 34 ޕޮއިންޓާއެކު އެ ޓީމު އޮތީ ތާވަލުގެ 13 ވަނައިގަ އެވެ.

- ކޮމެންޓް