އެތްލެޓިކޯ މެޑްރިޑް ބަލިކޮށް ބާސެލޯނާ ސްޕެނިޝް ކަޕްގެ ފައިނަލަށް

ސްޕެނިޝް ކަޕްގެ ސެމީ ފައިނަލުގެ ދެވަނަ ލެގުގައި ރޭ އެތްލެޓިކޯ މެޑްރިޑާއި ދެކޮޅަށް ބާސެލޯނާ ކުޅުނު މެޗު 1-0 ގެ ނަތީޖާއަކުން ބާސެލޯނާ މޮޅުވެ މުބާރާތުގެ ފައިނަލުގެ ޖާގައެއް ހޯދައިފި އެވެ.

ސެމީ ފައިނަލުގެ ދެވަނަ ލެގުގައި އެތްލެޓިކޯ މެޑްރިޑްގެ ދަނޑުގައި ބުދަ ދުވަހުގެ ރޭ ކުޅުނު މެޗަށް ދެ ޓީމު ނިކުތްއިރު މި ދެ ޓީމު ފުރަތަމަ ލެގުގައި ކުޅުނު މެޗު ނިމިފައިވަނީ 4-4 ގެ ނަތީޖާއަކުން ދެ ޓީމު އެއްވަރުވެގެންނެވެ. އެހެންކަމުން ބާސެލޯނާއިން މި މުބާރާތުގެ ފައިނަލުގެ ޖާގައެއް ހޯދާފައިވަނީ ރޭގެ މޮޅާއި އެކު ޖުމްލަ 5-4 ގެ އެގްރިގޭޓް ނަތީޖާއަކުންނެވެ.

ފޯރިގަދަ އަވަސް ކުޅުމެއް ފެނިގެން ދިއަ މި މެޗުގެ ހަމައެކަނި ލަނޑު މެޗުގެ 27 ވަނަ މިނިޓުގައި ލަމީން ޔަމާލްގެ އެހީތެރިކަމާއި އެކު، ބާސެލޯނާއަށް ކާމިޔާބު ކޮށްދީފައިވަނީ ފެރާން ޓޮރޭސް އެވެ.

މި މެޗުން ބަލިވި ނަމަވެސް އެތްލެޓިކޯ މެޑްރިޑަށް ވަނީ މި މެޗުގައި ލަނޑު ޖަހަން ރަނގަޅ:ު ފުރުސަތުތަކެއް ވެސް ލިބި ފައެވެ. އެގޮތުން އެތްލެޓިކޯގެ އެލެކްޒެންޑަރ ސޯލޮތް އަށް ރަގަޅު ފުރުސަތުތަކެއް ލިބިފައިވާއިރު އޭނާ ފޮނުވާލި އެއް ހަމަލާ ގޯލުގެ ތެރެއަށް ވަދެފައިވީ ނަމަވެސް ރެފްރީ ވަނީ އޮފްސައިޑް ލަނޑެއް ކަމަށް ނިންމާފަ އެވެ.

ބާސެލޯނާއިން މި މުބާރާތުގެ ފައިނަލުގެ ޖާގައެއް ހޯދާފައިވާއިރު ފައިނަލުގައި އެ ޓީމާއި ދެކޮޅަށް ނިކުންނާނީ ވާދަވެރި ރެއާލް މެޑްރިޑް އެވެ. މިއީ މި ދެ ޓީމު މި މުބާރާތުގެ ފައިނަލުގައި ބައްދަލުކުރާ އަށްވަނަ ފަހަރެވެ. މި މެޗު އޮންނާނީ އެޕްރިލް މަހުގެ 26 ވަނަ ދުވަހު އެވެ.

މި މުބާރާތުގެ ފައިނަލުގެ ޖާގައެއް ބާސެލޯނާއިން ހޯދާފައިވާއިރު އެ ޓީމުން ވަނީ މި ސީޒަނުގައި ސްޕެނިޝް ސުޕަރ ކަޕް ކާމިޔާބުކޮށްފަ އެވެ. އަދި ލަލީގާގެ އެއްވަނަ މަގާމުގައި މިވަގުތު އެ ޓީމު އޮތްއިރު ޗެމްޕިއަންސް ލީގުގެ ކުއާޓަރ ފައިނަލުގެ ޖާގައެއް އެޓީމުން ވަނީ ހޯދާފަ އެވެ.