ޔަމަނުގެ ހުދައިދާ ޕްރޮވިންސަށް ރޭގަނޑު ދިން ވައިގެ ހަމަލާތަކުގައި ހަތަރު މީހަކު މަރުވެފައިވާ އިރު، އެކަން ކުރީ އެމެރިކާއިން ކަމަށް ހޫޘީން ބުނި އެވެ.

"ވޯޓާ މެނޭޖްމަންޓް އިމާރާތަށް އަމާޒުކޮށް ހަމަލާދީފައިވަނީ އެމެރިކާއިން ކަމަށް ހޫޘީން ބުނެއެވެ. އަދި ހަމަލާގައި 4 މީހަކު މަރުވި އިރު 3 މީހަކު ޒަހަމްވެފައިވާ ކަމަށް ހޫޘީންގެ ސިއްހަތާ ބެހޭ ވުޒާރާގެ ތަރުޖަމާނު އަނީސް އަލަސްބާހީ ވިދާޅުވި އެވެ.

ހޫޘީންގެ މީޑިއާއިން ރިޕޯޓްކޮށްފައިވާ ގޮތުގައި އީރާނަށް ތާއީދުކުރާ ހޫތީންގެ ބާރުގެ ދަށުގައިވާ ސަރަޙައްދުތަކަށް އެމެރިކާއިން ދިން ޙަމަލާތަކުގެ ތެރޭގައި ހުދައިދާގެ ފެނުގެ އިންފްރާސްޓްރަކްޗަރ އާއި ހުޅަނގު އުތުރުގެ ހައްޖާގެ ތިން ޙަމަލާ ހިމެނެއެވެ.

އަދި އެ ޖަމާއަތުގެ އުތުރުގެ ބާރުގަދަ ސަދާއަށް ވެސް ވަނީ ހަމަލާތައް ދީފަ އެވެ. މި ހަމަލާތައް ދިންކަން އެމެރިކާއިން ކަށަވަރުކޮށްދީފައެއް ނުވެއެވެ.

ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ވަނީ ޔަމަނުގެ ހޫތީންނަށް ދޭ ހަމަލާތަކަކީ ޝިޕިންއަށް އޮތް ނުރައްކަލަކަށް ނުވާހާ ހިނދަކު ދެމިއޮންނާނެ ކަމަށް ވިދާޅުވެފަ އެވެ.

ހޫތީ އަސްކަރިއްޔާގެ ތަރުޖަމާނު ޔަހްޔާ ސާރީ ވިދާޅުވީ އެ ޖަމާއަތުން އެމެރިކާގެ މަތިންދާބޯޓު އުފުލާ އުޅަނދު ޔޫއެސްއެސް ހެރީ އެސް ޓްރޫމަންއަށް އަމާޒުކޮށްފައިވަނީ 24 ގަޑިއިރުގެ ތެރޭގައި ތިން ވަނަ ފަހަރަށް ކަމަށެވެ.

އޭނާ މިހެން ވިދާޅުވެފައި މިވަނީ މެދުއިރުމަތީގައި ހަރަކާތްތެރިވާ މަތިންދާބޯޓު އުފުލާ އުޅަނދުތަކުގެ އަދަދު 2 އަށް އިތުރުކޮށް ޓްރޫމަން ހިފަހައްޓައި އިންޑޯ-ޕެސިފިކް ސަރަހައްދުން އިތުރު އުޅަނދެއް ފޮނުވަމުން އަންނަ ކަމަށް އެމެރިކާއިން ބުނެފައިވާ ދަނޑިވަޅެއްގަ އެވެ.

ޕެންޓަގަންގެ ތަރުޖަމާނު ޝޯން ޕާނެލް ވިދާޅުވީ ކާލް ވިންސަން ޓްރޫމަންއާ ގުޅިވަޑައިގަންނަވާނީ ސަރަހައްދީ ހަމަޖެހުން ކުރިއެރުވުމަށާއި، ހަރުކަށި އަމަލުތައް ހުއްޓުވުމަށާއި، އެ ސަރަހައްދުގައި ވިޔަފާރީގެ މިނިވަންކަން ހިމާޔަތް ކުރުމަށް ކަމަށެވެ.

ހޫތީންގެ ބާރުގެ ދަށުގައި ވާ ޔަމަނުގެ ބައެއް ސަރަހައްދުތަކަށް ހަމަލާތައް ދެމުން ދަނީ ކަނޑުގެ މުހިންމު މަގުތަކުގައި އުޅަނދުފަހަރަށް ބިރު ދެއްކުން ހުއްޓާލަން މަޖުބޫރު ކުރުވުމަށް އެމެރިކާއިން ހަނގުރާމަވެރިންނާ ދެކޮޅަށް މިދިޔަ މާޗް މަހުގެ 15 ވަނަ ދުވަހު ކެމްޕޭނެއް ފެށި ފަހުންނެވެ.

އޭގެ ފަހުން ހޫތީން ވަނީ އެމެރިކާގެ އަސްކަރީ އުޅަނދުތަކަށާއި އިޒްރޭލަށް އަމާޒުކޮށް ހަމަލާތައް ދިން ކަމަށް ބުނެފަ އެވެ.

އަންގާރަ ދުވަހު ވައިޓް ހައުސްގެ ތަރުޖަމާނު ކަރޯލީން ލީވިޓް ވިދާޅުވީ ހޫތީންނާ ދެކޮޅަށް ކާމިޔާބު 200 އަށް ވުރެ ގިނަ ހަމަލާ ދިނުމުގެ ކެމްޕޭން ކާމިޔާބު ކަމަށެވެ.

ހޫތީން ވަނީ 2023 ވަނަ އަހަރުގެ އޮކްޓޯބަރު މަހު ޣައްޒާ ހަނގުރާމަ ފެށުނުތާ ކުޑަ އިރުކޮޅެއްގެ ތެރޭގައި ފަލަސްތީނާ އެއްބައިވަންތަކަން ގާއިމުކުރުމުގެ ގޮތުން މަސައްކަތް ކުރާ ކަމަށް ބުނެ، ޖެނުއަރީ މަހު ހަނގުރާމަ ހުއްޓާލުމާ ހަމައަށް ރަތް ކަނޑުގެ ސަރަހައްދާއި ގަލްފް އޮފް އެޑެންގެ އިތުރުން އިޒްރޭލުގެ ސަރަހައްދުން ދަތުރުކުރާ އުޅަނދުތަކަށް އަމާޒުކޮށްފަ އެވެ.

އިސްރާއީލުން ޣައްޒާއަށް ދޭ އެހީ ހުއްޓުވުމާ ގުޅިގެން އުޅަނދުފަހަރަށް ހަމަލާތައް ދޭން ފަށާނެ ކަމުގެ އިންޒާރު ހޫޘީން ދިނުމާ ގުޅިގެން އެމެރިކާއިން ހޫޘީންނަށް ހަމަލާދޭން ފަށާފައިވެއެވެ.

ހޫތީންގެ ހަމަލާތަކުގެ ސަބަބުން ދުނިޔޭގެ ޝިޕިން ޓްރެފިކްގެ ގާތްގަނޑަކަށް 12 ޕަސެންޓް އުފުލާ މުހިންމު މަގު ހަލާކުވެ، ގިނަ ކުންފުނިތަކަކަށް ވަނީ ދެކުނު އެފްރިކާގެ އައްސޭރިފަށުގައި އަގުބޮޑު ދަތުރެއް ކުރަން ޖެހިފަ އެވެ.