އެހެން އަހަރުތަކާއި ޚިލާފަށް 2025 ވަނަ އަހަރުގެ މިހާތަނަށް އެންމެ ގިނައިން ހުށަހަޅާފައިވަނީ ޓްރެފިކް އެކްސިޑެންޓުގެ މައްސަލަތައް ކަމަށް ފުލުހުންގެ ތަފާސްހިސާބުތަކުން ހާމަވެއްޖެއެވެ.

ފުލުހުންގެ ތަފާސްހިސާބުތަކުން އެނގޭ ގޮތުން 2008 ވަނަ އަހަރުން ފެށިގެން 2024 ވަނަ އަހަރުގެ ނިިޔަލަށް ކޮންމެ އަހަރެއްގައި ވެސް އެންމެ ގިނައިން ފުލުހުންގެ އިދާރާ އަށް ހުށަހަޅާފައި ވަނީ ވައްކަމުގެ މައްސަލަތަކެވެ.

އެކަމުގެ ތަފްސީލްތަކަށް ބަލާ އިރު މި އަހަރުގެ ޖެނުއަރީ މަހު 234 އެކްސިޑެންޓުގެ މައްސަލަ ފުލުހުންނަށް ހުށަހަޅާފައިވެއެވެ. އަދި މިދިޔަ ފެބްރުއަރީ މަހު ފުލުހުންނަށް 61 އެކްސިޑެންޓުގެ މައްސަލަ ހުށަހަޅާފައިވެއެވެ.

ދެވަނަ އަށް އެންމެ ގިނައިން ހުށަހަޅާފައި ވަނީ ޓްރެފިކް އެކްސިޑެންޓުގެ މައްސަލަތެކެވެ.

2025 ވަނަ އަހަރު އެންމެ ގިނަ މީހުން މައްސަލަތައް ހުށަހަޅާފައި ވަނީ އެކްސިޑެންޓުތައް ހިނގައިގެންނެވެ. އެ ކަމުގެ ތަފްސީލަށް ބަލާ އިރު އެކްސިޑެންޓު ވެގެން 762 މައްސަލަ އެއް އަހަރުގެ މިހާތަނަށް ފުލުހުންނަށް ވަނީ ހުށަހަޅާފައެވެ.

2025 ވަނަ އަހަރު ހުށަހަޅާފައިވާ އެހެނިހެން މައްސަލަތަކަށް ބަލާއިރު ވައްކަން ކޮށްގެން 667 މައްސަލަ އެއް އެ އިދާރާ އަށް ވަނީ ހުށަހަޅައިފައެވެ. މީގެ އިތުރުން ތިން ވަނަ އަށް އެންމެ ގިނައިން ހުށަހަޅާފައި ވަނީ މަސްތުވާތަކެތީގެ މައްސަލަތަކެވެ. އެއީ 378 މައްސަލަ އެވެ. އަދި ގެއްލިގެން ތަކެތި ހޯދުމަށް 234 މައްސަލަ ވަނީ ހުށަހަޅާފައެވެ. ހަމައެހެންމެ ތަކެއްޗަށް ގެއްލުން ދިނުމުގެ 151 މައްސަލަ ވަނީ ހުށަހަޅާފައެވެ.

ފާއިތުވި އަހަރުގެ ތަފާސްހިސާބުތަކުން އެނގޭ ގޮތުން އެ އަހަރު ވަނީ އެކްސިޑެންޓުގެ މައްސަލަތައް ރިޕޯޓުކުރި މިންވަރު ބޮޑުތަނުން މައްޗަށް ގޮސްފައެވެ. އެ ގޮތުން 2023 ވަނަ އަހަރު އެކްސިޑެންޓުގެ 2،300 މައްސަލަ ރިޕޯޓު ކޮށްފައިވާ އިރު 2024 ވަނަ އަހަރު 2،886 މައްސަލަ އެކްސިޑެންޓުވެގެން ރިޕޯޓުކޮށްފައިވެއެވެ.

މީގެ އިތުރުން ނިމިދިޔަ 16 އަހަރުގެ ތަފާސް ހިސާބުތަކަށް ބަލާ އިރު ފުލުހުންގެ ތަފާސްހިސާބުން އެނގޭ ގޮތުން ކޮންމެ އަހަރަކު ވެސް އެންމެ ގިނައިން ހުށަހަޅައިފައިވަނީ ވައްކަމާއި މަސްތުވާތަކެތީގެ މައްސަލަތެކެވެ. އެގޮތުން މިދިޔަ އަހަރުތަކުގައި ހުށަހެޅި މައްސަލަތަކުގެ ޖުމުލަ އަދަދަށް ބަލާއިރު ވައްކަންކޮށްގެން 95000 އަށް ވުރެ ގިނަ މައްސަލަ، މަސްތުވާތަކެތީގެ 41000 އަށް ވުރެ ގިނަ މައްސަލަ އަދި ޓްރެފިކް އެކްސިޑެންޓްގެ 40000 އަށް ވުރެ ގިނަ މައްސަލަ ވަނީ ހުށަހަޅާފައެވެ.