ރަޝިޔާ އާއި ޔުކްރެއިން އާއި ދެމެދު ކުރިއަށްދާ ހަނގުރާމަ ނިންމުމާ ގުޅޭ ގޮތުން، އެެމެރިކާ އާއި އެކު ކުރިއަށް ގެންދިޔަ މަޝްވަރާ ތަކަކީ ބިނާކުރަނިވި މަޝްވަރާ ތަކެއް ކަމަށް، ރަޝިޔާގެ ސެނެޓަރު ގްރިގޮރީ ކަރަސިން ވިދާޅުވެއްޖެ އެވެ.

މަޝްވަރާ ތަކުގައި ބައިވެރިވާ ރަޝިޔާގެ ވަފުދުގައި ވެސް ހިމެނި ވަޑައިގަންނަވާ ކަރަސިން ވިދާލުވީ، މަޝްވަރާ ތަކަކީ ގޮންޖެހުން ބޮޑު މަޝްވަރާ ތަކަކަށް ވީ ނަމަވެސް، އެއީ ފައިދާ ހުރި މަޝްވަރާ ތަކެއް ކަމަށެވެ.

ޓާސް ނިއުން އެޖެންސީ އާއި ވާހަކަ ދައްކަވަމުން އޭނާ ވިދާޅުވީ، ދެ ގައުމުގެ ދެ މެދުގައި ކުރިއަށް ދިޔަ މަޝްވަރާތަކުގައި ގިނަ މައްސަލަތަކަކާ މެދު މަޝްވަރާ ކުރެވުނު ކަމަށެވެ.

އަދި މި މަޝްވަރާ ތަކަކީ ދެ ގައުމަށް ވެސް މުހިންމު މަޝްވަރާ ތަކެއް ކަމުގައި އޭނާ ފާހަގަ ކުރެއްވި އެވެ.

ކުރީގެ ޑިޕްލޮމެޓެއް ކަމުގައިވާ ކަރަސިން ވިދާޅުވި ގޮތުގައި، ކުރިއަށް އޮތް ތަނުގައި މި މަޝްވަރާ ތައް ދެމިގެން ދާނެ އެވެ. އަދި އެކަމުގައި އދ އާއި އެހެނިހެން ގައުމުތައް ވެސް ބައިވެރިވާނެ ކަމަށް އޭނާ ވިދާޅުވި އެވެ.

"އަޅުގަނޑުމެން މި މަސައްކަތް ކުރިއަށް ގެންދާނަން. މިކަމުގައި ބައިނަލްއަޤުވާމީ މުޖުތަމަޢު، ޚާއްސަކޮށް އދ އަދި ވަކިވަކި ގައުމުތައް ބައިވެރިކޮށްގެން ކުރިއަށް ގެންދާނަން،" ކަރަސިން ވިދާޅުވި އެވެ.

ރޮއިޓާސް އަށް މައުލޫމާތު ދެމުން ރަޝިޔާގެ ކަމާ ބެހޭ ފަރާތަކުން ބުނެފައިވާ ގޮތުގައި، މަޝްވަރާތަކާ ގުޅޭ އެއްބަސްވުމެއްގެ ޑްރާފްޓެއް ރަޝިޔާ އަދި އެމެރިކާ އަށް ވަނީ ފޮނުވިފައި އެވެ.

އަދި އެ އެއްބަސްވުން އަންގާރަ ދުވަހު ޢާންމު ކުރުމަށް ރޭވިފައިވަ ކަމަށް ވެސް ބުނެފައިވެ އެވެ.