ޔުއެފާ ނޭޝަންސް ލީގުގެ ކުއާޓާ ފައިނަލްގައި އިޓަލީގެ މައްޗަށް ކުރި ހޯދައި، ޖަރުމަނުން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

މި ދެ ޓީމު ކުޅުނު ކުއާޓާ ފައިނަލްގެ ފުރަތަމަ ލެގު ޖަރުމަނުން ކާމިޔާބު ކުރީ 2-1 އިންނެވެ. އެހެންވެ ދެ ވަނަ ލެގަށް ކުރިމަތިލީއިރު ވެސް، ޖަރުމަނަށް ފައިދާ އޮތެެވެ. އާދީއްތަ ދުވަހުގެ ރޭ ކުޅުނު ކުއާޓާ ފައިނަލްގެ ދެ ވަނަ ލެގު ނިމުނީ 3-3 އިން އެއްވަރުވެގެންނެވެ.

އެހެންވެ އެގްރިގޭޓް ނަތީޖާ 5-4 އިން ޖަރުމަނު ވަނީ އިޓަލީ ކަޓުވާލައި މުބާރާތުގެ ސެމީ ފައިނަލްގެ ފުރުސަތު ހޯދައިފަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ޖަރުމަނަށް ލިބުނު ޕެނަލްޓީ ކާމިޔާބުކޮށް، ކުރި ހޯދައިދިނީ ޔޯޝުއާ ކިމިކް އެވެ. އޭގެ ހަ މިނެޓު ފަހުން ޖަމާލް މުސިއާލާ ވަނީ ލަނޑު ޖަހައި ޖަރުމަނުގެ ލީޑު ފުޅާ ކޮށްފަ އެވެ. މެޗުގެ ފުރަތަމަ ހާފުގެ ފަހު ވަގުތުގައި ޖަރުމަނުގެ ތިން ވަނަ ލަނޑު ޖެހީ ޓިމް ކްލެއިންޑިއެންސްޓް އެވެ.

ނަމަވެސް، މެޗުގެ ދެ ވަނަ ހާފުގައި އިޓަލީން ވަނީ ފަހަތުން އަރައި ތިން ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި އިޓަލީގެ ފުރަތަމަ ލަނޑު ޖެހީ މޮއިސް ކީން އެވެ. އޭގެ ފަހުން މެޗުގެ 69 ވަނަ މިނެޓުގައި އޭނާ ވަނީ ދެ ވަނަ ލަނޑެއް ޖަހައި، އިޓަލީ އަށް ފަރަގު ކުޑަ ކޮށްދީފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިބުނު ޕެނަލްޓީ ކާމިޔާބުކޮށް، އިޓަލީ އަށް ނަތީޖާ ހަމަހަމަ ކޮށްދިނީ ޖިއާކޮމޯ ރަސްޕަޑޯރީ އެވެ.

ދެ ވަނަ ލެގުގެ ނަތީޖާ ހަމަހަމަވީ ނަމަވެސް، ފުރަތަމަ ލެގުން ޖަރުމަނު މޮޅުވެފައި އޮތުމުން އެގްރިގޭޓް ނަތީޖާ އިން އެ ޓީމު ވަނީ މުބާރާތުގެ ސެމީ ފައިނަލްގެ ޖާގަ ހޯދައިފަ އެވެ.