15 މިލިއަން ރުފިޔާގެ ފަންޑަކާއެކު، ކޭޝް ވަގުފު ކުރެވޭނެ ނިޒާމެއް ގާއިމްކޮށްފި
ކޭޝް ވަގުފުން އިންވެސްޓްކޮށް އޭގެ ސާފު ފައިދާއިން އިސްލާމީ ދާއިރާތަކަށް ހޭދަކުރާނެ
އިސްލާމިކް މިނިސްޓްރީ
ވަގުފު ފަންޑު ތަރައްގީކޮށް، ޝަރުއީ އުސޫލުތަކާ އެއްގޮތަށް، (ކޭޝް ވަގުފު) ކުރެވޭނެ ނިޒާމެއް އިސްލާމިިކް މިނިސްޓްރީން ގާއިމްކޮށްފިއެވެ.
ކޭޝް ވަގުފު ކުރެވޭ ނިޒާމާ ގުޅޭގޮތުން އިސްލާމިކް މިނިސްޓަރު ޑރ.ޝަހީމް އަލީ ސައީދު ވިދާޅުވީ ކޭޝް ވަގުފުން އިންވެސްޓްކޮށް އޭގެ ސާފު ފައިދާއިން އިސްލާމީ ދާއިރާތަކަށް ހޭދަކުރަން ނިންމާފައިވާ ކަމަށެވެ.
މިނިސްޓަރު ޝަހީމް ވިދާޅުވީ ދިވެހި ރައްޔިތުންގެ ތެރެއިން ﷲ ގެ މަގުގައި ނަގުދު ފައިސާ ވަގުފުކުރަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ. ވަގުފު ފަންޑަށް ޞަދަގާތާއި ޚައިރާތާއި ހިބައާއި ވަސިއްޔަތުގެ ގޮތުން ދޭ ހަދިޔާވެސް ބަލައިގަނެވޭނެ ކަމަށް މިނިސްޓަރު ޝަހީމް ވިދާޅުވިއެވެ.
މިނިސްޓަރު ޝަހީމް ވިދާޅުވީ މިބައި ފަންޑުގެ ތެރޭގައި ބެލެހެއްޓިގެންދާނީ ކޭޝްވަގުފާ ވަކިން ހަރުދަނާ ނިޒާމެއްގެ ތެރެއިން ކަމަށާއި، މި ހެޔޮ ބަދަލަކީ ފަންޑު އުފެދުނުތާ 15 އަހަރު ފަހުން ގެނެވޭ އެންމެ ބޮޑު ހެޔޮ ބަދަލުކަން މިނިސްޓަރު ޝަހީމް ފާހަގަކުރެއްވިއެވެ.
ކޭޝްވަގުފު ފަންޑު ފަށަނީ 15 މިލިއަން ރުފިޔާގެ ފަންޑަކާއެކު ކަމަށް އިސްލާމިކް މިނިސްޓްރީން ބުނެއެވެ.
މީގެ އިތުރުން އިސްލާމިކް މިނިސްޓްރީން ވަނީ ދީނީ ކަންތައްތައް ކުރިއެރުވުމަށް އެހީވާ ވަގުފު ފަންޑުން ހޭދަކުރުމުގެ އުސޫލު ވެސް އާއްމުކޮށްފައެވެ.
ރާއްޖޭގެ ރައްޔިތުންނާއި ރާއްޖޭން ބޭރުގެ އެކި ފަރާތްތަކުގެ އިތުރުން ރާއްޖެއާއި، ރާއްޖޭން ބޭރުގައި ހިންގާ ވިޔަފާރިތަކުންނާއި އެ ނޫންވެސް ފަރާތްތަކުން ދީނީ ކަންތައްތައް ކުރިއެރުވުމަށް އެހީވުމަށްދޭ ފައިސާ ފަންޑުގެ ޓްރަސްޓް ސްޓޭޓްމަންޓުގައި ކަނޑައެޅިފައިވާ ގޮތަށް ބޭނުން ކުރަންޖެހެންދެން ޖަމާކޮށްފައި ބަހައްޓަންވާނީ މިފަންޑުގައި ކަމަށް އުސޫލުގައި ބުނެފައިވެއެވެ. އަދި ފަންޑަށްދޭ ފައިސާ ޖަމާކުރެވޭނީ އެކަމަށް ޚާއްސަ ކޮށްފައިވާ ޓްރަސްޓް ފަންޑުގެ އެކައުންޓުގައި ކަމަށެވެ.
