މުޒާހަރާތަކާއި ގުޅިގެން މުޅި ސަރުކާރު ވަނީ ހުއްޓުމަކަށް އައިސްފައި: މާޒް ސަލީމް
ޣައިރު ގާނޫނީ އަމުރުތަކަށް ފުލުހުން ކިޔަމަން ވެގެން ނުވާނެ
އެމްޑީޕީން ކުރިއަށް ގެންދިޔަ މުޒާހަރާއެއްގެ ތެރެއިން
މުޒާހަރާތަކާއި ގުޅިގެން މުޅި ސަރުކާރު ހުއްޓުމަކަށް އައިސްފައިވާ ކަމަށް ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
ހުކުރު ދުވަހުގެ ރޭ ކުރިއަށް ގެންދިޔަ އެމްޑީޕީގެ މުޒާހަރާގައި ވާހަކަދައްކަވަމުން ސަލީމް ވިދާޅުވީ މުޒާހަރާތަކާއި ގުޅިގެން މުޅި ސަރުކާރު ހުއްޓުމަކަށް އައިސްފައިވާ މަންޒަރު ފެންނަ ކަމަށާއި، ސަރުކާރު ވަރަށް ބޮޑަށް ބިރު ގަނެފައިވާ ކަމަށެވެ. ސިލްސިލާކޮށް ކުރިއަށް ގެންދާ މުޒާހަރާތަކުގައި ވަކި ސަރަހައްދަކަށް އެއްވުމަށް ގޮވާލުމުން އަނެއް ދުވަހު އެސްއޯ ފުލުހުން ނެރި، މުޅި ސަރަހައްދު ބަންދު ކުރާކަން ފާހަގަކުރައްވައި ސަލީމް ވިދާޅުވީ މިހާރު ވެސް މުޒާހަރާ ކުރުމަށް ފުރުސަތު ސަރުކާރުން ނުދޭ ކަމަށެވެ.
ސަލީމް ވިދާޅުވީ ޣައިރު ގާނޫނީ އަމުރުތަކަށް ފުލުހުން ކިޔަމަން ވެގެން ނުވާނެ ކަމަށާއި، ފާޅުގައި އެއަށް ދެކޮޅު ހަދަންޖެހޭ ކަމަށެވެ. ފުލުހުންނަކީ ދިވެހި ރައްޔިތުން ގަދަރުކުރާ ބައެއް ކަމަށާއި، އެ ގަދަރު ހިފަހައްޓައި، ނާއިންސާފަށް ނޫނެކޭ ބުނަންޖެހޭ ކަމަށް އޭނާ ވިދާޅުވިއެވެ. އަދި މުޒާހަރާއަށް ނުކުންނަނީ ބެރިކޭޑުތައް އުކައި ފުލުހުންނާ ކުރިމަތިލުމަށް ނޫން ކަމަށް ސަލީމް ވިދާޅުވިއެވެ.
އަޅުގަނޑު މިދައްކަނީ ތިބޭފުޅުން ކުރި ހުވާގެ ވާހަކައާއި، ތިބޭފުޅުން ޣައިރު ގާނޫނީ އަމުރުތަކަށް ކިޔަމަން ނުވަން ތިބޭފުޅުންގެ ގާނޫނު އަސާސީގައި ވަރަށް ސާފުކޮށް އޮންނާނީ ބުނެފައި. އެވާހަކަތައް އަޅުގަނޑުމެން މިދައްކަނީ. މިތާގައި ރޯނެއް ދަމާފައި ނޫނީ މިތާގައި ބޮޑުބައި އިނގިލިން ކުރަހާލާފައި ހުރަސް ނުކުރާށޭ ބުންޏަސް އަޅުގަނޑުމެން ހުރަސް ނުކުރާނަން މިތަނުން. ކޮންމެހެން އަޅުގަނޑުމެން މިއަންނަނީ މިތަނަށް ބެރިކޭޑުތައް އުކައި، ފުލުހުންނާ ކުރިމަތިލާކަށް ނޫން މިއަންނަނީ.ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް)
ސަލީމް ވިދާޅުވީ މަގު މައްޗަށް ނުކުމެ އަޑު އުފުލަމުންދަނީ ރައްޔިތުންގެ ހައްގުގައި ކަމަށެވެ. އެގޮތުން ބޯހިޔާވަހިކަމާއި، އެލަވަންސްތައް ބޮޑު ކުރުމާއި، އަދި ވެސް ރައީސް ޑރ.މުހައްމަދު މުއިއްޒު ވައުދުވެވަޑައިގެންނެވި ކަންކަން މިގައުމުގައި ތަންފީޒުކޮށް، ރައްޔިތުންގެ ހައްގު މިންވަރު ހޯދުމަށް މަސައްކަތް ކުރާނެ ކަމަށް އޭނާ ވިދާޅުވިއެވެ.
