ބޭރު ގައުމުތަކުން ރާއްޖެއަށް މާލީ އެހީ ނުދިން
ރާއްޖޭގެ ބޭރުގެ ދަރަނި 3.4 ބިލިއަން ޑޮލަރަށް އަރާއިރު، އޭގެ ބޮޑު ބައެއް ދައްކަންޖެހެނީ ޗައިނާ އާއި އިންޑިއާއަށެވެ. ވަގުތީ ކަންބޮޑުވުމަކީ 2025 ވަނަ އަހަރު ދައްކަންޖެހޭ 600 މިލިއަން ޑޮލަރުގެ ބޭރުގެ ދަރަނިތަކާއި 2026 ވަނަ އަހަރު އެއް ބިލިއަން ޑޮލަރުގެ ދަރަނި ޚިދުމަތް ދިނުމެވެ.
އިގްތިސާދީ ހާލަތު ރަނގަޅުކުރުމަށް ބޭނުންވާ ފައިސާ ގައުމުތަކުން އަދިވެސް ނުދޭ
އިގްތިސާދީ ހާލަތު ނާޒުކު ހާލަތެއްގައި އޮތް ރައީސް ޑރ. މުހައްމަދު މުއިއްޒުގެ ސަރުކާރަށް ބޭރުގެ ގައުމުގެތަކާއި މާލި އިދާރާތަކުން އެހީ ދިނުމާއި މެދު އުއްމީދީ ޖަވާބެއް ނުދިން ކަމަށް އިގްތިސާދީ ދާއިރާގެ ހަބަރުތައް ގެނެސްދޭ އިކޮނޮމިކް ޓައިމްސް އިން ބުނެފިއެވެ.
އިކޮނަމިކް ޓައިމްސް ގައި ބުނެފައިވަނީ ރާއްޖެއިން މާލީ އެކި އިދާރާތަކުން މާލީ އެހީތެރިކަން ހޯދަން އެދުނު ނަމަވެސް މިހާތަނަށް އައި އިރު މި މަސައްކަތް ކާމިޔާބުވެފައި ނުވާ ކަމަށެވެ. މީގެ ތެރޭގައި ގަލްފް ކޯޕަރޭޝަން ކައުންސިލް (ޖީސީސީ) ގެ ކޮންމެ ގައުމަކުން 300 މިލިއަން ޑޮލަރު ސަރުކާރުން ހޯދަން އެދިފައިވީ ނަމަވެސް ސަރުކާރުގެ މި އެދުމަށް ޖީސީސީގެ ގައުމުންތަކުން އުއްމީދީ ޖަވާބެއް ދީފައި ނުވާ ކަމަށެވެ.
މީގެ އިތުރުން ރައީސް ޑރ. މުހައްމަދު މުއިއްޒު ޗައިނާ އިން 200 މިލިއަން ޑޮލަރުގެ ބަޖެޓް ސަޕޯޓް އާއި ދަރަނި ދެއްކުމަށް ރީފައިނޭންސް ކުރުމާއި ފައިސާ ބަދަލުކުރުމަށް އެދުނުނަމަވެސް މިހާތަނަށް އުއްމީދީ ޖަވާބެއް ޗައިނާއިންވެސް ދީފައި ނުވެއެވެ. އެހެންނަމަވެސް އިންޑިއާގެ 750 މިލިއަން ޑޮލަރުގެ ކަރަންސީ ސްވޮޕް އާއިއެކު ވަގުތީ ލުޔެއް ލިބި، އިމްޕޯޓަށް ހަރަދުކުރާނެ ފައިސާއާއި ސަރުކާރުގެ ހަރަދުތައް މިވަގުތަށް ދެމެހެއްޓުމަށް ރާއްޖެއަށް ވަނީ ކޮންމެވެސް ވަރެއްގެ ފުރުސަތެއް ލިބިފައިވާ ކަމަށް ރިޕޯޓްކޮށްފައި ވެއެވެ.
އިކޮނޮމިކް ޓައިމްސް އިން ނެރުނު ރިޕޯޓު ގައިވާ ގޮތުން ރާއްޖޭގެ ބޭރުގެ ދަރަނި 3.4 ބިލިއަން ޑޮލަރަށް އަރާއިރު، އޭގެ ބޮޑު ބައެއް ދައްކަންޖެހެނީ ޗައިނާ އާއި އިންޑިޔާ އަށެވެ. އަދި އެންމެ ބޮޑު ކަންބޮޑުވުމަކީ 2025 ވަނަ އަހަރު ދައްކަންޖެހޭ 600 މިލިއަން ޑޮލަރުގެ ބޭރުގެ ދަރަނިތަކާއި 2026 ވަނަ އަހަރު އެއް ބިލިއަން ޑޮލަރުގެ ދަރަނީގެ ޚިދުމަތް ދިނުމެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ފަތުރުވެރިންގެ އަތުން ނަގާ ޓެކްސް ބޮޑުކޮށް، މުސާރަ ކުޑަކޮށް، ދައުލަތުގެ ވިޔަފާރިތަކުގެ ހިއްސާ ވިއްކުމުގެ ޕްލޭންތައް ފަދަ ފިޔަވަޅުތައް އަޅާނެކަމަށް ބުނެފައެވެ. ނަމަވެސް މިހާތަނަށް ޓެކްސް ބޮޑުކުރުން ނޫން އިތުރު އިސްލާހީ އެއްވެސް ފިޔަވަޅެއް އަޅާފައި ނުވެއެވެ.
މީގެ އިތުރުން ރާއްޖެ އިން ވަނީ ގަލްފް ގައުމުތަކަށް ވަޒީރުން ފޮނުވުމުގެ އިތުރުން އެކުވެރި ގައުމުތަކުން ކުއްލި އެހީތެރިކަން ހޯދާފައެވެ. ނަމަވެސް މިގައުމުތަކުން އަދި ރާއްޖޭގެ އެދުންތަކަށް އުއްމީދީ ޖަވާބެއް ނުލިބޭ ކަމަށް އިކޮނޮމިކް ޓައިމްސް ރިޕޯޓުގައިވެއެވެ.
ރާއްޖެއިން އިން ވަނީ ޗައިނާ ޑިވެލޮޕްމަންޓް ބޭންކުން 200 މިލިއަން ޑޮލަރުގެ ބަޖެޓް ސަޕޯޓާއި ދަރަނީގެ ހިދުމަތަށް ފައިސާ ދެއްކުމަށް ރީފައިނޭންސިންގ އެހީ އާއި ޗައިނާ އާއި އެކު ފައިސާ ބަދަލުކުރުމަށް ވެސް އެދިފައެވެ. ނަމަވެސް ރާއްްޖޭގެ މި އެދުމަށްވެސް ޗައިނާއިން ވެސް މިހާތަނަށް އެއްވެސް އެއްޗެއް ބުނެފައި ނުވެއެވެ.
ބަންގްލަދޭޝް އާއި ސްރީލަންކާއިން ބަޖެޓުގެ އެހީތެރިކަން ހޯދުމަށް ކުރި އިތުރު މަސައްކަތް ތަކުން ހެޔޮ ނަތީޖާތަކެއް ނުލިބޭއިރު، ރާއްޖެ އިން ނެގުމަށް ރާވާފައިވާ 200 މިލިއަން ޑޮލަރުގެ ސުކޫކް ބޮންޑް ދޫކުރުމާ މެދު ޝާރުޖާ އިސްލާމިކް ބޭންކުން ވަނީ ކަންބޮޑުވުން ފާޅުކޮށްފަ އެވެ.
2026 ވަނަ އަހަރު އެއް ބިލިއަން ޑޮލަރުގެ ސުކޫކް އަނބުރާ ދެއްކުމަށް ވަސީލަތްތައް ހޯދުމަކީ އަދި އޮތް ބޮޑު ގޮންޖެހުމެއް ކަމަށް އިކޮނަމިކް ޓައިމްސްގައި ރިޕޯޓްކޮށްފައިވެ އެވެ.
ފަތުރުވެރިންގެ އަދަދު އިތުރުވުމާއި އިންޑިއާއިން 750 މިލިއަން ޑޮލަރުގެ ފައިސާ ބަދަލުކުރުމުން ކުރު މުއްދަތެއްގެ ލުޔެއް ލިބިދާނެ ނަމަވެސް، މި ފިޔަވަޅުތަކުގެ ސަބަބުން ކުރިއަށް އޮތް ދައްކަންޖެހޭ މަޖުބޫރު ދަރަނިތައް ފުރިހަމައަށް ފޫބެއްދުމަކީ ގާތް ކަމެއް ނޫން ކަމަށް ވެސް އިކޮނަމިކް ޓައިމްސް ގައި ވަނީ ރިޕޯޓްކޮށްފަ އެވެ.
ރާއްޖޭގެ ދަރަނި 2018 ވަނަ އަހަރު ތިން ބިލިއަން ޑޮލަރުން 2024 ވަނަ އަހަރުގެ މާޗް މަހުގެ ނިޔަލަށް 8.2 ބިލިއަން ޑޮލަރަށް އަރާފައިވާއިރު، ޕްރޮޖެކްޝަންތަކުން ދައްކާ ގޮތުގައި 2029 ވަނަ އަހަރު މި އަދަދު 11 ބިލިއަން ޑޮލަރަށް ވުރެ މަތިވެދާނެ އެވެ.
