ހުސްވި ފެބްރުއަރީ މަހު ރާއްޖެ އިން އެކްސްޕޯޓު ކުރި އުފެއްދުންތަކަށް ޗައިނާ އިން އިން ލިބުނު ކުރިއެރުމެއް ތަފާސް ހިސާބަކުން ނުދެއްކިއެވެ.

މިނިވަން ވިޔަފާރީގެ އެއްބަސްވުމެއްގެ ދަށުން ޗައިނާ އިން ރާއްޖެ އަށް އެތެރެކުރާ ގިނަ މުދަލަށް ސުން ޑިއުޓީ ރާއްޖެއިން ނަގަމުންދާ އިރު، ރާއްޖެއިން ޗައިނާ އަށް ބޭރު ކުރާ އުފެއްދުންތަކަށް ސުން ޑިއުޓީ ނަގަން ފެށުމުން ރާއްޖެއިން ޗައިނާ އަށް އެކްސްޕޯޓުގެ ކުރާ އުފެއްދުންތަކުގެ ޖުމްލަ ވެލިއު މައްޗަށް ދާނެ ކަމަށް މުއިއްޒު ސަރުކާރުން ވަނީ ހާމަ ކޮށްފައެވެ. ޖަނަވަރީ މަހުގެ ފުރަތަމަ ދުވަހުން ފެށިގެން މި އެއްބަސްވުމަށް އަމަލު ކުރަން ފަށާފާއިރު އަދި މިހާތަނަށް ޗައިނާގެ މަކެޓުން ދިވެހިން އުފެއްދުތަކަށް ލިބޭ އެއްވެސް ކުރިއެރުމެއް ނުފެންނަ ކަން ފާހަގަ ކުރެވެއެވެ.

ރާއްޖޭ އުފެއްދުންތައް ފެބްރުއަރީ މަހުވެސް އެންމެ ގިނައިން އެކްސްޕޯޓު ކޮށްފައިވަނީ ތައިލެންޑަށެވެ. އެއީ 134 މިލިއަން ރުފިޔާގެ މަހުގެ އުފެއްދުންތަކެވެ. އެއީ ޖުމްލަ އެކްސްޕޯޓުގެ 60 އިންސައްތަ އެވެ. ދެން އެކްސްޕޯޓު އާމްދަނީ އެންމެ ގިނަ އިން ލިބިވައިވަނީ އިނގިރޭސި ވިލާތުންނެވެ. އިނގިރޭސި ވިލާތައް 33 މިލިއަން ރުފިޔާގެ މަހުގެ ބާވަތްތައް އެކްސްޕޯޓު ކޮށްފައިވެއެވެ. އެއީ އެކްސްޕޯޓުގެ 15 އިން ސައްތަ އެވެ. އިންޑިއާ އަށް 10 މިލިއަން ރުފިޔާގެ މަހުގެ ބާވަތްތައް އަދި ވިއެޓްނާމް އަށް 8 މިލިއަން ރުފިޔާގެ އުފެއްދުންތައް އެކްސްޕޯޓުކޮށްފައިވެއެވެ. ބަންގްލަދޭޝް އަށް 6 މިލިއަން ރުފިޔާގެ އުފެއްންތައް ވަނީ އެކްސްޕޯޓް ކޮށްފައެވެ.

ފެބްރުއަރީމަހު ރާއްޖެއަށް މުދާ އެތެރެކުރުމަށް އެންމެ މަތިން ހޭދަ ކުރި ތިން ގައުމުގެ ތެރޭގައި ޗައިނާ ހިމެނެއެވެ. ޗައިނާ އިން 606 މިލިއަން ރުފިޔާގެ މުދާ ރާއްޖެ އަށް ވަނީ އެތެރެކޮށްފައެވެ. މުދަލުގެ އަގުގެ ގޮތުން އެންމެ ގިނަ އިން އިމްޕޯޓު ކޮށްފައިވަނީ ޔުނައިޓެޑް އަރަބް އެމިރޭޓްސް އިންނެވެ. އެގައުމުން 1342 މިލިއަން ރުފިޔާގެ މުދާ ވަނީ އެތެރެކޮށްފައެވެ. އިންޑިއާ އިން 748 މިލިއަން ރުފިޔާގެ މުދާ އެތެރެކޮށްފައިވާއިރު ފެބްރުއަރީ މަހު އެންމެ ގިނައިން މުދާ އެތެރެ ކުރި ފަސް ގައުމަކީ ޔޫއޭއީ، އިންޑިއާ، ޗައިނާ، ސިންގަޕޫރު، އަދި ސްރީލަންކާ އެވެ.

ކަސްޓަމްސް އިން ހާމަ ކުރި ތަފާސް ހިސާބުން ފެބްރުއަރީ މަހު ރާއްޖެ އަށް އެތެރެ ކުރި މުދަލުގެ ތެރެއިން އެންމެ ބޮޑު އެއްޗެއް ހޭދަ ކޮށްފައިވަނީ ކާބޯތަކެތީ ގެ ބާވަތްތަކަށެވެ.

ކާބޯތަކެތީގެ ބާވަތްތައް އެތެރެ ކުރުމަށް 968 މިލިއަން ވަނީ ހޭދަ ކޮށްފައެވެ.

ރާއްޖެއިން ފެބްރުއަރީ މަހު މައިގަނޑު ގޮތެއްގައި ބޭރުކޮށްފައިވަނީ މަހުގެ އުފެއްދުންތަކެވެ. އެގޮތުން ގަނޑުކުރި ކަނޑުމަހުގެ ގޮތުގައި 114 މިލިއަން ރުފިޔާގެ މަސް ރާއްޖެ އިން ބޭރު ކޮށްފައިވެއެވެ. ފެބްރުއަރީ މަހު 32 މިލިއަން ރުފިޔާގެ ރީނދޫ އުރަހަ ކަންނެލި ރާއްޖޭން ބޭރު ކޮށްފައިވެއެވެ.

ފެބްރުއަރީމަހު އިމްޕޯޓް އެކްސޯޕުޓުން ދައުލަތައް 363 މިލިޔަން ރުފިޔާ ވަނީ ލިބިފައެވެ.

މިދިޔަ ފެބްރުއަރީމަހު ރާއްޖެއަށް 4.4 ބިލިއަން ރުފިޔާގެ މުދާ އެތެރެކޮށްފައިވާ އިރު ބޭރުކޮށްފައިވަނީ 223 މިލިއަން ރުފިޔާގެ މުދަލެވެ.