ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ވެސް ބެންފީކާގެ މައްޗަށް ކުރި ހޯދައި، ބާސެލޯނާ އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

މި ދެ ޓީމު މިދިޔަ ހަފުތާގައި ބެންފީކާގެ އަމިއްލަ ދަނޑުގައި ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. އެހެންކަމުން ދެ ވަނަ ލެގާ ކުރިމަތިލީއިރު ވެސް، އެޑްވާންޓޭޖް އޮތީ ބާސެލޯނާ އަށެވެ.

ބާސެލޯނާގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު ދެ ވަނަ ލެގު އެ ޓީމުން ކާމިޔާބު ކުރީ 3-1 އިންނެވެ. މެޗުގައި ބާސެލޯނާ އިން ލަނޑު ޖަހައި ކުރި ހޯދާފައި ވަނިކޮށް، ބެންފީކާ އިން ނަތީޖާ ހަމަހަމަ ވެސް ކުރި އެވެ. ނަމަވެސް އިތުރު ދެ ލަނޑު ޖަހައިގެން ބާސެލޯނާ ވަނީ މެޗުން މޮޅުވެފަ އެވެ.

މެޗު ފަށައިގެން 11 ވަނަ މިނެޓުގައި ބްރެޒިލްގެ ރަފީނިއާ ވަނީ ލަނޑު ޖަހައި ބާސެލޯނާ އަށް ކުރި ހޯދައިދީފަ އެވެ. އޭގެ ދެ މިނެޓު ފަހުން ބެންފީކާ އިން މެޗުގެ ނަތީޖާ ހަމަހަމަ ކުރީ ނިކޮލަސް އޮޓަމެންޑީ ތަނަވަސްކޮށްދިން ފުރުސަތެއްގަ އެވެ.

ދެ ވަނަ ފަހަރަށް ބާސެލޯނާ އިން މެޗުގައި ލީޑު ނެގީ 27 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ބާސެލޯނާގެ ތިން ވަނަ ލަނޑު ޖަހައި ލީޑު ފުޅާ ކޮށްދިނީ ރަފީނިއާ އެވެ.

ބާސެލޯނާ އިން މުބާރާތުގެ ކުއާޓާ ފައިނަލްގެ ފުރުސަތު ހޯދިއިރު، މިފަހަރުގެ ޗެމްޕިއަންސް ލީގުގައި އެންމެ ރަނގަޅު ނަތީޖާއެއް ނެރެމުން އަންނަ ޓީމަކީ ބާސެލޯނާ އެވެ. އައު ފޯމެޓުގެ ދަށުން ކުޅެމުން އަންނަ ޗެމްޕިއަންސް ލީގުގެ ލީގު ބުރުގައި ބާސެލޯނާ ދިޔައީ ދެ ވަނަ އަށެވެ.