ކުރީގެ އެއް ވަނަ ފޯވާޑު، ޝާހުގެ އަތަށް ސީރިއަސް އަނިޔާއެއް ވެއްޖެ

ރާއްޖޭގެ ކުރީގެ އެއް ވަނަ ފޯވާޑު، ޝާހު އިސްމާއީލް (ސާޔާ)ގެ އަތަށް ސީރިއަސް އަނިޔާއެއް ލިބިއްޖެ އެވެ.

ސާޔާ އަށް އަނިޔާވެފައި ވަނީ މިހާރު ކުރިއަށްދާ ސެވަން އަ ސައިޑް ވެޓަރަންްސް ލީގުގެ މެޗެއްގައި ކުޅެނިކޮށެވެ. މޯލްޑިވްސް ސޮކަ މޭޓްސް (އެމްއެސްއެމް) އިން އިންތިޒާމު ކޮށްގެން ބާއްވާ އެ މުބާރާތުގައި ސާޔާ ކުޅެމުން އަންނަނީ ކުލަބު ވެލެންސިއާ އަށެވެ.

އެ މުބާރާތުގައި ހޯމަ ދުވަހުގެ ހަވީރު ވެލެންސިއާ އިން ކުޅުނު މެޗުގައި ސާޔާގެ އަތަށް ވަނީ އަނިޔާވެފަ އެވެ. އެގޮތުން މެޗުގެ ތެރޭގައި އެމްއެސް މޭޓްސްގެ ކުޅުންތެރިޔަކު ކުރި ޓެކުލަކާ ގުޅިގެން ދަނޑު މައްޗަށް ވެއްޓި، ސާޔާގެ އަތުގެ އުޅަނބޮށިީގެ ކަށިތައް ވަނީ ބިނދިފަ އެވެ. އުޅަނބޮށީގެ ކަށިތައް ފުނޑު ފަނޑުވެ، އަތް ބިންދައިގެން ގޮސްފައިވާ ކަމަށް ސާޔާ ވަނީ ބުނެފަ އެވެ.

މީގެ އިތުރުން މިވަގުތު އަތުގައި ޕްލާސްޓަރު އަޅާފައިވާއިރު، ވަރަށް ބޮޑަށް ވަނީ ދުޅަ ވެސް ވެފަ އެވެ. އަދި ދުޅަ ތިރިވުމާއެކު، ދެ ސާޖަރީއެއް ވެސް ސާޔާ ކުރަން ޖެހޭނެ އެވެ.

ސާޔާ އަކީ ކުރިން ރާއްޖޭގެ ސީނިއާ ޤައުމީ ޓީމުގެ އިތުރުން، ގިނަ ކުލަބުތަކަށް ވެސް ކުޅެފައިވާ ކުޅުންތެރިޔެކެވެ. ރަސްމީ ފުޓުބޯޅަ ކުޅުން ހުއްޓާލަން ނިންމި ފަހުން، ސާޔާ އަންނަނީ ވެޓަރަންސް މުބާރާތްތަކުގައި ކުޅެމުންނެވެ.

ސާޔާ ފާހަގަކޮށްފައިވާ ގޮތުގައި މިފަހަރު ލިބުނު އަނިޔާ އަކީ އޭނާގެ ކެރިއަރުގައި ވެސް މިހާތަނަށް ލިބުނު އެންމެ ބޮޑު އަނިޔާ އެވެ. އެހެންވެ މިހާރު ސާޔާ ނިންމައިގެން ހުރީ، މީގެ ފަހުން ވެޓަރަންސް މުބާާރާތްތަކުގައި ވެސް ނުކުޅުމަށެވެ.

ފުޓުބޯޅަ ކުޅުން ހުއްޓާލަން ނިންމި ފަހުން ސާޔާ ވަނީ ފުޓުބޯޅަ ހިންގުމުގައި ވެސް އިސް ދައުރެއް އަދާ ކޮށްފަ އެވެ. އެގޮތުން ސާޔާ ވަނީ އެފްއޭއެމްގެ ޖެނަރަލް ސެކްރެޓަރީގެ މަގާމާއި، އެެހެނިހެން އިސް މަގާމުތަކެއް ވެސް އަދާ ކޮށްފަ އވެެ.