"ސަރުކާރުން ދަނީ ފައިސާ ޗާޕްކުރުމަށް އެމްއެމްއޭ އަށް މަޖުބޫރު ކުރުވައިގެން ރާއްޖޭގެ އިގްތިޞާދު ނުރައްކަލުގެ ތުންފަތް މައްޗަށް ވައްޓާލަމުން"

މި ސަރުކާރުން ދަނީ މޯލްޑިވްސް މަނިޓަރީ އޮތޯރިޓީ އެމްއެމްއޭ އަށް ފައިސާ ޗާޕްކުރުމަށް މަޖުބޫރުކުރުވައިގެން ސަރުކާރުގެ ސިޔާސީ ފައިދާ އަށް ރާއްޖޭގެ އިގްތިސާދު ނުރައްކަލުގެ ތުންފަތް މައްޗަށް ވައްޓާލަމުން ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އަމީރު އެފަދައިން ވިދާޅުވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.

Advertisement

ސަރުކާރުން އެމްއެމްއޭ އަށް މަޖުބޫރުކޮށްގެން އެމްއެއޭގެ މެންޑޭޓާއި ޚިލާފަށް އެމްއެމްއޭ ލައްވާ މަސައްކަތް ކުރުވާ ކަމަށް އަމީރު ވިދާޅުވިއެވެ.

ސަރުކާރުން ވަނީ އެމްއެމްއޭ މެދުވެރިކޮށް އިގްތިސާދުގެ ތެރެއަށް ފައިސާ ނެރުމަށް ނިންމާފައެވެ. އެކަން ކުރުމަށް ހަމަޖެހިފައި ވަނީ އެޗްޑީސީގެ މިލްކިއްޔާތުގައި ހުރި ބިންތަކުގެ ތެރެއިން 22 ހެކްޓަރުގެ ބިން އެމްއެމްއޭ އަށް ގަތުމުގެ މުއާމަލާތެއް ހިންގައިގެންނެވެ. އެކަމުގެ ތަފްސީލްތައް އަމީރު ވަނީ އެ ނޫސްވެރިންގެ ބައްދަލުވުމުގައި ހިއްސާކުރައްވާފައެވެ.

އެމްއެމްއޭ އިން 22 ހެކްޓަރުގެ ބިމެއް ގާތްގަނޑަކަށް 15 ބިލިއަން ރުފިޔާ އަށް ގަތުމަށް ނިންމާފައިވާ ކަމަށެވެ. އެކަމަށްޓަކާ ބޭނުންވާ ފައިސާ ޗާޕުކޮށްގެން އެ މަރުހަލާ ކުރިއަށް ގެންދަން ނިންމާފައިވާ ކަމަށް އަމީރު ވަނީ ވިދާޅުވެފައެވެ. އަމީރު ވިދާޅުވި ގޮތުގައި މިއީ ރާއްޖޭގެ އިގްތިސާދީ ހަމަޖެހުން ނަގާލާނެ ފިޔަވަޅެކެވެ. އެކަމުގެ ސަބަބުން އިގްތިސާދަށް އިއާދަ ނުކުރެވޭ ވަރަށް ގެއްލުން ލިބޭނެ ކަމަށް އަމީރު ވިދާޅުވިއެވެ.

މީގެ ސަބަބުން ތަކެތީގެ އަގު ބޮޑުވެ އިންފްލޭޝަން މައްޗަށް ގޮސް ދިވެހި ރުފިޔާ ބަލިކަށިވެ، އެކްޗްސްޗޭންޖް ރޭޓް މަތިވުމަކީ އެކަށީގެންވާ ކަމެއް. އިންޓްރެސްޓް ރޭޓް މައްޗަށް ގޮސް ބެންކުތަކުން ލޯނު ލިބުމަށް ދަތިވާނެ ކަމަށް ޔަގީން ކުރެވޭ.

ކުރީގެ ފިނޭންސް މިނިސްޓަރ އިބްރާހިމް އަމީރު

އަމީރު ވަނީ އެމްއެމްއޭ އިން އެ މުއާމަލާތް ހިންގާ ގޮތާއި މެދު ސުވާލު އުފައްދާފައެވެ. ރާއްޖޭގެ ރިޒަރވްގައި އެފަދަ ކަމެއް ކުރެވޭ ވަރަށް ފައިސާ ނެތް ކަމަށް އަމީރު ވިދާޅުވިއެވެ. އެހެންކަމުން ބޭރު ފައިސާގެ ރިޒާވުން އެކަން ނުކުރެވޭނެ ކަމަށް އަމީރު ވިދާޅުވިއެވެ. އެހެންނަމަވެސް ބޭންކްތަކަށް ބޮންޑް ވިއްކައިގެން އެކަން ކުރެވިދާނެ ކަމަށާއި، ނަމަވެސް ބެންކުތަކުގައި ހުރި ފައިސާ ނަގައިގެން އެމްއެމްއޭ އިން އެ މުއާމަލާތް ނުހިންގާނެ ކަމަށް އަމީރު ވިދާޅުވިއެވެ. އެހެންކަމުން އެމްއެމްއޭ އިން އެ މުއާމަލާތް ހިންގަން އޮތް ހަމައެކަނި ގޮތަކީ ފައިސާ ޗާޕްކުރުން ކަމަށް އަމީރު ވިދާޅުވިއެވެ.

އަމީރު ވިދާޅުވި ގޮތުގައި މި ކަން ކުރަން ޖެހުނީ ބަޖެޓަށް ބޭނުންވާ ފައިސާ ހޯދުމަށް ނުކުޅެދުމުންނެވެ. އެގޮތުން ޑޮމެސްޓިކް މާކެޓުން ހޯދުނު ގޮތަކަށް ފައިސާ ހޯދުމުގެ ވިސްނުން ސަރުކާރުގެ ކިބައިން ފެންނަ ކަމަށް އޭނާ ވިދާޅުވިއެވެ. އެގޮތުން ޓްރެޝަރީ ބިލަށް ބޮޑުކޮށް، ބީއެމްއެލް މެދުވެރިކޮށް އިންވެސްޓް ކުރުވުމާއި ކުންފުނިތަކުގެ ފައިނޭންސް އަށް ނުފޫޒު ފޯރުވުން ފަދަ ކަންކަން ކޮށްގެން މާލީ ކަންކަން ސަރުކާރުން މެނޭޖްކޮށްފައިވާ ކަމަށް އަމީރު ވިދާޅުވިއެވެ.