ސަސްޕެންޑް ކޮށްފައި ހުންނެވި ފަނޑިޔާރު މަހާޒަށް ކުރާ ތުހުމަތަށް ޖޭއެސްސީއަށް ޖަވާބުދާރީ ވެވަޑައިގެންފި
ފަނޑިޔާރު މަހާޒަށް ކުރަނީ ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވުމުގެ ތުހުމަތު
ސޕްރީމް ކޯޓުގެ ފަނޑިޔާރު މަހާޒު އަލީ ޒާހިރު
ސަސްޕެންޑް ކޮށްފައި ހުންނެވި ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރަށް ކުރާ ތުހުމަތަށް ޖުޑީޝަލް ސާވިސް ކޮމިޝަން (ޖޭއެސްސީ)އަށް ޖަވާބުދާރީ ވެވަޑައިގެންފިއެވެ.
ފަނޑިޔާރު މަހާޒަށް ކުރަނީ ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވުމުގެ ތުހުމަތެވެ. އެއީ ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރުގެ ފިރިކަލުން ޑރ. އިސްމާއިލް ލަތީފް ބަންދުން ދޫކޮށްލަން ނުފޫޒު ފޯރުވި ކަމަށް ބުނާ މައްސަލައެކެވެ.
މިމައްސަލައާ ގުޅިގެން އާދިއްތަ ދުވަހުގެ 1:00ގައި ޖޭއެސްސީއަށް ފަނޑިޔާރު މަހާޒުވަނީ ހާޒިވެވަޑައިގެން ޖަވާބުދާރީ ވެވަޑައިގެންފައެވެ. ފަނޑިޔާރު މަހާޒު ޖޭއެސްސީއަށް ހާޒިރުވެފައިވަނީ ގާނޫނީ ވަކީލު ފައިސަލް މުހައްމަދާއެކު އެވެ.
ބައެއް މީޑިއާތަކުގައި ވަކީލު ފައިސަލްއާ ހަވާލާ ދެއްވައި ރިޕޯޓުކޮށްފައިވާ ގޮތުގައި، ޖޭއެސްސީގެ ސުވާލުތަކަށް ފަނޑިޔާރު މަހާޒު ޖަވާބުދެއްވި ކަމަށާއި، ކުރަމުންދާ ތުހުމަތުތަކާއި ގުޅިގެން އެދުވަހު ކަން ހިނގާދިޔަ ގޮތް ވަރަށް ސާފުކޮށް ކިޔައިދެއްވާފައިވާ ކަމަށެވެ. އަދި ކްރިމިނަލް ކޯޓުގައި ހިނގި ބަންދުގެ މަޖިލީހަކަށް ފަނޑިޔާރު މަހާޒު ނުފޫޒު ފޯރުވީ ކަމަށް ބުނެ ހުށަހަޅާފައިވަނީ މައްސަލައަކީ ރަނގަޅު މައްސަލައެއް ނޫން ކަމަށެވެ.
ފައިސަލް ވިދާޅުވީ އެ މައްސަލާގައި ފަނޑިޔާރު މަހާޒު ވަކި ނަތިޖާއެއް ހާސިލުކުރަން ކްރިމިނަލް ކޯޓުގެ ފަނޑިޔާރަކަށް ގުޅައި މެސެޖުކޮށްފައިނުވާ ކަމަށާއި، ޑރ. އިސްމާއިލް ލަތީފް ބަންދުގެ މަޖިލިސް އޮތީ ހެނދުނުގެ ވަގުތު ކަމަށްވާއިރު، އެ މައުލޫމާތު ފަނޑިޔާރު މަހާޒަށް ލިބިވަޑައިގެންނެވީ ވެސް އެދުވަހުގެ 11:30ގެ ފަހުން ކަމަށެވެ.
ފަނޑިޔާރު މަހާޒުގެ އިތުރުން ޑރ. އަޒްމިރަލްދާ ޒާހިރުގެ ސުލޫކީ މައްސަލައެއް ޖޭއެސްސީން ދަނީ ބަލަމުންނެވެ.
ފަނޑިޔާރުންގެ މައްސަލަތަކެއް ބަލައި، ސަސްޕެންޑްކޮށްފައި މިވަނީ ސިޔާސީ ޕާޓީތަކަށް މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި ބަދަލު ބާތިލު ކުރަން ހުށަހެޅި މައްސަލައިގެ ޝަރީއަތް ފަށާފައިވަނިކޮށެވެ. އަދި ސުޕްރީމް ކޯޓުގެ ދެ ފަނޑިޔާރުން ވަކި ކުރަން މަޖުބޫރުވާ ގޮތަށް ރައްޔިތުންގެ މަޖިލީހުން ވަނީ 26 ފެބްރުއަރީ 2025 ގައި ވަނީ ބިލެއް ފާސްކޮށްފައެވެ.
