"ޖަނަވާރުގެ ހާލަތު ރަނގަޅުކުރުމުގެ ކުރިން ރަނގަޅު ކުރަންވީ ރައްޔިތުންގެ ހާލަތު"

ޖަނަވާރުގެ ހާލަތު ރަނގަޅުކުރުމުގެ ކުރިން ރަނގަޅު ކުރަންވީ ރައްޔިތުންގެ ހާލަތުކަމަށް ރައްޔިތުންގެ މަޖިލީހުގެ މެންބަރު މުހައްމަދު އައްބާސް ވިދާޅުވެއްޖެއެވެ.

ހޯމަ ދުވަހު އޭނާ އެފަދައިން ވިދާޅުވީ ބޮޑެތި ޖޫރިމަނާތަކަކާއެކު ފިޔަވަޅު އެޅޭގޮތަށް އެކުލަވާލާފައިވާ "ޖަނަވާރު ގެންގުޅުމާއި ޖަނަވާރުގެ ރައްކާތެރިކަމުގެ ބިލު"ގެ ބަހުސް މަރުހަލާގައި ވާހަކަދައްކަވަމުންނެވެ.

އޭނާ ވަނީ ޖަނަވާރުންނާއި މެދު އިހުމާލުވުމުން ބޮޑެތި އަދަދުތަކުން ޖޫރިމަނާ ކުރާ އިރު އިންސާނުންނާއި މެދު އިހުމާލުވާ މީހުންނާއި މެދު ފިޔަވަޅު އެޅޭނެ ގޮތެއް ނެތް ކަމަށް ފާހަގަކުރައްވާ އައްބާސް ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. އިންސާނުންނާއި މެދު އިހުމާލުވުމުން ވެސް ޖޫރިމަނާ ކުރެވެން ވާނެ ކަމަށް ޤަބޫލުކުރައްވާ ކަމަށް އޭނާ ވަނީ ވިދާޅުވެފައެވެ.

ޖަނަވާރު ގެންގުޅުމާއި ޖަނަވާރުގެ ރައްކާތެރިކަމުގެ ބިލު" އަންގާރަ ދުވަހު މަޖިލީހުން ވަނީ ފާސްކޮށްފައެވެ. ސަރުކާރުގެ ފަރާތުން ހިންނަވަރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި އެ ބިލު ބަލައިގަތީ 43 މެންބަރުންގެ އިއްތިފާގުންނެވެ. ބިލާ ދެކޮޅަށް އެއްވެސް މެންބަރަކު ވޯޓެއް ނުދެއްވައެވެ. ބިލު އިތުރަށް ދިރާސާކުރުމަށް އެ ބިލު ރައްޔިތުންގެ މަޖިލީހުގެ އިޖުތިމާއީ ކޮމިޓީއަށް ވަނީ ފޮނުވައިފައެވެ.

މި ބިލަކީ ދެމެހެއްޓެނިވި އަދި ރައްކާތެރި ގޮތެއްގައި ޖަނަވާރު ގެންގުޅުމަށް މަގުފަހިކުރުމަށް ހުށަހެޅި ބިލެއް ކަމަށް ސަރުކާރުން ބުނެއެވެ. އެގޮތުން ވިއްސައި އާލާކުރުމާއި، ވިޔަފާރިކުރުމުގަ ހަރުދަނާ އުސޫލެއް އެކުލަވާލުމަކީ ވެސް ބިލުގެ މަގްސަދެކެވެ.