ސޮސިއެޑާޑް ބަލިކޮށް، ބާސެލޯނާ ތާވަލްގެ ކުރިއަށް

ސްޕެނިޝް ލީގުގައި ރެއާލް ސޮސިއެޑާޑާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން އަނެއްކާ ވެސް ލީގު ތާވަލްގެ ކުރިއަށް ޖެހިލައިފި އެވެ.

އާދީއްތަ ދުވަހުގެ ރޭ ސޮސިއެޑާޑާ ދެކޮޅަށް ކުޅުނު މެޗު ބާސެލޯނާ އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ދެ ލަނޑު ޖެހިއިރު، ދެ ވަނަ ހާފުގައި ވަނީ އަނެއް ދެ ލަނޑު ޖަހައިފަ އެވެ.

މެޗުގައި ސޮސިއެޑާޑަށް އެންމެ ބޮޑު ގެއްލުމެއް ދެއްކީ، މެޗުގެ 17 ވަނަ މިނެޓުގައި އެ ޓީމުގެ ޑިފެންޑަރު އާރިޓްޒް އެލުސްޓުންޑޯ އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. މެޗުގައި ބާސެލޯނާ އިން އެ ޓީމުގެ ހަތަރު ލަނޑު ޖެހީ އޭގެ ފަހުންނެވެ.

މެޗުގެ 25 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޖެރާޑް މާޓިން އެވެ. އެއީ ޑެނީ އޮލްމޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ ފުރަތަމަ ހާފުގައި ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ މާކް ކަސާޑޯ އެވެ. އެ ލަނޑު ޖަހަން ވެސް ފުރުސަތު ތަނަވަސްކޮށްދިނީ އޮލްމޯ އެވެ.

މެޗުގެ ދެ ވަނަ ހާފު ފަށައިގެން ބާރަ ވަނަ މިނެޓުގައި ބާސެލޯނާގެ ތިން ވަނަ ލަނޑު ޖެހީ ރޮނާލްޑް އަރައުހޯ އެވެ. އަދި މެޗުގައި ބާސެލޯނާގެ ހަތަރު ވަނަ ލަނޑު، ޕޮލެންޑުގެ ފޯވާޑް ރޮބާޓް ލެވަންޑޯސްކީ ޖެހީ މެޗުގެ 60 ވަނަ މިނެޓުގަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އަރައުހޯ އެވެ.

މޮޅާއެެކު ބާސެލޯނާ އިން ވަނީ ލީގު ތާވަލްގެ އެއް ވަނައިގައި ޕޮއިންޓެއްގެ ލީޑު ނަގައިފަ އެވެ. މިހާތަނަށް ލީގުގައި ކުޅެފައިވާ 26 މެޗުން ބާސެލޯނާ އަށް ލިބެނީ 57 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޮތް އެތުލެޓިކޯ މެޑްރިޑަށް 56 ޕޮއިންޓު ލިބޭއިރު، ތިން ވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް ލިބެނީ 54 ޕޮއިންޓެވެ.