އަލްވަރޭޒްގެ ލަނޑުން އެތުލެޓިކޯ މޮޅުވެއްޖެ

ސްޕެނިޝް ލީގުގައި އެތުލެޓިކް ބިލްބާއޯއާ ދެކޮޅަށް ކުޅުނު މެޗުން މޮޅުވެ، އެތުލެޓިކޯ މެޑްރިޑުން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ.

އެތުލެޓިކޯގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އެތުލެޓިކޯ އިން ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗުގައި އެތުލެޓިކޯ އިން ރަނގަޅު ކުޅުމެއް ދެއްކިއިރު، އެ ޓީމުން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗުގެ ކުރީ ކޮޅު އެތުލެޓިކޯގެ ޖަވީ ގާލަން ހުރަސްކޮށްދިން ފުރުސަތެއްގައި ރޮބިން ލީ ނޯމަންޑް ބޮލުން ފޮނުވާލި ބޯޅަ ދިޔައީ ގޯލުގެ ހުރަސް ދަނޑި ކައިރިން ބޭރަށެވެ.

އޭގެ ފަހުން އެތުލެޓިކޯގެ ޖިއުލިއާނޯ ސިމިއޯނޭ ފޮނުވާލި ބޯޅަ އަށް އެންޓޮއިން ގްރީޒްމަން އެ ބޯޅަށް ފޮމުވާލަން މަސައްކަތް ކުރި ނަމަވެސް، އެ ބޯޅަ ދިޔައީ ބޭރަށެވެ.

މެޗުގެ 66 ވަނަ މިނެޓުގައި އެތުލެޓިކޯ އިން ވަނީ ލަނޑު ޖަހައި ލީޑު ނަގައިފަ އެވެ. މާކޮސް ލޮރެންޓޭ ތަނަވަސްކޮށްދިން ފުރުސަތެއްގައި އެތުލެޓިކޯ އަށް އެ ލަނޑު ޖަހައިދިނީ، އާޖެންޓީނާގެ ޒުވާން ކުޅުންތެރިޔާ ހޫލިއަން އަލްވަރޭޒް އެވެ.

މޮޅާއެކު އެތުލެޓިކޯ އިން ވަނީ ލީގު ތާވަލްގެ އެއް ވަނަ މަގާމަށް ޖެހިލައިފަ އެވެ. މިހާތަނަށް ލީގުގައި ކުޅެފައިވާ 26 މެޗުން އެ ޓީމަށް ލިބެނީ 56 ޕޮއިންޓެވެ. އެތުލެޓިކޯ އަށް ވުރެ އެއް މެޗު މެދުން ކުޅެގެން ދެ ވަނައިގައި އޮތް ބާސެލޯނާ އަށް ލިބެނީ 54 ޕޮއިންޓެވެ. ނަމަވެސް މެޗުގެ އަދަދު ހަމަކުރާއިރު، އެއް ވަނަ އަށް ޖެހިލުމުގެ ފުރުސަތު ބާސެލޯނާ އަށް އޮންނާނެ އެވެ.